اللي يتخاف منه اكتر من الخوف؟

هل فيه حاجة نخاف منها اكتر من الخوف نفسه؟

سؤال وجودي كده..

سؤال "هل فيه حاجة نخاف منها اكتر من الخوف نفسه؟"

ايوه.. من موقعي هذا، وبعد ما شعري شاب 

اقدر اقول لكم ان فيه

نخاف من انكار الخوف..

ونخاف من عدم التعبير عن الخوف…

نخاف من الحبسة في سجن الخوف..

نخاف اننا نقضي حياتنا مربوطين بسلاسل خوف..

ونوصل للفصل الأخير من عمرنا ونقول ياخسارة

عشت جبانة.. اسيرة للخوف..

دي فعلًا المخاوف الحقيقة اللي محتاجين نخاف منها..

مش الخوف من تجربة او مشروع او مبادرة..

خلينا نخاف صح.. 

بعد ما شعري شاب انتباني خوف كبير

مع خطوة كنت عايزة اخدها..

وفضلت اقدم رجل واخر رجل..

بعد ما حققت حلم كتابة روايتي الأولى، وعملت قناة يوتيوب واتعلمت سواقة موتوسيكلات.. 

وبعد ما قدمت
TED Talk
ثقتي في قدراتي زادت جدًا.. وبقيت مؤمنة إن الأحلام بتحقق..

وصدقت اني اقدر.. اقدر احلم واقدر اتحرك واقدر احقق اللي اتمناه..

بمساعدة ربنا والجنود اللي بيحطها في طريقي..

وبالرغم من اني صدقت حلمي، الا ان الخوف وقف زي الجبل الكبير في طريقي..

لحد ما استوعبت اني محتاجة اخاف من الخوف نفسه.. لأنه العائق الحقيقي قصاد تحقيق احلامي واهدافي..

وقررت.. قررت اني اعبر عن خوفي.. 

كلمت صديقة عزيزة ليا.. كان لها حلم وحققته.. والخوف ماوقفهاش زيي…

قلت لها أنا خايفة.. خايفة استقيل.. خايف اسيب شغلي…

خايفة ابدأ شغل جديد.. خايفة اشتغل شغل حر..

خايفة..

يومها زعقت فيا بصوت عالي..

وقالت لي الدنيا اكبر بكتير من المكان اللي بتشتغلي فيه..

وقالت لي
The Sky is the limit 

وكأن صوتها والزعيق ده كان مفتاح سجن الخوف..

صوتها حررني.. غيري حاجة في فكري.. الهمني، هزني، زلزلني..

وقررت استقيل..

وبدأت اسلم شغلي لزمايلي اللي هيمسكوه من بعدي.. 

وجاء يوم التوقيع على قرار الإستقالة..

وسألوني فعلًا هتمضي وتقفلي ملف التأمينات.. طيب ما تسيبي الباب متوارب، علشان لو فكرتي ترجعي..

يومها افتكرت صوت حد ملهم ليا.. كان بيقول لما تاخد قرار احرق الجسور علشان مايكونش فيه خط راجعة.. 

كان بيقول
Burn the bridges..
ويومها مضيت قرار الإستقالة.. وانا خايفة.. انما يومها ماكونتش خايفة من الخوف..

ولا كان حابسني في زنزانة..

كنت خايفة من التغيير ومن التحديات اللي ممكن تواجهني..

كنت خايفة من الغربة بعيد عن زمايلي وطلابي… اللي كانوا زي عيلتي التانية..

يومها كنت خايفة.. انما مش من الخوف..

وبعد ما شعري شاب، اخدت اكتر قرار كنت خايفة اخده في حياتي..

وبعد القرار ده.. لاقتني داخلة حقبة جديدة.. 

محتاجة مني امارس فن.. 

وقبل ما امارسه، اتعلمه.. 

ايه الفن؟ واتعلمته ازاي؟

تابعوني المرة الجاية مع بعد ما شاب 

#بعد_ما_شاب_٩

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة