الجواز وسنينه وعمل فينا ايه بعد سن الأربعين

من سنين طويلة.. وانا في اول العشرينات كنت مش عايزة اتجوز..

كنت شايفة الجواز نظام اجتماعي فاشل..

وكنت شايفة انه ليه اتجوز..

لحد ما قابلت زوجي العزيز..

وغير لي فكرتي.. واعجبت باخلاقه وتربيته وتصرفاته…

وتفكيره وحكمته ووزنه للأمور..

وعشنا سنين في تبات ونبات..

صحيح فيه مناوشات.. خلافات.. 

انما كلها في نطاق محترم وصحي..وبتنتهي بسلام..

لحد ما جات الكورونا..

وزوجي العزيز من حرصه علينا وعلى صحتنا طلع كمية قواعد وفرامانات رهيبة..

وعشنا في عزلة.. وافتكرنا الولاد وأنا ان الكورونا هتقعد كام اسبوع ولا حتة كام شهر..

وافتكرنا برضه ان زوجي هيخف شوية الحصار علينا بعد كام شهر..

وكنا غلطانين في الإتنين..

وفضل الحصار علينا مستمر من مارس ٢٠٢٠..

وفي فبراير ٢٠٢١ عزمت امي واخواتي على افتتاح مقر شركتي..

ويومها زوجي وصاني الوصايا العشر من نوع الكمامات والمسافة بينا وازاي اكتم نفسي وحنا بنتصور..

وفضل يدعي ان اليوم يعدي على خير..

والحمد لله عدى..

وبعدها اتكلمت معاه في اني اقدم ورش عمل في مقر شركتي..

وقال لي لا.. طبعًا لا.. مكان مقفول واحنا في زمن الكورونا..

انت هتعرضي نفسك وهتعرضينا وهتعرضي غيرك للمرض..

مش بس كده.. اهلنا كبار في السن.. لو حملنا العدوى ممكن نعديهم.. ونئذيهم..

يرضيكي تؤذي مامتك او اهلي؟

وبعد حوارات وجولات وصولات طلب مني ان اقفل الموضوع ومفيش ورش عمل تتقدم في المكان طول ما فيه كورونا..

وسألته طيب فتحت المكان ليه؟

قال لي اعتبري ان عندك مكتب..

وهي فترة وهتعدي يا ايمان.. امتى محدش عارف..

انما هتعدي..

قعدت مع نفسي اهديها..

فكرتها ازاي زوجي العزيز حريص علينا..

وازاي بيتصرف بحب وحكمة.. مش هدفه التحكم ولا المضايقة..

هدفه الحفاظ على اسرته..

وقعدت افكر اعمل ايه؟

ايه الحل؟

اشتغل ايه دلوقتي؟

ورجعت افكر في ايه المتاح.. ايه المهارات اللي عندي اللي ممكن استخدمها علشان اشتغل في فترة الكورونا..

ايه الخبرات اللي عندي من سنين شغلي السابقة في التربية والتعليم.

قعدت افكر في الحلول والبدائل..

وهوب.. جات لي فكرة وانا قاعدة في الجنينة المفضلة ليا..

واللي بحب اقعد اتأمل وافكر فيها..

ولاقتني بفكر اقدم برنامج تعليمي مش في شركتي..

لا يكون في اماكن مختلفة.. المشترك بينهم انها اماكن مفتوحة..

وانه يكون على مدار شهور..

كل شهر مقابلة.. خروجة في مكان مفتوح ونتعلم حاجة مرتبطة بالمكان او حاجة المكان يساعدنا في استيعابها..

ولاقتني بعد مع شعري شاب..

بشتغل في ضواحي مصر المختلفة..

بدل ما جوا قاعة والمشتركات على كراسي وبستخدم شاشة وسبورة..

لاقتني واقفة مرة في القلعة ومرة في قصر عابدين ومرة في حديقة الحيوان..

كل شهر في حتة على مدار السنة..

ولاقتني مستمتعة..

اني بقدم شغلي بطريقة جديدة..

وممتعة..

لاقتني بكتشف في نفسي قدرات ماكنتش مدركها..

ولاقيت المشتركات مستمتعين قوي بالبرنامج..

وبيقولوا ليه مش كل التعلم كده، بره جدران الفصل وفي العالم الواسع..

ولاقيت السنة بتخلص..

ولاقتني اشتغلت واتفسحت ونمت مهاراتي..

ولاقيت المشتركات استمتعوا واتعلموا..

ولاقيت ربنا من علينا بالصحة وحفظنا من الكورونا..

ولاقتني بفتكر قول ربنا سبحانه وتعالى "وعسى ان تكرهوا شيئًا وهو خير لكم"

ولاقتني بشكر زوجي العزيز على حرصه علينا..

وعلى انه بسبب رفضه اني اقدم ورش عمل في شركتي، اضطرني اطور نفسي واعمل خدمات جديدة واطور من نفسي..

ولاقتني بعد ما شعري شاب.. 

وبعد ما قدمت البرنامج بتاع الرحلات اول مرة بسبب الكورونا..

بفكر اقدم ايه كمان بشكل جديد 

واطور نفسي ازاي..

وفي عز التفكير لاقتني بفكر في موضوع كنت كل شوية بأجله..

كنت شايفاه صعب جدًا.. بالذات بعد ما شعري شاب..

ولاقتني…ب..

لا لا، اكمل لكم المرة الجاية..

تابعوني، مع بعد ما شاب..

#بعد_ما_شاب_٢٠

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة