كذبة السعي للكمال والحقيقة اللي الطبيب نفسي كشفها…

في يوم في شهر نوفمبر سنة ٢٠١٣ كنت في حالة نفسية سيئة جدًا..

وفضفضت مع اختي الصغيرة شيري.. وقالت لي وقتها ان المشكلة في اي حاجة من الحاجات اللي انا بشتكي منها..

المشكلة عندي أنا.. وأنا محتاجة اتغير..

وقتها الكلام كان مبهم بالنسبة لي..

رجلي اخدتني لمكتبة كانت فاتحة في النادي.. مكان ما قابلت اختي..

دخلت المكتبة وعلي الرف بتاع كتب ال Self-help لاقيت كتاب بعنوان 

Be Happy without being Perfect 

عنوان الكتاب شدني.. اشتريته وبدأت اقراه

ومع الصفحات والفصول اكتشفت جزء كبير من المشكلة..

مشكلة بحرف المرة دي حرف الكاف..

كاف "كمال" السعي للكمال..

مع الكتاب اكتشفت اني اتربيت اني اكون Perfectionist 

واني بسعى للكمال.. لإن كل حاجة تكون مية مية.. ممتازة.. كل حاجة، في البيت وفي الشغل ومع الولاد..

ولأن الكمال لله وحده ولأن السعي للكمال غاية لا تدرك..

كنت طول الوقت مضغوطة.. بضغط نفسي واللي حواليا.. وبالرغم من الضغط والجري مش بوصل للكمال وبحس بالإحباط.. 

وفضلت حابسة نفسي في دايرة الضغط والسعي للكمال والإحباط لحد ما تعبت نفسيًا جدًا وقابلت يومها اختي..وجبت الكتاب..

ولحد وقتها ما كنتش فاهمة ان سعي أنا للكمال هو اللي مسبب لي التعب النفسي ده..

مرت سنين والحمد لله تعافيت بنسبة كبيرة من السعي للكمال..

وكنت بقرأ مرة كتاب في علم النفس عن الناس اللي بتسعى للكمال..

والكتاب يومها اتكلم عن كلمة تانية بحرف الكاف ونورت عندي لمبة كبيرة جدًا..

اتكلم عن الكسل.. ووضح ان فيه ناس كتير بتقول على نفسها انها Perfectionist 

وبتقول ان بسبب سعيها للكمال هي واقفة مكانها..

وشرح ان دي الاعيب نفسية الإنسان بيضحك بيها على نفسه..

وبدل ما يقول بصراحة وشجاعة أنا كسول علشان كده مش بتحرك..

بيقول أنا Perfectionist  علشان كده مش بتحرك..

الطبيب النفسي وضح ان الPerfectionist  بيتحرك ويفضل يجود ويحسن ويطور ويحنتف

لأنه في سعي للكمال.. 

عكس الكسول.. اللي قاعد مكانه ومش بيتحرك الا يمكن في عقله بس.. وبتمر الأيام والسنين وهو مكانه..

حرف المرة دي حرف الكاف بين الكمال والكسل..

وخلينا نفتكر ان دينا دين اعتدال واننا أمة وسط.. ولا نقف عند الكسل ولا نعقد نفسنا مع الكمال..

خلينا نسعى.. من القلب.. ونترك الكسل ونطرق باب العمل.. العمل الصالح.. العمل المصلح.. 

اللي فيه اتقان واحسان.. لأنه لرب العالمين..

وسيبنا من حجة السعي للكمال..

وسيبنا من الكسل.. اللي اكيد مش عسل..

#من_الألف_للياء_٢٢_كاف

#مقالة_أسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت