الأم اللي سببت صدمة لبنتها

مكالمة صدمتني.. 

من أم لبنت في سن المراهقة..

الأم طلبت تكلمني ضروري..

وفي المكالمة قالت لي ان بنتها رافضة تمامًا تيجي البرنامج اللي بقدمه للمراهقين..

وان هي ضغطت عليها علشان تحضر..

وان البنت ما وافقتش الا لما هي وعدتها انها تجيب لها كلب..

قلت للأم "وطبعًا هتجيب لها الكلب بعد البرنامج"

ردت بتلقائية وقالت "لأ طبعًا"

قلت لها "بس انتي وعدتيها"

قالت لي "اهو اي كلام بس عشان ترضى تروح لك"

طبعًا الحوار صدمني..!

والصدمة الأكبر كانت الأم اللي سدت ودانها تمامًا 

عن الكلام اللي قلته لها عن تأثير عدم الوفاء بالوعد على علاقتها ببنتها..

مش بس علاقتهم ببعض..

عن الworldview بتاع البنت..

يعني نظرتها للدنيا..

لو امها بتوعد وتخلف..

بتقول كلام مش حقيقي..

ما بالك بباقي العالم..

وتكبر البنت ورؤيتها تبقى ان العالم مكان غير آمن وان الناس مخادعة..

وتنمو عندها أزمة ثقة بالآخرين..

ومع الوقت تكبر الأزمة وتتحول لأزمة ثقة مع زملاء العمل ومع الأصدقاء…

ومع شريك الحياة..

والبداية كانت أم بتوعد وعد وهي مش مدركة تأثير عدم الوفاء بالوعد ده ايه..

لما اتجوزت زوجي العزيز حكى لي عن والده..

وازاي عمره ما خلف وعده معاه..

لو قال له هننزل يوم كذا نجيب العجلة،

كان بينزل يجيب العجلة..

والنتيجة؟

النتيجة ان زوجي العزيز تحول الى انسان متربي على الوفاء بالوعد…

ومعانا، أسرته، وفي شغله؟ بقى ده منهجه..

لو وعد، بفضل الله بيوفي..

لأنه اتربى وشاف ده من والده..

واستوعب تأثير الوفاء بالوعد عليه وعلى نفسيته..

ولاحظ تأثير عدم الوفاء بالوعد على نفسية أصحابه…

طبعًا البنت اللي والدتها بعتتها جات حضرت معايا..

وعمري ما شفتها تاني..

تجربة الحضور معايا تحولت الى تجربة مريرة..

بدأت بوعد من الأم،

وانتهت بأن الأم خلفت الوعد..

تخيلوا لو كان العكس حصل..

والأم وفت بالوعد،

كانت البنت هتربط بين حضورها وبين ان والدتها جابت لها الكلب..

وعقلها يربط بين حضور الدورات والتجارب الجديدة وبين السعادة (زي ما الكلب اسعدها)..

وقدام تلاقيها مقبلة على حضور دورات وتنمية نفسها وتعلم حاجات جديدة..

العقل بيعمل حاجة اسمها associations ارتباطات بين الأحداث والأشياء..

بنت زي دي. عقلها عمل ربط بين حضور ورشة وبين الخذلان..

هل الأم كانت تقصد ده؟ لأ طبعًا..

تصرف مدمر..

مش بس في لحظته..

التدمير بتاعه مستمر لسنين طويلة..

والحل؟ 

التصحيح..

من خلال الاعتذار عن عدم الوفاء بالوعد

اتمام الاتفاق.. مهما كان عدى من وقت..

يعني الأم دي، لو عايزة تصحح الخطأ تقدر..

تعتذر لبنتها وتجيب لها الكلب..

غير كده يبقى تصرف مدمر..

خلينا نراجع وعودنا مع غيرنا..

وخصوصًا مع اقرب الناس لنا..

ونصحح اللي فات..

ونتخلص من الفكرة السطحية بتاعت "اللي فات مات"

اللي فات بيتسجل وبيتحفر..

والمعالج النفسي اكبر شاهد..

ياللا نبدأ سنة جديدة بتصرفات افضل وعلاقات اقرب..

كل سنة واحنا طيبين..

انتظروني كل خميس مع مقالة جديدة من 

#تصرفات_مدمرة_١٣