ازاي مديرتي اقنعتي انفذ طلبها بمنتهى الذكاء

مرة في يوم حر كنت قاعدة في الجنينة بتاعت بيتنا..

وبالرغم من الحر، الا ان القعدة في الضلة، ومع نسمة هواء حلوة كنت مش حاسة بالحر..

اخدت نفس عميق وأنا بحمد ربنا على الظل والنسمة والزرع اللي بيتمايل بالرغم من الحر..

ولاقتني مع النفس ومشهد الزرع اتنقلت لمكان تاني على بعد اكتر من ٥٠٠ كيلو..

لاقتني في شرم الشيخ، في اجازة مع عيلتي.. يومها كنت في مشهد شبه المشهد اللي كنت فيه في الحاضر..

في جنينة والجو حر ونسمة الهوا والزرع بتمايل.. وأنا بحمد ربنا..

دققت في المشهد اللي كان من كام سنة لاقتني كنت قاعدة قدام تابليت..

وكنت بتفرج على كورس لمتحدثة امريكية مشهورة جدًا وملهمة جدًا بالنسبة لي اسمها ليزا نيكولز..

لاقتني وقتها كنت في ٢٠١٧ وكنت باخد كورس اونلاين..

وكنت لسه هستقيل..

ابتسمت وافتكرت المديرة وطلبها اللي حكيت لكم عليه المرة اللي فاتت..

لما طلبت مني طلب.. وأنا قلت لها لا ممكن.. أنا؟؟! لأ.. مش ممكن..

المديرة يومها عرفت تدخلي ازاي.. وعرفت تقنعني..

المديرة طلبت مني اني اسجل اول كورس قدمته بعد الإستقالة واقدمه اونلاين..

وأنا كان ردي اني لأ.. مش بحب.. اونلاين ازاي؟ 

واحطه فين واعلن عنه ازاي؟ وايه كل التفاصيل دي اللي مش فاهمة اولها من اخرها..

وهتدبسيني فيها ليه؟

أنا بحب اقدم ورش بحضور فعلي وماليش في الاونلاين المسجل ده..

المديرة يومها (اللي هي أنا برضه) ورتني رسالة على الفيسبوك من واحدة من متابعين صفحتي..

كانت كاتبة فيها انها نفسها جدًا تحضر الكورس، وانها سألت فعلًا، انما لأنها عندها طفل رضيع مش نافع تحضر..

وأنها سألت وبلغناها ان ممنوع اصطحاب الأطفال.. وانها بتتمنى اني اقدمه اونلاين..

الأم صعبت عليا.. إنما قلت للمديرة لأ.. مش عايزة..

قالت لي طيب شوفي..

وورتني تعليق من واحدة تانية من محافظة بعيد..

وقالت لي بصي شوفي كاتبة ايه؟

لاقتها بترجوني اسجل الكورس اونلاين.. لأنها مش نافع تسافر وفقًا لتقاليد وعرف عيلتها..

ونفسها تتعلم..  اتأثرت.. ولاقتني بفكر..

وقلت للمديرة اديني وقت افكر..

اخدت نفسي وروحت قعدت في جنينة مفضلة ليا.. 

بقدر اهدي عقلي فيها وافكر بعمق واسمع لصوت الحكمة..

والصوت قالي انت تقدري يا ايمان..

فكرة ازاي ليزا سجلت كورس اونلاين.. وقعدتي في شرم الشيخ تتعلمي منها..

لو كانت رفضت تقدم اونلاين كان زمانك ما وصلكيش الفايدة منها..

طيب فاكرة روبين شارما؟ وازاي اخدتي معاه كورسات اونلاين؟

ياللا يا ايمان، انت تقدري..

وقد كان.. رجعت من الجنينة وفتحت كراستي وبدأت اكتب محتاجة اعمل ايه علشان اسجل كورس اونلاين..

وبدأت اسأل في دوايري مين ممكن يسجل لي الكورس..

وبدأت اتواصل مع الأسماء اللي وصلتني واقارن عرض كل حد فيهم..

وتعليقات الناس اللي رشحتهم ايه..

وبعد كام يوم قعدت مع المديرة واتفقت معاها اني هسجل الكورس اونلاين..

وفي ٢٠١٨ بقى عنى اول كورس اونلاين بقدمه..

كان عندي ٤٢ سنة وكام شهر..

وبعد ما شعري شاب..

اتعلمت ازاي اقدم كورس..

وازاي احضر المادة المكتوبة له..

وازاي اتابع المشتركين على منصة الكورس..

وازاي اعمل اعلانات في محافظات..

ولاقتني تاني بفكر ازاي الإنسان كائن قابل للتعلم..

حتى بعد ما شعره شاب..

بالذات بعد ما شعره شاب..

وبقى عنده نضج وحكمة..

وبقت مسؤولياته في الحياة أقل من التلاتينات والعشرينات..

ولاقتني مع الوصول للمحافظات بقيت افكر في القارات..

وبحلم برنامجي يدخل دول تانية، مش بس محافظات تانية..

والحلم كبر.. ولاقتني بفكر في اهم اولوية ليا..

وازاي ممكن تساعدني اعيش الحلم الكبير..

ولاقتني بفكر اني محتاجة مساعدة محورية..

من حد متخصص..

علشان حلم العالمية..

ايه المساعدة..؟ ومين فاكر كانت ايه الأولوية؟

تابعوني مع 

#بعد_ما_شاب_١٣

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة