احتياج عميق ... يا تري مُشبَع؟

من حوالي عشر سنين كنت منظمه مشروع لطلابي..

وقتها كنت بشتغل في مدرسة دولية.. وكنت قائد مشاريع خدمة المجتمع…

المشروع كان مع مدرسة من مدارس الصم والبكم..

وكان من اهدافه ان الطلاب يتعرفوا على فئة من فئات ذوي الهمم وانهم يتعلموا يتعاملوا معاهم..

الطلاب اختاروا انهم ينظموا يوم ترفيهي للطلاب وان اليوم يكون فيه ماتش كورة…

بدأ اليوم وبدأت اتفرج.. واستعجبت جدًا..

كل شوية حد من الطلاب بتوعي يتعرض للضرب.. للزق.. للكعبلة خلال الماتش..

مش ضرب عادي ولا في سياق المتعارف عليه في ماتش كورة ودي..

لا كان ضرب فيه عنف.. عنف غريب علينا اول مرة نقابله بعد تعاملنا مع فئات تانية مختلفة من ذوي الهمم…

الموضوع استوقفني.. وسألت الأخصائية الإجتماعية بتاعت الطلاب.. ايه سبب العنف ده؟

حكت لها ازاي تعاملنا مع طلاب غير مبصرين (مكفوفين) وكانوا في منتهى اللطف والود.. ليه الولاد هنا كده؟

ردت وشرحت لي ان الكفيف غير الأصم الأبكم..

الكفيف مش شايف.. انما عارف يتواصل مع غيره.. عارف يسمع.. وعارف يتسِمِع..

أما الأصم الأبكم بيحس بالعزلة الإجتماعية وده بيولد عنده مشاعر بيخليه يتصرف باسلوب عنيف..

يومها اتأثرت جدًا..

ويومها افتكرت حاجة كنت قريتها في كتاب لمؤلف عالمي اسمه ستيفن كوفي..

كان بيشرح فيها ان كل انسان فينا، إنت وأنا، عنده احتياج عميق انه يتسمع ويحس ان الي بيسمعه مش بس سمعه لا كمان فهمه..

وان دي من احد اعمق احتياجات الإنسان واشدها الحاحًا ككائن اجتماعي بالفطرة..

لما افتكرت الكتاب استوعبت ليه الطلاب الصم والبكم كانوا بيتصرفوا بعنف غير متوقع..

فهمت ان عندهم احتياج اساسي غير مُشبَع..

المرة دي بتكلم عن حرف السين..

سين سمع.. سين سماع.. سين استماع..

كتير مننا عنده حاسة السمع.. هل فعلًا بنسمع؟ ولا عندنا الحاسة ومش سامعين.. ولا سامعين نفسنا ولا غيرنا..

طيب لو بنسمع، هل بنستمع؟ بانصات وحضور وبرغبة حقيقية مخلصة اننا نفهم اللي بيتكلم معانا واننا نستوعب هو بيقول ايه؟

ولا عندنا الحاسة وعايشين في وسط اصحابنا واهلنا وزمايلنا واحنا اصماء..؟

سين سماع واستماع بتعاطف..

انسان بيستمع لأفراد عيلته الصغيرة والكبيرة.. عيلة اسمها الإنسانية..

انسان بيستمع وبيفهم ويستوعب ويتصرف وفقًا للاستيعاب.. بيتصرف بتعاطف..

وهو عارف ان حتى الإستماع ده سعي.. 

وان سعيه سوف يرى.. 

سين سماع.. استماع..


#من_الألف_للياء_١٢_سين

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت