الشبشب ودرس التربية العظيم..

البسي الشبشب..

يا بنتي مش امبارح قلت لك ما تمشيش حافية..؟

البسي الشبشب..

يعني علقت لك ورقة في الطرقة مكتوب عليها البسي الشبشب..

اعمل ايه اكتر من كده..؟!!

جمل اتكررت لأيام واسابيع وشهور.. 

ما بيني وبين بنتي وهي صغيرة..من فوق العشرين سنة..

من كام يوم جيت البس الشبشب بتاعي ما لاقتهوش في مكانه..

سألت بنتي اللي بقت في العشرينات لو شافته قالت لي بصوت برئ جدًا 

"اصلي ما لاقتش الشبشب بتاعي فاخدت بتاعك.."

يومها وقفت وفكرت قد ايه قعدت شهور وهي صغيرة اعلمها تلبس حاجة في رجلها..

وازاي دلوقتي هي بقيت رافضة تمشي حافية..لانها اتعودت تلبس شبشب…

فكرت يومها في حرف الصاد..

وكلمتنا المرة دي..

صاد "صبر"..

واحد من اهم واعظم القيم الأخلاقية اللي الإنسان محتاج يتبناها لو عايز ينجح في الدنيا في اي حاجة 

والأهم لو عايز يفوز في الأخرة…

صاد صبر..

يوم ما لاقيت ملك بنتي لابسة شبشبي افتكرت شجرة البامبو.. وقصتها معايا وملك لسه صغيرة..

وقتها كنت لسه حديثة العهد بالأمومة.. واقول واعيد ومفيش امل..

من غلبي روحت جبت كتاب لمؤلف عالمي اسمه ستيفن كوفي.. 

كتاب بعنوان العادات السبعة للعائلات الأكثر فاعلية..

في الكتاب المؤلف اتكلم عن شجرة البامبو..

اللي بتحتاح رعاية يومية، وبتفضل تكبر وتنمو تحت الأرض لمدة خمس سنين قبل ما اي حاجة تبان فوق الأرض..

وهوب.. بعد الخمس سنين فجأة في أسابيع تشق الأرض وتطلع بجذع وفروع وورق.. 

المؤلف وقتها شرح ان تربية الأولاد محتاجة رعاية بصبر ويقين ان النتيجة هتبان وأنها حتى لو مرت شهور وسنين من غير بشاير.. نفضل نرعى الزرعة دي يوميًا بإيمان انها هتؤتي أكلها بإذن ربها لما يحين ويأذن..

الكتاب والقصة كانوا محوريين بالنسبة لي..

مش في تربية ملك وفاروق ولادي..

في حياتي كلها بشكل عام..

فهمت اني محتاجة اتحلى بالصبر.. ومعاه يقين ومعاه عمل بحب.. 

مامتي دايما تقول لي "لكل مجتهد نصيب"..

فبقيت في حياتي بتصرف باجتهاد وحب ويقين وصبر وأنا متأكدة ان الثمار هتيجي..

امتى حين يشاء، أينما شاء، كيفما شاء..جل وعلا..

حرف المرة دي حرف الصاد.. صبر..

صبر على المرض واحنا متأكدين من الثواب..

صبر على الطفل العنيد.. واحنا متأكدين ان الحب احسن علاج لتقويم ولادنا..

صبر على العمل وطلب الرزق واحنا متأكدين ان علينا السعي وان السعي سوف يرى

صبر واحنا في تمام اليقين ان ربنا سبحانه وتعالي قال في كتابه الكريم:"  إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ" سورة الزمر

صاد صبر.. على السعي.. على الإبتلاء.. على شجرة البامبو حتى لو مش شايفين نتايج قدامنا دلوقتي..

صاد صبر..

#من_الألف_للياء_١٤_صاد

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت