حصاد الوباء اللي انت وأنا مش واخدين بالنا منه

من فترة روحت السينما مع زوجي العزيز.. دخلنا فيلم انجليزي.. 

بطل الفيلم في مشهد في بداية الفيلم كان بيكلم طليقته في الموبايل..

في المكالمة كررت عليه اكتر من مرة انه ضروري يحضر حفلة تخرج بنتهم.. ضروري يرجع من سفرية الشغل قبل الحفلة..

كررت الكلام وانهت المكالمة بكلمة بتبدأ بحرف الخاه.. كلمة بتوصف شعور.. الشعور ده بنتهم حسته مرارًا وتكرارًا قبل كده بسبب غياب باباها عن احداث كتير مهمة في حياتها… يا ترى عرفت كلمتنا؟

كلمتنا هي "خذلان"... 

يعني ايه الخذلان..؟

يعني تتوقع من ابوها يحضر تخرجها.. فيتأخر وما يحضرش،

يعني تتوقع ان اخوك يقف جنبك لما تمرض فتلاقيه فص ملح وداب..

يعني تتوقع من مديرك يديك مكافأة على تفانيك في شغلك او يتفهم احتياجك لأجازة مرضية فيخذلك..

خذلان ممكن يكون مادي.. او معنوي.. المهم انه خذلان.. 

بيعمل ايه فينا الشعور ده؟ 

بيسبب الم نفسي كبير.. بيخلي الإنسان يبطل يثق في الناس بسهولة.. ولو الوجع كبير ومن حد قريب بيبطل يثق في نفسه هو كمان.. 

شعور الخذلان بيسبب الم نفسي كبير.. زي الشرخ في النفس كده.. 

تخيل كده عمارة بصيت على جدارها لاقيت شرخ كبير وواضح.. تفهم انها عمارة ايه؟ عمارة مهزوزة.. متلصمة وممكن تقع في اي لحظة..

ده حالي وحالك.. وحال البنت اللي في الفيلم وحال بنات وولاد كتير..

حالنا واحنا اطفال مع اول حد خذلنا.. من أب رفض يمضي على ورقة امتحان علشان نقصنا درجة 

او أم وعدتنا تلعب معانا وخرجت واتأخرت لحد ما نمنا..

مواقف متراكمة في نفسية كل واحد فينا أتعرض فيها للخذلان..

والنتيجة هي الحصاد اللي بنحصده دلوقتي واحنا مش منتبهين..

انعدام الثقة بغيرنا.. او صعوبة الثقة بغيرنا..

وانعدام الثقة بنفسنا..

لما طفلة.. أو مراهق اهلهم بيشتكوا لي من ان ثقتهم بنفسهم ضعيفة..

ردي بيكون اخبار الخذلان ايه؟

كلمتنا النهاردة عن مجتمع، تفشى فيه الخذلان تفشي الوباء.. 

وبقى عادي اننا نخذل غيرنا..

كلمتنا النهاردة عن شعور.. اتألمنا بسببه سواء فاكرين مواقف الخذلان أو ناسيينها او عاملين نفسنا ناسيين..

كلمتنا عن وباء عايزين نستأصله من مجتمعنا..

بإن كل واحد فينا يبدأ بنفسه.. ويفكر كويس بيوعد مين بإيه.. ومين محتاج منه ايه..

بإننا لو وعدنا.. نوفي.. 

لو عندنا وظيفة.. نشتغل بإخلاص..

لو عندنا ولاد..نربي ولادنا ونحطهم اولوية.. ونشوفهم اكبر اثر هنسيبه للدنيا..

لو حد من اخواتنا مزنوق.. نقف جنبه

نعامل ربنا في الناس.. ونفتكر مرارة الخذلان.. واللي ما نحبش نستطعمه ما ندوقهوش لغيرنا..

ونفتكر ان رسولنا صلى الله عليه وسلم  قال : ( لا يؤمن أحدكم حتى يحب لأخيه ما يحب لنفسه ) 

تحب لنفسك الخذلان؟

نعمل ايه…؟ نعتذر للي خذلانهم قبل كده.. ونحط طاقتنا في بناء الثقة من جديد.. 

بناء الثقة حاجة مش سهلة.. إنما مستاهلة..

حرف الخاه.. لا للخذلان.. لا للتسبب في الم نفسي لغيرنا…

#من_الألف_للياء_٧_خاه

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت