حرف الحاه و6 أنواع مختلفة ... يا تري ايه النوع اللى عايش فيه دلوقتى؟

لو قلت لك "منى واحمد" ايه اول حاجة هتيجي في بالك؟

الف به.. ته.. ثه.. جيم..حاه..

كلمتنا المرة دي كلمة من حرفين.. اول حرف فيها حاه.. يا ترى عرفتها؟

كلمتنا هي كلمة "حب".. شعور انساني.. 

النهارده هتكلم عن ٦ انواع مختلفة من الحب..

ومعايا فكر كام واحد فيهم إنت عايشه، مستشعره في حياتك.. 

الحب الأول هو الحب الرومانسي.. 

الحب اللي كبرنا وكتير مننا فاكر انه هو ده الحب.. حب نور الشريف وبوسي في فيلم حبيبي دائما..

حب حالم، بدون مسؤوليات.. القلب فيه اللي سايق وبيخلي الإنسان يتصرف بدون منطق ولا تفكير في عواقب ولا تبعات..

الحب الثاني هو الحب الأبوي/الأموي..

 حب الأهل لولادهم.. حب فيه تعب ومشقة وتضحية.. فيه سهر وصرف وشوية وجع قلب لما ولادنا يتأخروا ولا حد يمرض.. حب ممكن نستبدله بكلمة عطاء.. لأن الأهل بالنسبة لهم حب ولادهم يعني عطاء لولادهم..حب احيانًا بيكون شديد.. حازم.. قاسي.. علشان مصلحة الولاد وانهم يطلعوا مرتبيين كويس ومش متدلعين..

الحب الثالث هو الحب في الله..

تحب حد كده بسبب انه انسان بيعمل خير.. بتشتركوا مع بعض في خير.. اطعام او تطوع.. وتلاقي نفسك بتحبه في الله.. تلاقي نفسك لما تفكر فيه تدعي له.. ولما تشوفه تبتسم وتفرح.. تتمنى له الخير من قلبك.. وتحس انكم تعرفوا بعض من سنين طويلة..

الحب الرابع هو حب الوطن..

تتحمق كده لما حد يجيب سيرة أم الدنيا.. وإنت تبقى مخنوق منها امبارح من الزحمة وارتفاع الأسعار و..و.. انما بلدي وبحبها واتمنى اعيش واموت على ارضها… حب يخليك تشتغل وتخدم وتحسن من نفسك.. ويخليك لو سافرت بره عايز تنجح في شغلك او رياضتك او دراستك علشان علمها يرفرف..

الحب الخامس هو حب الإيمان..

حب كده فيه ايثار.. الرسول عليه الصلاة والسلام قال: "لا يؤمن أحدكم حتى يحب لأخيه ما يحبه لنفسه..".. حب فيه نظرة لغيرك انهم زيك.. حب تتمني فيه لما تكسب ان غيرك كمان يكسب.. لأنك مؤمن.. انه انسان..انه اخوك.. انه مكسبه مكسبك وخسارته خسارتك..

الحب السادس هو الحب غير المشروط..

وده من وجهة نظري انقى انواع الحب.. واندرها..

حب بتحب فيه ابنك حتى وهو ماشي يناكف في اخواته الصغيرين وجايب درجات وحشة ومش بيسمع الكلام.. 

حب بتحبي فيه جوزك وهو عصبي وطلباته كتير وما بتخلص..وشراباته مترمية على الأرض في البيت كله..

حب بتحب فيه والدتك وهي مشغولة عنك باختك اللي بتتجهز او اخوك اللي عنده تمارين وبطولات ما بتخلصش..

حب بتحب فيه صاحبك اللي كل مرة يتأخر على ميعادكم ساعة.. وانت عارف اني دي احسن حاجة يقدر عليها.. 

حب فيه سلام.. فيه مساحة.. فيه تسامح.. فيه تراحم.. فيه قبول واحترام وتقدير..

حب فيه طاقة حلوة..

حب بدون خلص طبقك علشان احبك.. ولا اسمع الكلام علشان احبك.. ولا لو صليتي النوافل هحبك اكتر.. ولا لو دخلت طب حبي لك هيزيد..

حب انسان لإنسان بغض النظر عن الأدوار او الألقاب او الرتب او الطبقات.. حب وبس..

حب يملا المحبوب أمان.. سلام.. رضا.. امتنان.. تقدير..

حب يحس معاه إنه الف إنسان.. محبوب علشان كونه انسان مجرد من كل شروط او احكام او معايير او قيود او طلبات او تكليفات..

الف انسان.. بيسعى.. بينشر حب غير مشروط بين اخواته في عيلة كبيرة اسمها الإنسانية..

#من_الألف_للياء_٦_حاه

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعتش