انت ايه.. ما بتفهميش؟

انت ايه.. ما بتفهميش؟ 

ايه الغباء ده..؟!

الواد ده طالع غبي لمين…؟

يا غبيييية…

كتير مننا سمع المصطلح ده.. 

مش سمعه لا.. اتوصف بيه.. 

شتيمة على الماشي كده من اب او ام او مدرب او مدرس..

المهم ان كتير مننا اتوصف بالغباء في مرحلة ما من عمره..

وللأسف.. كتير منا بيصدق فعلاً الوصف ده… 

بيصدق انه غبي.. مش ان ذكاؤه محدود في نطاق او مجال معين.. لأ، بيصدق انه غبي..

وطبعًا لما بتكون الكلمة او الوصف ده من حد قريب زي أب أو أم.. 

مش بس الطفل بيصدق انه غبي.. لأ بيتجرح كمان جدًا.. جرح كبير.. ومؤلم..

وبيحصل ايه؟

بيصدق.. يعني ايه؟ 

يعني بيتصرف وفقًا للوصف ده.. بيتصرف تصرفات مش ذكية.. 

طبيعي ما هو اهله او مدرسينه الكبار قالوا له انه غبي.. يتصرف بذكاء ازاي؟

ايه علاقة الغباء بالحرف بتاعنا؟

الحرف المرة دي هو حرف الذال..

ذال ذكاء… عكس الغباء كده..

ومش ذكاء واحد.. لأ ذكاء متعدد…

مرة كنت بحضر ورشة عمل فريقنا لخدمة المجتمع، فريق كن إنسانًا، كان بيقدمها في اطار مشروع للأمهات محدودي الدخل.. 

الورشة كانت بتتكلم عن الفاعلية وجزء منها تطرق للذكاء..

وبدأت المدربة تقدم نشاط للأمهات.. منه وضحت لهم الأنواع ال٨ للذكاء..

وشرحت لهم ان مفيش حاجة اسمها طفل غبي..

فيه حاجة اسمها طفل عنده ذكاء موسيقي.. او ذكاء حركي عالي..

وذكاؤه المنطقي متوسط او ضعيف..

ومع الشرح وضحت ان الذكاء حاجة بتتنمى بالتدريب.. 

يعني ممكن حد يتولد ذكاؤه المنطقي (في الرياضيات والحساب) متوسط او ضعيف..

انما مع أم صبورة أم مدرس مخلص يفضلوا وراه ويساعدوه لحد ما ينموا ذكاؤه المنطقي.. ويزيد..

طبعًا يوم الورشة لاقتني مع شرح المدربة بمسك دموعي بالعافية.. 

فكرت في اطفال كتير.. زيي وزيك وزي ولاد الأمهات اللي كانوا حاضرين الورشة.. 

اللي اتحبسوا في وصف صدقوه عن نفسهم.. انهم اغبياء..

مثلًا مدرب الباليه وأنا طفلة في ابتدائي حبسني في سجن الغباء الحركي.. 

وصدقت عن نفسي اني ماليش في الرياضة.. لحد ما عديت الأربعين وربنا رزقني بمدربات عندهم صبر واخلاص وبالممارسة اتقدمت واتحسنت.. صحيح اتقدمت ابطأ من غيري.. انما اتقدمت جدًا..

يوم الورشة حبست دموعي.. وكان نفسي امسك ميكروفون واقف في ميدان عام واكلم امهات مصر.. 

لأ امهات العالم..

لأ.. مش بس امهات العالم.. كمان الأبهات..

لأ.. مش الأمهات والأبهات بس..

اكلم المدرسين والمدربين وكل القائمين على تنشئة الأطفال.. 

واقول لهم اسمعوا انواع الذكاءات.. 

وركزوا وانتم بتتعاملوا مع ولادكم ايه انواع الذكاءات العالية اللي عندهم.. 

وبدل ما نقول لحد من ولادنا انت غبي.. نقول له انت عندك ذكاء موسيقى عالي…

وانا مستعدة اساعدك في الذكاء الإجتماعي.. 

او ايه رأيك تاخد درس اضافي علشان تنمي ذكاءك المنطقي..

مش انت غبي.. 

نلغي كلمة انت غبي من القاموس.. لأن مفيش حد غبي.. فيه حد ذكاؤه ما حصلوش تنمية.. 

ابحاث المخ المتطورة اثبتت ان الذكاء مش حاجة ثابتة وانه بيتنمى مع التدريب..

حرفنا النهارده حرف الذال..

ذال ذكاء.. متعدد 

خلي كل واحد فينا كإنسان يلبس عدسة يشوف بيها ذكاء اللي حواليه..

ويتعلم منهم بالمشاهدة.. ويطلب مساعدة في الممارسة

في الذكاء اللي نفسه يتنمى فيه..

يالا بينا نلغي كلمة غباء من قاموسنا..

ونكتشف ذكاءنا وذكاءات غيرنا..

ونستمتع بالملاحظة والإكتشاف

انواع الذكاءات للي يحب يعرفها ٨ 

الذكاء الاجتماعي، الذكاء البصري (المكاني)، الذكاء الذاتي، الذكاء الحسي الحركي، الذكاء المنطقي (الرياضي)، الذكاء الحيوي (الطبيعي)، الذكاء اللغوي (اللفظي)، الذكاء الموسيقى.

ذال ذكاء..

موجود عندنا كلنا.. 

كل إنسان له بصمته من الذكاءات المتعددة.. اللي ربنا وهبها له علشان يسعى بيها.. وينفع بيها عيلته الكبيرة..

عيلة اسمها الإنسانية..

#من_الألف_للياء_٩_ذال

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت