ازاي تعاملت مع الصدمة بعد زيارة الدكتور
الحياة بقى لونها بمبي..
اغنية من الاغاني اللي كنت بحبها جدًا في الطفولة..
سعاد حسنى.. والدنيا ربيع والحياة بمبي..
ده كان احساسي بعد ما عزلت بسنة ونص..
كنت بدأت احس بالاستقرار..
عارفة انزل من البيت الساعة كام بعد ما جربت تجارب كتير جدًا علشان اتجنب عنق الزجاجة على المحور..
وعارفة امشي من الشغل الساعة كام علشان اتجنب عنق الزجاجة اخر اليوم..
عارفة اقابل امي واخواتي امتى..
عارفة اجيب ايه منين ونظامي ايه وأكل ايه علشان جهازي الهضمي يكون مرتاح وأكون في حالة نشاط واعرف اركز في شغلي..
وفي وسط ما الحياة كانت بمبي كان عندي ميعاد المتابعة نص السنوية مع دكتور الأسنان..
اخدتني وروحت زي ما وعدته بعد اول عملية زراعة اسنان عملتها..
كان طلب من اعمل متابعة كل ٦ شهور.. وبقيت بعملها وكل مرة كنت بلاقي اسناني تمام..
يومها روحت في حالة البمبي والربيع ومقتنعة تمامًا اني هعمل زيارة دورية وكله هيكون تمام وهرجع البيت في ميعاد الغذا وباقي الأيام هتمشي بالنظام اللي مخططة له..
روحت.. واخ.. صدمة وبكاء ودموع..
ودكتور بيهديني وبيحاول يفهم انا ببكي ليه.. ايه مزعلني كده؟
الدكتور لما كشف لاقى اني عندي تأكل في عضم الفك.. واني محتاجة اعمل عميلة زراعة تانية، في الجنب التاني..
وهو أول ما قال زراعة انتابتني حالة بكاء.. حالة هيستريا..
زراعة؟ تاني؟ سنة ونص من الزيارات والكشوفات والأشعة ثلاثية الأبعاد.. والأكل علي جنب واحد، ودفع مبالغ طائلة، وانتظار في العيادة.. وادوية وتجنب الأكل الجامد ورجوع البيت بعد الشغل والدكتور يا دوب عشان انام واصحى اروح شغل..
بقيت ببكي.. ببكي..
وبفكر في تاريخ اسناني الأسود.. والكوكا، أول كلمة قلتها قبل ماما وبابا.. وازاي دمرت اسناني..
الدكتور طبعًا اتخض لما لاقاني منهارة.. وقعد اتكلم معايا..
اول حاجة كانت اني عزلت.. وبقى الطريق لوحده من بيتي للدكتور بياخد اكتر من ضعف المدة.. يعني ساعتين رايح وساعتين راجع غير الانتظار في العيادة والدكتور نفسه والأشعة اللي هتتطلب مني كل مرة في مركز مختلف في مكان مختلف.. يعني يوم من حياتي هيروح مع كل زيارة..
الدكتور سمعني بتعاطف وعرض عليا انه يقابلني في عيادة تانية في منطقة وسط مرتين او تلاتة خلال رحلة العلاج علشان يخفف عني..
شكرته ومشيت.. وفي الطريق سمحت لنفسي اكمل بكاء.. وبعد ما هديت قررت اني افكر هكمل مع الدكتور ده ولا هشوف دكتور تاني قريب من سكني الجديد..
رجعت البيت.. وزوجي سمعني.. واقترح اني اغير الدكتور..
وبعد شوية اتصلت بامي استشرها.. ونصحتني أفضل مع نفس الدكتور.. لأنه عارف تاريخ اسناني وعمل لي زراعة قبل كده.. لأني معاه من قرب العشرين سنة ومرتاحة معاه..
كلام امي وزوجي كان متعارض..
دخلت نمت وقررت افكر الصبح في هدوء..
صحيت وعملت جلسة تأمل.. وبدأت أسجل خواطري..
وقررت اني اخد شهر افكر.. شهر اعداد نفسي.. شهر اسأل فيه ناس جربت دكاترة قريب من سكني الجديد واسمع تجربتهم..
شهر اعمل ترتيب لنظامي الأسبوعي علشان احط دكتور الأسنان في السيستم..
وعلي اخر الشهر ومع الإستشارة والإستخارة قررت ارجع لدكتوري واعمل عنده الزراعة..
وبدأت رحلة جديدة.. استمرت قرب السنة..
عشتها بين البكاء والشكر.. بين الإمتنان والصبر..
بين الألم والتفاؤل..
ومرت السنة.. وطلب مني الدكتور زيارة بعد ست شهور.. للإطمئنان على الزرعة..
وخلال الست شهور، بقيت اكل عادي.. وامضغ..
وافتكر ازاي كنت زعلانة ورافضة..
ازاي كنت شايلة الهم.. وازاي بكيت عند الدكتور..
وبقيت افكرني بنعم ربنا التي لا تعد ولا تحصى..
من دكتور متعاطف وأهل داعمين وفروا لي تمن العملية..
ومن شغل خاص قدرت فيه اكون مرنة واوضب وقتي علشان تفضل صحتي أولوية..
وبقيت افكرني بقول ربنا "لا يكلف الله نفسًا إلا وسعها"..
وافكرني ان الدنيا دار ابتلاء.. وان لو ده ابتلائي فالحمد لله انه بكل اللطف ده..
وبعد زيارة الست شهور.. لاقتني وانا خارجة من عند الدكتور..
وابتسامة واسعة على وشي..
لاقتني سامعة نفسي في المستقبل بتشكرني..
اني بعد ما شعري شاب بثابر وبكمل وبستثمر في صحتي..
بتشكرني اني بسايس نفسي وبديها وقتها في الإعداد النفسي والتفكير والقرار..
بتشكرني اني شغالة علي تطوير مهارات إدارة نفسي..
ومستوعبة ان ادارة نفسي وأنا في العشرين والتلاتين غير خالص إدارة نفسي وأنا في الأربعين..
ولاقتني بتمنى.. وانا في حالة روحانية عالية.. في حالة صلة بربنا القريب.. الولي..بتمنى..
لاقتني بفكر بعد ما شعري شاب اني..
.. انا طولت عليكم.. اكمل المرة الجاية، لاقتني بفكر وبتمني ايه
#بعد_ما_شاب_٢٢
#العمر
#التعلم
#النمو
#السعي
#التغيير
#الشجاعة
#الجرأة
#الحماس
#الصحة
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها