يعنى هي جات عليا؟

اما اجرب.. يعني هي جات عليا أنا..

صوت… صوت لاقيته جوايا بعد ما بدأت اسوق ال Vespa

وكأن الصوت ده اذاعة جديدة فتحت في عقلي..

إذاعة مش اذاعة نجوم اف ام ولا إذاعة الشرق الأوسط 

إذاعة بعد ما شاب قال يجرب..

كنت كل اسبوع بوصل بنتي ملك مركز فني تتعلم فيه تعزف على الDrums 

اوصلها واقعد الف في المحلات اللي قريبة من المركز لحد ما هي تخلص..

لحد ما مرة قلت طيب ما اجرب أنا كمان اتعلم..ايه المانع؟

دخلت سألت عن الدروس اللي بيقدموها.. لاقيت حاجات موسيقية وحاجات فنية..

بعد شوية تفكير اختارت اتعلم رسم.. سجلت بياناتي واخترت نفس ميعاد درس ملك واتفقت معاهم اني ابدأ الأسبوع اللي بعده..

مرت الأيام وروحت ميعاد الدرس..

المُدَرسة كانت بنت اصغر مني بقرب العشرين سنة..

حطت لي زهرية على الترابيزة وطلبت مني ارسمها.. 

فضلت اشخبط وامسح واعيد.. وهي تصحح لي..

لحد ما الحصة خلصت.. والمُدَرسة بلغتني بالواجب المطلوب للمرة اللي بعدها..

رجعت البيت وانا حاسة اني مرهقة.. مستنزفة..

حطيت كراسة الرسم في مكان بعيد عن عيني.. 

ومرت ايام وانا بهرب من الكراسة.. لحد ما وصلت لليلة الحصة التانية..

قعدت، حبستني وعملت الواجب..

وروحت اليوم اللي بعده وانا ممتعضة..

دخلت الحصة وبدأت الرسم تاني.. ومر الوقت بشويش..

وخلصت.. ورجعت كررت نفس اللي حصل الأسبوع اللي قبله..

ومشيت على نفس الوتيرة لحد ما الأربع حصص خلصوا..

وكان نفسي يومها اعزف مزيكة حسب الله اني خلصت..

بعد الكورس قعدت معايا وسألتني اخبار التجربة ايه؟

لاقتني عرفت حاجات عني.. 

اني مش بحب الرسم.. بقَّدر الفن.. والفنانين..

انما مش بحب ارسم بنفسي.. ولا احب اقعد جنب حد وهو بيرسم..

ولا بحب اتعلم من ناس بتعمل شغلها علشان دي وظيفة بتجيب منها دخل..

فهمت اني محتاجة اختار كويس هتعلم من مين.. مش بس اختار هتعلم ايه.. ولا امتى وفين..

بعد الكورس شلت كراسة الرسم بالزهريات اللي فيها والشخبطة..

والصفحات اللي فيها تقدم، إنما بدون متعة ولا شغف..

شلتها في كرتونة بعيد في مكان تخزين..

وعرفت من التجربة دي اني بحب اتعلم، وعندي التزام لما بشترك في حاجة،

وفكرة اني اشترك في كورس في نفس وقت كورس بنتي مناسب جدًا لظروفي..

بعدها قلت لي.. يعني اجرب، هنخسر ايه..

وجربت حاجة تانية.. والمرة دي كانت تجربة مش زي اي تجربة..

تجربة خلتني اعمل نقطة ومن أول السطر..

وابدأ فصل جديد من حياتي....

ايه التجربة وايه الفصل؟

تابعوني المرة الجاية مع 

#بعد_ما_شاب_٣

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة