شهر في امريكا عمل فينا ايه

مهما كبرنا بنفضل نتعلم من اهلنا..

بالذات من امهاتنا..

من وانا في ثانوي وبيت الشعر "الأم مدرسة "

بيتردد في عقلي..

ايقنت ان الأم فعلًا مدرسة..

انما هل كل المدارس مدارس كويسة؟

وانا في ثانوي والدي الله يرحمه مرض..

ودخل العناية المركزة..

وفضل يدخل ويخرج..

ومع كل وعكة امي جنبه..

وبعد سنين، وانا في الجامعة، مرضه استدعى انه يسافر يتعالج بره مصر..

امي اخدتنا انا واختي الصغيرة معاهم على امريكا..

قضينا هناك شهر تقريبًا..

كل يوم اتوبيس المستشفى ياخدنا المول، نقضي اليوم اختي وانا ونرجع بالاتوبيس بالليل..

وامي طول اليوم في المستشفى مع والدي..

هناك دوقت معنى الغربة، وكنت بعد الأيام علشان نرجع مصر..

وبعد شهر، رجعنا على مصر علشان الدراسة وأمي فضلت معاه..

ومرت شهور وامي في خدمته..

رجعوا مصر، ورفض يجيب ممرضة او ممرض في البيت..

وامي فضلت تخدمه..

وكل ما نقول لها هاتي حد يساعدك، تقول هو مش عايز 

وجوزي مش ههينه ولا هجرح كرامته وهو مريض، وبعد ما كبر..

على مدار سنين فضلت امي حاطة والدي المريض اولوية..

وبعد رحليه، اللي يشوف صورها قبل وبعد مرضه يقول كبرت ٢٠ ولا ٣٠ سنة..

تصرفات مدمرة، بعض الناس بيعملوها،

وهي تجاهل المريض مع المرض..

او اهانته.. او جرح كرامته..

ايا كان سنه او علاقتهم بيه..

المريض وقت مرضه بيكون في حالة ضعف نفسي..

مهم بالإضافة للعلاج البدني، اننا نهتم بنفسيته كمان..

ولأن امي ست اصيلة، رفضت تجيب حد يساعد..

بالرغم من ان دكتورها قال لها ان المجهود اللي بتعمله خطر على صحتها.

انما هي كان عندها مبادئ مش هتتخلى عنها.

يا ترى احنا بنتصرف وفقًا لمبادىء ولا على حسب مزاجنا؟

تصرف مدمر نفسيًا ان الإنسان يكون مريض واهله يتجاهلوه..

صحيح ممكن نعين حد بأجر..

انما لما بيكون اللي بيخدمه من اهله بيكون لها وقع تاني..

ونفسيته بتتحسن وبتأثر على مرضه..

لما اصيبت بمشكلة في صوتي،

زوجي ربنا يجازيه عني خير فضل يروح معايا جلسات علشان صوتي يطيب..

ولما مرضت بالصفرا، امي فضلت تزورني يوميًا علشان ما اعملش مجهود واطيب..

تصرفات عمري ما بنساها.. اتحفرت في قلبي.. 

خلينا نتصرف تصرفات بناءة مع احب الناس لنا، بالذات في وقت المرض..

وقت الضعف البدني والنفسي..

ونفتكر قول رسولنا الكريم عليه الصلاة والسلام: "لا يؤمن أحدكم حتى يحب لأخيه ما يحبه لنفسه."

كام ام بتسيب طفل مريض لدادة وتنزل؟

كام ست بتسيب زوج مريض وتخرج؟

وكام طفل بيتفرج وبيتعلم عن الوفاء والإخلاص والبر والمودة والرحمة..

خلينا نعيد ترتيب اولوياتنا..

ونستوعب ان تصرفاتنا بتأثر على افكار ومعتقدات ومشاعر وسلوكيات اللي حوالينا..

وعلى نظرتهم للعالم وعن معتقداتهم عن مفهوم الأسرة والعلافات..

وكفاية تصرفات مدمرة..

ياللا نهتم باحب الناس لنا، ونرعاهم من قلبنا، بصبر وحب واحتواء، 

وتجديد نية..

انتظروني كل خميس مع مقالة جديدة من 

#تصرفات_مدمرة_١٥