الإنتحار

وانا طفلة كنت بشوف أفلام عربي فيها البنت عايزة تنتحر علشان أهلها رافضين انها ترتبط بالشخص اللي بتحبه..

كبرت وانا متخيلة ان ده السبب من ان الناس تفكر تنتحر..كنوع من أنواع الضغط على الأهل..علشان يوافقوا على اللي هما عايزينه..

وطبعا لما كبرت اكتر فهمت ان فيه أسباب حقيقية ممكن تخلي الإنسان بجد عايز ينتحر.. مش بيمثل علشان يضغط على أهله..

من كام سنة تواصلت معايا جدة.. وحكت لي عن حفيدتها.. اللي اتكلمت معاها وقالت لها انها مش قادرة تستحمل صوت خناق ابوها وامها كل يوم بالليل.. وأنهم بيفضلوا ساعات طويلة يتخانقوا لدرجة انها مش بتعرف تنام.. وإنها عايزة تنتحر..

الجدة كانت مفزوعة، استشارتني وطلبت منها تتكلم مع الام وتبلغها.. وبعدها رجعت لي وقالت ان الام والأب اتفقوا يتخانقوا الصبح بعد ما البنت تنزل المدرسة

طبعا اتصدمت.. بدل ما يفكروا يحلوا المشاكل اللي بينهم، ويستوعبوا تأثير الخناق في البيت على اولادهم، مستمرين وكأن ربنا ما بعتلهمش جرس إنذار برغبة البنت في الإنتحار..

وانا بدرس ارشاد اسري، في محاضرة من المحاضرات الدكتورة كانت بتتكلم على ٣ كوارث موجودة في كل البيوت المصرية (طبعا مش بحب التعميم إنما الدكتورة قالت كده) وكارثة منهم هي الخناق بين الأهل.. وان تأثيره سلبي جدا على نمو ونفسية الأطفال..

من كام سنة ام بعتت لي بنتها اعمل لها كوتشينج، كانت الام بتشتكي من ان البنت عندها لا مبالاة وبترد بعنف وعصبية.

لما اتكلمت مع البنت في الجلسة قالت انها بتتصرف كده لما يعاقبوها، سألتها عن نوع العقاب قالت بيكون الحرمان من الموبايل.. سألتها ليه الموبايل مهم بالنسبة لك كده؟

توقعت انها تقول بتكلم مع أصحابي او بدخل على السوشيال ميديا.. او بلعب عليه..لاقيتها بتقول علشان الأغاني.. مش بستحمل صوت خناقهم العالي، فبلبس السماعات وأشغل أغاني. لما بياخدوا الموبايل بضطر اسمع صوت خناقهم!

وطبعا النتيجة ان البنت ترد بعنف وعصبية..

في الدراسة أكدت الدكتورة ان مشكلة كبيرة في تصرفات الأهل هي تركيزهم على السلوك مش أسباب السلوك.

وان السلوك هيتحسن لو السبب وقف.

يعني مثلا البنت هتبطل ترد بعنف او تتصرف بلامبالاة.

مع دراستي كمان الإرشاد النفسي مع دكتورة ابتسام ربيع، كان علينا نقرأ كتاب بعنوان "معنى الحياة". الكتاب تطرق إلى التربية ونشأة الأطفال والتعامل بين الأب والام وتأثيره على الأطفال.

وشرح ازاي ممكن الام المستقوية اللي جوزها ضعيف قدامها، ممكن يخلي الولد لما يكبر مش عايز يتجوز..لأنه مش عايز ست تعلي صوتها عليه وتستضعفه زي ما أمه بتعمل مع أبوه؟

طيب والبنات؟
شرح ان البنت لما بتشوف أبوها بيستضعف أمها، وبيهينها او يشتمها او يمد ايده عليها، بتتعقد من الجواز والرجالة..

وبتطلع مش عايزة تتجوز.. ولو حصل واتضعط عليها علشان تتجوز للأسف بتسمح لجوزها انه يهينها ويتلفظ.. ما هي أمها كانت كده وده اللي شافته من أبوها لامها (طبعا أنا ضد التعتيم لان لكل قاعدة استثناء).

خلاصة القول:
تصرفات مدمرة. أهل بيتخانقوا بصوت عالي لدرجة ان الولاد تصاب بالأرق وتفكر في الإنتحار.

ام مسترجلة ورجل اياً كان السبب قابل ان مراته تستضعفه وكمان قدام أولاده،

وأب مستقوي وبيعامل الام معاملة سيئة قدام الولاد.

تصرفات مدمرة، بسأل نفسي جبناها منين؟
من ديننا؟
الدين اللي فيه الست من القوارير؟
اللي فيه اتعلمت ان خيركم خيركم لاهله؟
اللي فيه الرجل له القوامة؟

ازاي سمحنا للزواج يتحول إلى شبح مخيف في عقول اولادنا؟
ازاي تحول مكان السكن والمودة والرحمة إلى ساحة معركة وتحول الولاد لأسرى عايزة تنتحر او تنفصل عن العالم بسماعات وموسيقى؟
رايحين على فين يا مجتمع؟

افيقوا يرحمكم الله

البيت، كفانا فيه تصرفات مدمرة..

ياللا نربي ولادنا بلطف ونتصرف معاهم وقدامهم باحترام لمشاعرهم ونفسيتهم

انتظروني كل خميس مع مقالة جديدة من
#تصرفات_مدمرة_١٠

#تصرفات_مدمرة_١٠