يا تري زرعتك محتاجة ايه؟

من فترة قريت كتاب ممتع جدًا في علم النفس.. كان بعنوان
Authentic..

الكتاب كان بيتكلم عن ازاي الإنسان يكون حقيقي.. نسخة اصلية من نفسه فعلًا.. 

وازاي كل حد فينا اتولد انسان حقيقي.. والتربية والتنشئة خلقت منه انسان اجتماعي لابس اقنعة..

قناع سمعان الكلام وقناع ما يصحش.. وقناع عيب.. 

وبسبب كتر الأقنعة وطول مدة لبس الإنسان لها بيبدأ ينسى نفسه الأصلية.. ويفتكر انه هو والقناع واحد..

مؤلف الكتاب، الاستاذ الدكتور في الطب النفسي، استخدم البطاطس في مثال له..

وقال ان في تجربة باحث قسم محصول بطاطس لنصين.. نص حطه في الهواء الطلق وسابه يتعرض للهوا والشمس..

والنص التاني حطه في بدروم وبعيد عن اي مصدر هواء او نور..

وبعد فترة قارن ما بين المجموعتين..لاقى البطاطس اللي في الهواء الطلق في حالة ممتازة..

ولاقى البطاطس اللي في البدروم عفنت…

القصة دي الهمتني جدًا اني اكتب عن حرفنا المرة دي..

المرة دي حرف الزين..

زين زرعة..

كل حد فينا زي الزرعة… والزروع اصناف..

أنت صنف وأنا صنف..

بنتي نوع وابني نوع تاني..

واخواتي واهلي واصحابي..

كل حد فينا زرعة منفردة..

ولأنها زرعة منفردة احتياجاتها كمان منفردة..

منا اللي بيحتاج ينطلق في الهواء الطلق.. زي المجموعة الأولى من البطاطس..

ومنا اللي يحب يعيش في الضل او لوحده..

ومع ذلك حالنا ايه؟

حالنا اننا حصلنا غسيل مخ..

وبقينا شايفن صورة واحدة للزرعة الكويسة..

محتاجة تسمع الكلام وتنام الساعة كذا وتصحى الساعة كذا وصوتها لو بنت يكون كذا..

وفي المناسبات الفلانية تلبس كذا.. وتدرس كذا وتصرف كذا..

وتاكل من كل الأكلات حتى لو كذا ده عندها حساسية منه او صعب الهضم لها..

وبقي اغلبنا محصول بطاطس عايش في بدروم اسمه لازم وما يصحش الناس تقول ايه..

وقليل جدًا منا اللي قاعد في الهوا والنور والحرارة اللي مناسبين له علشان يزدهر..

زين زرعة..

يا ترى انت كزرعة ايه اللي انت محتاج له.. محتاج له فعلًا مش فاكر انك محتاج له..

ويا ترى اللي فينا عنده ولاد.. هل بيروي كل زرعة وفقًا لاحتياجاتها ولا حاططهم كلهم في بدروم واحد من غير ما يهتم يفهم نوع زرعة كل حد فيهم..

انت وانتي وأنا زي الزرع..

كل واحد فينا له بصمة ايد مختلفة وله بصمة احتياجات مختلفة لما تُشبَع كنزهز..

زين زرعة… تطرح حب وخير ومساهمة مجتمعية..

وسط عيلة الإنسانية.. 

لما يوصل لها احتياجاتها بتَفَهُم وقبول وتعاطف وحب..

زين زرعة..

#من_الألف_للياء_١١_زين

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت