البوتكس والنفخ والتكميم..

ابهرني.. 

بجد.. انا بهيرة بهير انبهرت..

عشت مع كلامه وتعليمه لسنين..

دروسه الهمتني وقصصه شجعتني..

وبسببه كتبت مع عيلتي رسالتنا اللي فيها عايزين تكون عيلتنا عاملة ازاي..

بينا وبين بعضنا، ومع العالم الخارجي..

ويوم ما سمعت انه هيجي مصر ويقدم تدريب قررت اني اروح احضر له..

ولما شفته في التدريب وهو واقف بمنتهى الحضور والحماس والتركيز والتواضع 

وهو في اواخر السبعينات، انبهرت..

اني اتعلم من كتب ستيفن كوفي حاجة، واني اشوفه بشحمه ولحمه بيحاضر حاجة تانية..

كانت تجربة من تجارب العمر..

ويومها ابهرني..

بعد ما سجلت اول كورس ليا أونلاين..

فكرت في ليزا نيكواز وروبين شارما الناي اللس اتعلمت معاهم اونلاين عبر قارات ومحيطات..

وبدأت أحلم ان صوتي يوصل للعالمية..

وافتكرت ستيفن كوفي وازاي هو اول من الهمني.. مش أونلاين، لا بتواجد لايف وحضور حقيقي..

وبدأت افكر فيه.. وازاي لقرب التمانين كان بصحة وفاعلية ما شاء الله..

ولاقتني بفكر تاني في صحتي.. وازاي هي اول اولوية ليا..

وفكرت لاقتني انتظمت في الرياضة بفضل الله..

ولاقتني بفكر في فيديو كنت سمعته لروبين شارما في كورس كنت مشتركة فيه..

كان بيشرح ازاي ممكن بطريقة اكلنا ننشط جين وراثي او نخمده..

وقت الكورس كان الكلام صعب عليا.. بس مع تكرار المشاهدة استوعبت..

ان كل حد فينا عنده خريطة جينية وراثية بتحمل امراض معينة..

وان الأمراض دي ممكن تظهر وممكن لأ، على حسب طريقة حياة الشخص واختياراته..

مثلًا حد في عيلته مرض السكر، ممكن باختيارات الأكل والتعرض للضغوط الجين ينشط ويصاب بالسكر.. 

مش لأنه وراثي، ده مش العامل الوحيد، لأ لأن اختياراته نشطت الجين.

والعكس صحيح، يعني ممكن باختياراته يخمد الجين والمرض ما يجيلهوش

فكرت في الفيديو ده لشارما، وفي ستيفن كوفي اللي كان بصحة يدربنا وهو قرب التمانين..

وقلت بس.. هو موضوع الأكل ده.. وقد كان..

بعد ما شعري شاب، ووأنا في سن الأربعة واربعين لجأت لخبيرة تغذية متخصصة..

مش لدكتور دايت.. 

لأ.. خبيرة تغذية..بعت اسألها لو هي تقدر تساعدني في ده.. في تحديد الأكل اللي ممكن ينشط عندي امراض..

وردها كان ملف طلبت مني اجاوب عليه..

اخدت قرب الساعة بحل اسئلة عن تاريخ والدي وتاريخ امي المرضي وتاريخ عيلة كل حد فيهم..

واسئلة عن نظام حياتي ومواعيد نومي وممارستي لرياضة ايه..

وطلبت من اسجل لها باكل ايه واشرب ايه وقد ايه وامتى وفي مواعيد ايه على مدار ايام..

وبعت لها وحجز الجلسة بعدها بكام يوم وروحت..

لاقتيها طابعة الإجابات بتاعتي ومذاكراها..

وبدأت تسألني أسئلة دقيقة..

وبعدها طلب مني احدد هدفي بوضوح..

هدفي؟

هدفي اني اعيش بصحة علشان افضل انفع غيري لحد اخر يوم في عمري بإذن الله.

هدفي اني انفع غيري مش في مصر بس، لأ في دول وقارات تانية.

وقعدت معايا نخطط ازاي نوصل للهدف ده وازاي هنشتغل ٣ شهور مع بعض..

ومطلوب مني ايه خلال الشهور دي..

واشتغلت معاها علشان افهم مطلوب مني اكل ايه واتجنب ايه علشان تبقى صحتي تمام..

وبعد ال ٣ شهور طلبت منها نكمل ٣ شهور كمان..

كملنا منهم اتنين وبعدها جات الكورونا.. وهي قررت توقف شغل..

لان ملهاش في الاونلاين..

حاولت اقنعها بيه.. زي ما مديرتي اقنعتني اسجل كورس اونلاين 

انما هي رفضت..

فكرت فيها وفيا..وازاي ساعدتني بعد ما شعري شاب 

اغير نظام اكلي علشان احقق هدفي..

و..

ومن كام يوم كنت بتفرج على حلقة من مسلسل..

ومشهد جيه في عيادة دكتور تجميل..

وستات اصغر مني قاعدين اخر شياكة ومكياج وشعر..

ورايحين يحقنوا وشهم بوتكس..

بصيت للمشهد وفكرت قد ايه اختياراتنا بالذات بعد ما شعرنا شاب

هتحدد نوع الحياة اللي هتعيشها كمان كام سنة..

في السبعين والتمانين..

فكرت ازاي كتير منا بعد ما شعرها شاب 

بتجري على الصبغة ولبس البراند والحقن..

وقليل منا اللي بيسعى للرياضة والأكل الصحي واضافة قيمة لغيره بعلمه وعمله..

يا ترى انت نفسك مين منهم؟

هل شعرك شاب؟

بتجري ولا بتسعي؟

والحركة دي هتوصلك لفين بعد خمس سنين من دلوقتي؟

عارفة الحركة بعد خمس سنين وصلتني لفين؟

تخيلي لفين؟

هاقول لك المرة الجاية..

تابعيني مع 

بعد ما شاب 

#بعد_ما_شاب_١٤

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة