الشمس والقمر والشمعة

في ٢٠١٠ اخدت قرار اني اقرأ كل شهر كتاب.. 

بدأت اقرأ كتب في مجال ال
Self-help
وفيها بدأت الاقي قصص عن نيلسون مانديلا والأم تيريزا وغاندي..

بدأ يتملكني فضول اني اعرف قصة حياتهم..

وبدأت ابعت اجيب كتب من بره عن قصص حياتهم..

في قصة غاندي كان فيه مقولة له اهلمتني جدًا.. وبقيت احطها على كتيبات ورشة بقدمها للمراهقين 

المقولة كنت بتقول
" The future depends on what you do today"

يعني المستقبل بتاع كل حد فينا بيعتمد على اللي كل حد فينا بيعمله النهارده..

بعدها قريت مقولة بتقول 
“It is better to light a candle than curse the darkness”

 – Eleanor Roosevelt"

يعني من الأفضل ان توقد شمعة بدلًا من أن تلعن الظلام..

بدأت افكر اني اوقد شموع مش شمعة..افكر بشكل ايجابي، اشتغل بحماس على أمل ان اوقد شمعة… ومن حماسي ان اوقد شموع في وسط السلبية واحوال البلد بدأت اتعب.. صحيًا ونفسيًا..

وقتها ومع تدهور صحتي استوعبت كلمة المرة دي..

كلمة بحرف الضاد..

ضاد ضوء..

اني من حماسي بدل ما اوقد شمعة عشت شمعة.. احترق من اجل الأخرين..

كل ما حد يطلب حاجة اعملها.. البيها في الحال.. حتى لو على حساب صحتي وسلامي النفسي..

وبعد شوية مساعدة من معالجة نفسية استوعبت اني عليا اوقد ضوء في ظل العتمة..

ضوء شمس مش شمعة..

شمس.. شمس بتطلع في وقت ووقت تاني لا..

شمس احيانًا بتطلع ساعات طويلة واحيانًا بتطلع ساعات اقصر..

شمس بتسيب مسافة… وبتتتبادل ادوار مع القمر..

شمس مش شمعة..

لاقيت ان كتير منا اتربى، بالذات الستات، انها تعيش شمعة تحترق من اجل الأخرين..

لحد ما هي نفسها تخلص.. 

تفضل توقد ضوء وسط الظلام لحد ما هي تنهار.. وتبطل تنور للغير..

غير الشمس اللي لها جدول ونظام وبالتالي ضوءها مستمر من بدء الخليقة ويفضل لقيام الساعة..

فكرت مع حرف الضاد في الضوء..

وازاي كل انسان منا محتاج يعمل مع نفسه وقفة ويفكر هل هو شمعة تحترق ولا شمس 

ولو شمس.. شمس بعيد باردة بتنور من بعيد من غير الفة وانس..

ولا شمس قريبة قوية بتنور وهي بتلسع وبتلسوع اللي تنور له..

ولا شمس دافية بنتور بتوازن وحب وحكمة؟

ضاد ضوء..

انسان شمس في حياة غيره.. شمس ضوءها ينور ويداوي ويطيب ابدان وعقول..

ضاد ضياء..

#من_الألف_للياء_١٥_ضاد

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت