العلاقة ما بين الأمان والحرمان

وانا في ثانوي اخترت ادخل علمي..

الجغرافيا والتاريخ والفلسفة وعلم النفس كانوا بالنسبة دي مواد كلها حفظ.. وبالتالي رفضت ادهل ادبي، بالرغم من ان هدفي كان اني ادخل كلية الإعلام.

بعد ما اتخرجت من إعلام واشتغلت في التربية والتعليم لاقتني عايزة فعلا افهم طلابي..

وبعد شوية عايزة أتعلم اربي ولادي كويس..

وبدأت اقرأ كتب في المجالات دي..

وجوابا عطش لدراسة علم النفس.. وعلم السلوك..

لحد ما وعدتني ان من الخمسين للستين ادرس علشان افهم غيري وأقدر أساعدهم بطريقة افضل..

واحنا في محاضرة من المحاضرات مع دكتور ابتسام ربيع، كان موضوعها علم النفس التطوري، واحدة من النظريات كانت بتتكلم عن اللعب. أهمية اللعب للأطفال ولنموهم النفسي.

بعد المحاضرة كان عندنا مجموعة مشاركة،

شاركت فيها ازاي والذي كان اللعب مش موجود في قاموسه. كطفلة مش بس ممنوع اللعب لا كمان ممنوع شراء الألعاب. وبالتالي كانت الألعاب المعدودة اللي عندي كانت هدايا من العيلة او من أصحابي بعد ما كبرت شوية.

اماً أمي فكانت بتسمح لي باللعب إنما بشروط..

أولها اني اخلص كل الواجبات المدرسية، مفيش اي راحة ولا لعب غير لما اخلص..

وثانيها اني اخلص المهام الشخصية، أروق أوضتي، اوضب شنطة المدرسة، استحمى..

وثالثها ان وقت اللعب محدود.. مفيش وقت مفتوح له..

لما أخدنا المحاضرة واتكلمت في المجموعة، شاركت إزاي أنا نفسي بحط قيود لنفسي على الترفيه او المرح او اللعب..

وإزاي بجد صعوبة اني اخد راحة في وسط الشغل،

وان فيه خناقة داخلية متكررة، جزء مني بيطلب راحة او ترفيه اكتر، وجزء دايما بيصر اني اخلص الرياضة والشغل والقراءة والمهام المنزلية والمشاوير وكل حاجة وأي حاجة قبل اي فسحة او ترفيه..

فيه ناس هتشوف ان ده عادي، لا ده كمان هايل..

لا.. للأسف لا عادي ولا هايل..

لما درست عن العقل والإبداع وعن التوازن النفسي، اتعلمت ان الراحة والترفيه واللعب مهمين جدا لنمو الانسان النفسي، وان إبداعه ومهارات التفكير عنده بتنمو من اللعب والترفيه..(بالإضافة لحاجات تانية)..

حرمان أطفالنا من اللعب لص من لصوص العلاقات..

مرة كان بيحضر معايا مراهق برنامج بقدمه،

وتالت يوم لاقيته حزين جدا غير اليومين اللي قبله..

سألته ماله؟ رد قال لي اصلي راجع المدرسة بكرة، ولحد آخر السنة هتمنع من اللعب والخروج مع أصحابي. مسموح لي بس في الاجازات الصيفية او اجازة نص السنة اني العب او اخرج. طول الدراسة ممنوع.

طيب ونظريات النمو النفسي اللي بتقول ان الأطفال بينموا من خلال اللعب وأنه أساسي لهم؟

طيب وفنلندا اللي رقم ١ على العالم في التعليم اللي حولت اول ٦ سنين في التعليم للعب ولعب بس؟ 

يعني حرمان الطفل من اللعب تصرف مدمر ولصّ من لصوص العلاقات..

لان أساس اي علاقة الشعور بالأمان مش الشعور بالحرمان..

ولما بنحرم الأطفال من حقهم في اللعب، بيوصل لهم ان القائم على التربية مصدر حرمان مش مصدر أمان..

تبقى العلاقة أخبارها ايه؟ 

كفاية حرمان لاطفالنا من حقهم في اللعب..

وكفاية حرمان نفسنا من حقنا في الراحة والاستراحة واللعب والترفيه..

كل حد فينا طفل داخلي عنده احتياجات..

لو اتحرم زمان، مسؤوليتنا احنا تجاهه أننا نوفي احتياجاته مش نستمر في حرمانه..

ياللا نحسن علاقتنا بنفسنا وباولادنا واهلنا..

المجتمع بيقوم لما الأسرة بتقوم..

والأسرة بتقوم لما الفرد، هو نفسه يطيب..

تابعوني كل خميس بإذن الله مع مقالة جديدة و

#تصرفات_مدمرة_٨