داري على شمعتك والخطأ التربوي الفادح

بس.. هس.. اسكتي.. اوعي تقولي..

خبي.. داري..

داري على شمعتك تقيد يا بنتي..

كتير مننا اتربى على كده..

انه يداري ويخبي..

ويشارك بس الأخبار المؤلمة..

لما حد يسأله اخبار ولادك ايه؟ 

يقول مغلبني..

طيب واخبار الشغل ايه؟

المدير مطلع عيني؟

طيب اخبار البيت الجديد ايه؟

الجيران منهم لله..

كتبر منا اتربى واتغرس فيه الخوف من الحسد..

وبالتالي بقى عقلك بطريقة اتوماتيكية لا واعية بيفكر بخوف من الحسد.. 

وبيتكلم وهو خايف من الحسد..

وبيتحول لماكينة بتبخ اخبار سلبية..

ليه؟ لأنه خايف من الحسد ولأن العين فلقت الحجر..

من كام سنة كتبت بوست في يوم عيد جوازي..

عن ازاي فيه رجالة محترمة وكويسة..

وازاي الجواز زي الزرعة محتاج اهتمام ورعاية من الطرفين علشان يكبر بمودة ورحمة..

وقامت الدنيا عليا بعد البوست ده..

ناس تكتب لي هتتحسدي.. وناس تقول لي داري على شمعتك تقيد..

وناس تقول لي ايه فايدة البوست ده.. وناس تانية تقول لي ليه تستفزي الناس..

وطبعًا قلة قليلة بعتت تشكرني على مشاركة حاجة ايجابية عن الجواز اللي اتعقدوا منه من كتر ما سمعوا ناس بتشتكي منه مر الشكوى..

ايه علاقة اننا نداري على شمعتنا علشان تقيد وكتابة البوست بحرف المرة دي؟

ايه يا ترى؟

حرف المرة دي حرف الشين..

شين شكر.. شكر النعم وشكر الناس..

ربنا سبحانه وتعالى في كتابه الكريم في سورة ابراهيم قال: "لَئِن شَكَرْتُمْ لَأَزِيدَنَّكُمْ ۖ"

وقال في سورة الضحى:" وَأَمَّا بِنِعْمَةِ رَبِّكَ فَحَدِّثْ"

حرفنا المرة دي حرف الشين..

شين اننا نشكر ربنا باننا نقول ونتكلم لما يكون حالنا تمام..

نقول بنية طيبة.. بفِكر اننا بنعمل بأمر ربنا في كتابه..

نقول علشان لما نقول بننشر ايجابية.. ولما بنقول بنشجع الناس تطلب مننا مساعدة..

لو بقول ان صحتي تمام او ان دخلي تمام بفضل ربنا، الناس ممكن تطلب مني مساعدة..

لو بقول ان حياتي الزوجية تمام… الناس تتشجع تتجوز وتتشجع تطلب مني مشورة او نصيحة..

لو بقول ان ولادي تمام الناس تتشجع تخلف وتربي ولادها علشان بإذن الله يبقوا تمام..

شين نشكر ربنا لأنه وعد اننا لو شكرنا هيزدنا..

فيه ايه احلى من كده..

تشكر.. ربنا يزيدك..

فيه حلقة في النص.. ما بين الشكر وما بين الزيادة..

اتعملتها من شيخ علمني مفهوم الشكر..

بجملة اتحولت لعقيدة عندي..

قال لي :"الشكر إنفاق"

يعني نشكر ربنا مش بالكلام بس.. نشكر ربنا بالإنفاق..

نعمة صحة نشكر بالتطوع ومساعدة الغير..

نعمة مال نشكر بالصدقة والإنفاق والتبرع..

نعمة اهل نشكر باننا نساعد اللاجيئن والأيتام..

نعمة علم نشكر بإننا نعلم ونقدم محتوى هادف على السوشيال ميديا..

نعمة ولاد نشكر بإننا نربيهم على الشكر والإنفاق..

شين شكر..

شكر ربنا سبحانه وتعالى على نعمه التي لا تعد ولا تحصى.. من اول النفس اللي بناخده بسهولة واحنا صاحين ونايمين ومش شايلين هم انبوبة اكسجين ولا خراطيم..

شين شكر..

شكر الناس اللي ربنا جعلهم جنود يساعدونا في حياتنا ويدعمونا ويعلمونا ويساندونا

في حديث صحيح، النبي ﷺ قال" من لا يشكر الناس لا يشكر الله "

شين شكر..

شكر الناس..

شكر الله عز وجل

شكر باللسان وبالقلب وبالإنفاق..الإنفاق من القلب بإحسان.. من باب الشكر 

شين شكر..

#من_الألف_للياء_١٣_شين

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت