اللي حصل لي في صحراء الفيوم.. ممكن يحصل لك

الرحلة.. رحلة من نوع خاص..من نوع مختلف..

رحلة من نوع جديد.. من نوع غريب..

احيانًا حد بيدخل حياتنا وبيكون دخوله بداية حقبة جديدة..

بنلاقي نفسنا بنقول حياتنا قبل فلان حاجة وبعد فلان حاجة تانية..

ده اللي حصل لي مع دخول روبين شارما بتعليمه وكتبه وكورساته..

فكرت ليه؟ ليه هو بالذات دونًا عن كل الناس التانية اللي قرأت لها او اتعلمت منها؟

لاقيت ٣ اسباب واضحة..

روبين شارما بيشارك تطبيقات عملية ننفذ بيها اللي بيعلمه.. يعني مش بيكون كلام نظري، بيقول كلام عملي قابل للتطبيق..

ده السبب الأول، السبب التاني انه هو عايش الكلام ده، وبيشاركنا من خلال قنواته حياته وتطبيقه للي عايشه ومؤمن بيه.. 

فبنشوف فعلًا هو بيعلمه ازاي.. 

أما السبب التالت فهو الConsistency يعني هو مداوم على ده، كل يوم عنده رسالة للعالم، كل يوم بيعمل اللي بيقوله.. كل يوم على مدار سنين.. من اول ما بدأت اتعلم منه، من ٢٠١٠

طبعًا نموذج ملهم..

اتعلمت منه كتير وطبقت منه كتير.. واحد الحاجات اللي كان بينادي بيها موضوع ال 3s 

٣ كلمات بيبدأوا بحرف ال s بالإنجليزي Silent, stillness and solitude 

يعني الصمت والسكون والوحدة وطبعًا بمعنى الخلوة مش الوحدة..

اتكلم عن اهمية ده للإنسان.. علشان صحته العقلية والروحية..

وكنت بطبق ده في نطاق ضيق.. يعني خمس عشر دقايق في اليوم..

او خلال جلسات التأمل اليومية بتاعتي..

لحد ما جات الرحلة..

الرحلة اللي من نوع خاص..

لاحظت قبلها اني في خناقة..

خناقة داخلية..

وعقلي تعبان..

ايه سبب الخناقة مش واضح لي..

بس كأن فيه صراع داخلي داير جوايا وانا سامعة صوته من بعيد..

انما مش شايفة اي تفاصيل..

وبعد فترة تعب من الصراع والخناقة والصوت..

وقررت اشترك في رحلة صمت مع متخصص نفسي..

عرضت على شيري اختي نطلع مع بعض، وقد كان..

وصلنا الفيوم، مكان رحلة الصمت وفي جلسة التعارف منظم الرحلة شرح ان مطلوب منا صمت تام.. مفيش كلام خالص طول مدة ال٣ ايام.. ولا حتى وقت الأكل ولا وقت الراحة..

ممنوع نتكلم مع بعض في الغرف ولا حتى نشاور او نكتب لبعض او نتواصل عن طريق الموبايل..

ممنوع.. صمت تام، سكون تام.. تواصل مع نفسنا بس..

طبعًا الموضوع كان مفاجأة بالنسبة لنا..

شيري وانا تخيلنا ان هيكون مطلوب منا نسكت مدة مثلًا خلال اليوم..

انما ٣ ايام صمت تام؟؟

وطبعًا لأن شيري وأنا اخوات ونفس الأم هي اللي ربتنا

فربتنا على الإنضباط والإلتزام..

وفعلًا بدأنا الصمت.. 

وكانت اول مرة ليا بعد ما شعري شاب اسكت ٣ ايام..

الا في جلسة نهاية كل يوم لما كان منظم الرحلة بيسمح لنا نتكلم مع المجموعة لمدة قصيرة جدًا

علشان نشارك مشاعرنا وخواطرنا..

ومر الوقت في الأول غريب.. 

وكأني محتاجة اركز اني اسكت وماتكلمش..

وكأن الطبيعي او الDefault بتاعي ان اتكلم..

ولاقيت الصمت لمدة مش سهل.. خصوصًا وشيري معايا وعايزة اعبر واتكلم..

وبعد اول يوم بدأت اتعود.. 

ولاقتني مستمتعة بالصمت..

وعلى اليوم التالت كنت عايزة افضل ساكتة..

وبتسأل ازاي هرجع القاهرة واتعامل مع الدوشة تاني..

والأهم اني لاقتني سامعة صوت الصراع بوضوح… 

وشايفة الخناقة بين عقلي وقلبي..

ولاقتني قاعدة بفض الإشتباك اللي بينهم..

ولاقتني بعد ما شعري شاب 

بمر بتجربة جديدة وفريدة من نوعها..

بمشي في الصحرا لساعات..

في نهاية الرحلة..

بمشي لوحدي، في صمت، في سكون، 

ولاقتني حاسة بسلام داخلي.. اول مرة احسه في عمري..

وفكرت في ناس غالية عندي..

شعرهم هما كمان شاب، وعايشين في صراع داخلي..

فكرت.. هل هما كمان محتاجين رحلة من نوع خاص؟

رحلة من نوع جديد؟

بعد الرحلة دي، طلعت رحلة تانية..

فين ومع مين؟ وليه وحصل فيها ايه؟

تابعوني المرة الجاية مع بعد ما شاب..

#بعد_ما_شاب_١٧

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة