رقم ٤ السر ورا إنك تتقدم في الأهداف اللي متعطل فيها!

books career champion desires dr. reiss dreams motivation olympics reading talks values who am i

"حلمي إني أكون  في الدورة الأوليمبية اللي هتتنظم كمان خمس سنين.."

سؤال سألته لطلابي بين جدران الفصل وهما في تانية إعدادي وقت ما كنت بشتغل مُدَرِسة..

وطلبت منهم إنهم يكتبوه على ورق.. 

حلم الدورة الأوليمبية كان على ورقة منهم، لطالبة عزيزة عليا جدًا، تحولت إلى مصدر إلهام ليا في الحلم، والمثابرة، والنمو، والتسديد والنجاح..

الطالبة كتبت الحلم ده في الفصل.. وبعدها بخمس سنين عاشت الحلم في الحياة..! 

فعلًا سافرت وشاركت في الدورة الأوليمبية كبطلة مصرية في الباليه المائي..

 

مرت سنين بعد تحقيقها الحلم وتخرجها، وكنت يوم الصبح في النادي في وسط الأسبوع وقابلتها، سألتها بتعجب بتعمل ايه في وسط الأسبوع؟ وهزرت وسألت لو هي مزوغة من الشغل.. ردت قالت لي إنها استقالت من الشغل، وبقيت بتشتغل في النادي "مدربة" لفريق الباليه المائي…!

 

طبعًا هوب لاقتني بفكر في أحد الكتب الملهمة جدًا بالنسبة واللي ساعدتني أفهمني، واعمل اختيارات في حياتي تناسبني. مش بس كده، الكتاب كمان خلاني افهم مفتاح الحماس عندي ايه.. ايه اللي يخليني متحمسة وايه اللي يطفيني خالص.. ومش بس كده، الكتاب علمني أفهم الناس اللي بتعامل معاها، وازاي استوعب اختلافاتنا، وازاي اتعامل معاها بنضج..

 

الكتاب كان بعنوان "Who am I" لطبيب نفسي اسمه Dr. Reiss.. وكان من مكتبة الديوان..

الكتاب كان عن الرغبات وازاي كل واحد فينا عنده رغبات بتحركه والرغبات دي هي سر الحماس والدافعية.. وإنه لو عايز ينجح في الحياة ويتفوق محتاج الأول يفهم رغباته وبعدين يستخدمها بطريقة تساعده يتقدم في مجالات الحياة المختلفة..

مثلًا طالبتي العزيزة "نور"، رغبة النشاط البدني عندها عالية، وبالتالي حلمها كان مناسب رغبتها، وبعد ما اشتغلت في مكان مقفول كموظفة مالقيتش نفسها وكانت النتيجة إنها استقالت ورجعت تاني كمدربة..

مش بس كده، رغبة التأثير والتواصل الإجتماعي عندها عالية.. لما رجعت الباليه المائي، رجعت كمدربة لفريق… مش مدربة فردية.. لا ومش بس كده.. لما بدأت تدرب لاقيت المتعارف عليه هو الزعيق والضغط والصوت العالي.. فقررت تفتح اكاديمية لتدريب فريق باليه مائي بالحب مش بالقسوة..

 

ده اسمه ايه؟ 

ده اسمه انسان، فهم رغباته، حدد حلم مناسب لرغباته، رغباته ساعدته يتحمس لتحقيق الحلم ويثابر، قرر ما يخونش نفسه ويكمل في شغل مش مناسب له حتى لو كان مكانته الإجتماعية اعلى أو دخله أعلى.. واختار شغل يناسبه ورجع حلم حلم أكبر مناسب لرغباته وقيمه.. قيمة الحب والعمل الجماعي والتفوق والمثابرة.. 

 

من الكتاب طلعت ب٩ مفاهيم محورية ساعدتني اتحرك بخطوات ثابتة اكتر تجاه احلامي وأهدافي.. 

 

١- رغباتي القوية مسعداني اتقدم في الحياة، زي رغبة التأثير أو العيلة أو النظام..

 

٢- رغباتي القوية ممكن تسبب لي خلل في التوازن، زي رغبة التأثير لما تخليني اشتغل اكتر واهمل عيلتي أو اهمل صحتي..وبالتالي محتاجة اخد بالي انها ممكن توصلني لنتيجة سلبية لو انسقت وراها بدون عقلانية..

 

٣- رغباتي الضعيفة سبب محوري ورا انى مش بتحرك تجاه أهداف مهمة، عقلي مستوعب أهميتها إنما أنا عندي مقاومة تجاهها، زي هدف إني امارس رياضة وأنا رغبة النشاط البدني عندي ضعيفة..

 

٤- إني محتاجة استخدم الرغبات القوية علشان اتحرك تجاه الأهداف اللي رغباتي لها ضعيفة، زي مثلًا اشجعني العب رياضة عشان لما أكبر يكون عندي صحة العب مع احفادي أو اشتغل ويكون ليا تأثير في المجتمع.. 

٥- إن صحيح هما ١٦ رغبة، إنما كل حد فينا عنده تركيبة خاصة جدًا، وبالتالي متوقعش من ولادي إن رغبة النظام عندهم تبقى عالية زي ما هي عندي عالية واتفهم إن عندهم رغبات عالية بتحركهم، زي بنتي مثلًا ورغبتها في التواصل الإجتماعي أو ابني ورغبة التعلم والفضول..

 

٦- إن الرغبات محور اساسي وإحنا بنعمل اختيارات، سواء في اختيار نوع الدراسة، أو طبيعة الشغل أو شريك الحياة، أو مكان السكن أو حتى نوع الخروج والفسح.. اللي رغبته في السكينة عالية هيحب يسكن ويخرج في أماكن مختلفة تمامًا عن اللي رغبته في التواصل الإجتماعي عالية..

 

٧- إن مفيش حاجة اسمها أنا فاشل في الموضوع ده، فيه حاجة اسمها أنا عندي رغبة ضعيفة للموضوع ده ومش متحمس له، والمفتاح هنا إني أطبق رقم ٤ زي ما عملت مع الرياضة من ٢٠١٧ الحمد لله، بعد سنين من المقاومة لممارستها، لعدم استيعابي لرغباتي…

 

٨- إن فهم رغباتنا والتصرف وفقًا لها بعقلانية بيوفر علينا توهة وتخبط بدل ما نفضل نجرب حاجات مش ملائمة لتركيبة رغباتنا 

 

٩- إننا نبطل نحكم على الناس إن ده مهرجل أو ده كسول أو ده شخصيته ضعيفة.. أو ده جبان.. 

لأ، دول عندهم تركيبة رغبات "مختلفة عننا"، تركبيتهم الخاصة..

 

طبعًا الكتاب كان نقطة محورية في حياتي في التقدم في الأهداف اللي كنت متعطلة فيها بسبب ضعف رغباتي المرتبطة بيها.. زي مثلًا الرياضة والإدخار.. ولما بدأت ادخر، بفضل الله بعد كام سنة ربنا وفقني افتح شركتي الخاصة..

 

يا ترى عارف رغباتك؟

يا ترى متعطل في ايه وواقف بتجلد نفسك بدل ما تفهمها؟

يا ترى ايه ممكن تحققه بس لو فهمت تركيبة الخاصة بنقط قوتها وضعفها واستخدمتها بعقلانية وذكاء علشان تتقدم في أهدافك وتحقق أحلامك؟

 

 

طالبتي الغالية على قلبي، كانت أحد المتحدثين في ال Career Day اللي فريقنا نظمه في شهر مارس.. واتكلمت عن الحلم، والمثابرة ومواجهة الإحباط، وحسن استغلال الوقت، وكلام كتير ملهم للشباب والكبار…

لو عايز تتفرج علي كلمة نور يومها، ابعت لنا على صفحة الفيس بوك رسالة اطلب فيها "كلمة نور يوم الكاريير"

لو عايز تتعرف على رغباتك وايه اعلى رغبة فيهم، ابعت لنا رسالة اطلب فيها استقصاء الرغبات..

 

لو عايز تتعرف على ال١٦ رغبة اللي شرحهم المؤلف اضغط اللينك ده 

https://www.youtube.com/watch?v=ed78W7qs5Dg

 

 

#كتب_غيرت_حياتي_١٠

#اكتر_ناس_الهمتني

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر

بعاداتي باصمم حياتي

سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها