ازاي الحشرات متقدمة اكتر من الإنسان؟

من سنين طويلة كنت بشتغل في مدرسة.. وفي يوم كنت بفتح باب فصل والباب مش راضي يفتح… 

فضلت احاول افتح الباب والباب معصلج.. 

كان بالصدفة معدي مدرس زميلي فرنساوي الجنسية.. 

وقف يتفرج أنا بعمل ايه.. وبعد ما جربت افتح الباب اكتر من مرة 

قال لي: "بستعجب ازاي الحشرات متقدمة اكتر من الإنسان؟" 

بصيت له بتعجب على استفهام.. 

قال لي :"لو تأملتي النملة هتلاقيها لما بتلاقي طريقها مسدود بتقررعلى طول تغير خط سيرها وتعدله وتشوف طريق تاني.. مش بتفضل تعافر في الطريق المسدود..الباب مش راضي يفتح.. وبدل ما تفكري في وسيلة مختلفة تفتحي بيها الباب، عمالة تكرري نفس الطريقة المسدودة، اللي مش نافعة.."

طبعًا اتكسفت يومها من تعليقه الساخر..

انما يومها علمني درس.. واتعلمته كويس..

درس بيبدأ بحرف الدال..

درس بيتوصف بيه النمل..

إن النمل دؤوب..

يومها استوعبت اني فيه طرق كتير كنت بلاقيها مسدودة..

وافضل اعافر معاها، بنفس الطريقة.. وفي الأخر اتعب واستسلم..

زي الرياضة كده..

احاول اروح الجيم بعد الشغل..

والاقي الموضوع مش ماشي ايأس..

احاول ابطل السكر الأبيض..

والاقي الموضوع مش سهل استسلم..

لحد ما استاذ الكس يومها علق التعليق ده..

يومها رجعت فكرت في النمل.. وبقيت اتأمله كل ما اشوفه.. 

واحيانًا احط حاجة عن قصد في طريقه واقف اتفرج ازاي بغير المسار.. 

وازاي لو حطيت حاجة تانية وتالتة ورابعة برضه هيفضل يغير المسار علشان يوصل..

ومن وقتها انبهرت.. واستوعبت مقولة كنت سمعتها من خبير قيادة عالمي اسمه روبين شارما كان بيقول فيها 

“You can change the plan, never the goal.” 

يعني غير الخطة، انما تمسك بالهدف.. 

من الوقت ده اتعلمت درس محوري..

اني مش كفاية اني اكون دؤوبة واشتغل بجد.. مهم كمان اني اصاحب الجد ده بالحكمة..

ولو الجهد مش جايب نتيجة اغير الخطة مش الهدف.. ومن يومها بقيت دؤوبة بشكل مختلف..

وطبعًا كل ما اجاي افتح باب ويعصلج معايا، افتكر مستر الكس والنمل الدؤوب..

دال دؤوب.. بحكمة… 

مش جهد على الفاضي.. جهد بتسديد… بحضور.. 

بنية.. باستعانة.. 

جهد لهدف يخدم الإنسان وينفع عيلته الكبيرة.. 

عيلة اسمها الإنسانية..

دال إنسان دؤوب..

#من_الألف_للياء_٨_دال

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت