ازاي بنحول ولادنا لمجرمين بدون قصد

اول مرة قدمت كورس في الكتابة العلاجية 

واحدة من المشتركات سألتني بعمل ايه في الJournals بتاعتي..

قلت لها بحطهم في مكتبتي..

قالت لي مش بتخافي حد يشوفهم؟ يفتحهم ويقرأهم؟

قلت لأ.. احنا كعيلة الإحترام واحدة من القيم بتاعتنا..

ومن ضمن الإحترام احترام الخصوصية..

محدش فينا عمره بيفتح درج حد ولا شنطة حد ولا كراسات حد..

كلنا بنحترم خصوصية بعض.. وبنثق في بعض.

وطبعًا خلينا نحط تحت كلمة الثقة دي مليون خط..

كلامها خلاني ارجع لورا سنين طويلة.. قبل زواجي..

وافتكرت ازاي امي من حرصها علي كانت بتفنش في حاجتي..

حب واهتمام وحرص وخوف علي..

انما كان تصرف مدمر..

تصرف كان بيوصل لي منه ان امي مش واثقة فيا..

وتصرف كان بيوصل لي منه اني مش محل ثقة..

وتصرف كان بيوصل لي منه اني محل اتهام..

وتصرف كان بيخليني افكر كويس 

ايه ممكن يخلق مشكلة بيني وبين امي واخبيه كويس 

علشان لما تفتش ما تلاقيهوش..

التفتيش ما خلانيش امشي اصح..

ولا خلى علاقتي بأمي اقرب..

تصرف عفوي من ام متفانية لتربية بناتها..

استقالت من شغلها وسابت الماجستير علشان تربي بناتها..

انما تصرف مدمر..

لما اتجوزت قررت ان عمري ما افتش ورا جوزي..

لأن تفتيش امي في حاجتي كان بيضايقني..

ولما خلفت برضه قررت اني اتكلم معاهم على الثقة..

واتعامل معاهم بثقة..

واحترم خصوصيتهم..

وانا بدرس ارشاد نفسي مع دكتورة ابتسام ربيع،

كان فيه محاضرة عن الحدود..

وتطرقت فيها لموضوع احترام الخصوصية..

وواحدة سألتها لو التفتيش من باب الحرص على ولادها وانها تتطمن..

قالت لها برضه، "ولا تجسسوا".. حتى علي الولاد ده يعتبر تجسس..

الأم سألتها "طيب لو هما عارفين اني هفتح الموبايل واشوف؟"

قالت لها لازم بإذن منهم..

وانا داخليًا عارفة.. ان الإذن منهم معناه:

١- هنكون حريصين وهنمسح اي حاجة من علي الموبايل 

٢- أمنا مش واثقة فينا

٣- احنا مش اهل للثقة

انا قارئة نهمة..

في كتاب قريته زمان (للأسف مش فاكرة اسمه)

كان بيقول ان الإنسان بيتحول للحاجة اللي اهله بيشوفوه بيها..

بيشوفوه مش متربي، خاين، مش تمام..

بيتحول لكده..

بيشوفوه محترم، اهل للثقة، امين..

بيتحول لكده..

طيب والزوج والزوجة؟

من باب اولى.. 

اللي فينا شاف فيلم البعض يذهب للمأذون مرتين..

ومرفت امين اللي كانت بتشك في نور الشريف (زوجها)..

لحد ما زهق من شكها وهو مخلص، فقرر يخونها..

التفتيش عمره ما يعلم الإنسان الأمانة..

في كتاب "معنى الحياة" المؤلف شرح ازاي لما الإنسان بيتقفش، 

مش بيندم على الفعل الغلط..

بيندم انه ما كانش حريص كفاية لدرجة انه اتقفش..

ومش بيقرر يوقف الفعل الغلط..

بيقرر يكون اكثر حرصًا…

طيب نعمل ايه؟

نستعيذ بالله من الشيطان اللي بيوقع بين افراد الأسرة وبيزرع الشك بينهم..

ونبدأ صفحة جديدة عنوانها الثقة…

ولو الثقة مهزوزة بينا وبين اقرب الناس لينا..

نعمل حاجة اسمها
Restoring the trust 

يعني اعادة بناء الثقة..

ومن اجمل ما قرأته فيها كتاب
The speed of trust
لستيفن كوفي..

قدم فيه ١٣ حاجة تعيد الثقة بين الناس..

خلينا نعمل وقفة مع نفسنا ونسأل 

هل تعاملاتما مع اقرب الناس لنا بتخليهم احرص على التخبية..

ولا بتخلينا اقرب لبعض والثقة بينا اكبر..

ياللا نفكر ونختار تصرفات بناءة..

مع اقرب الناس لنا..

انتظروني كل خميس مع مقالة جديدة من 

#تصرفات_مدمرة_١٢