ازاي تبقى صحتك في الخمسين افضل من الأربعين 2

تخيل كده لو بعد ما كنت بتشتغل في مكان لمدة ١٩ سنة بقيت بتشتغل لوحدك..

مع نفسك.. بقيت بتدير نفسك..

هيحصل ايه؟ 

هتحدد مواعيد عمل؟

هتحط لوايح وقوانين؟

هتدي لنفسك اجازة؟

قد ايه وامتى؟

هتدي لنفسك مرتب؟

هتتصرف ازاي؟

ده اللي حصل لي بعد ما شعري شاب..

بعد ما قدمت الاستقالة ورتبت اولوياتي 

وحطيت صحتي أولوية..

وطلبت من مديرتي اللي هي أنا اني ابقى بتمرن الصبح قبل ميعاد الشغل..

وان مواعيد شغلي يكون فيها مرونة وفقًا لأولوياتي..

مديرتي طلبت مني اني اكون أنا كمان مرنة معاها..

واني اشتغل في مواعيد مسائية..

أنا.. بس ايه ده.. ازاي؟

ده أنا طول عمري وأنا بشتغل من ٨ ل ٣.. مسائي ازاي؟

ودخلت في مفاوضات مع مديرتي.. الي هي أنا..

طالما هتروحي النادي الصبح تلعبي رياضة يبقى تشتغلي مساءا..

طالما هتشتغلي مع ستات عاملة يبقى قدمي الكورسات في وقت مسائي علشان يقدروا يحضروا..

ده كان طلب مديرتي..

ودخلت في مفاوضات وأرهقت..

وروحت استشرت زوجي العزيز..

قلت لي اني في صراع ما بين اني اشتغل في مواعيد مسائية أو صباحية بس..

ونصحني بعد ما سمعني اني ارتب اسبوعي.. واخلي فيه يومين بالكتير مسائي علشان اكون باقي الأسبوع متواجدة مع عيلتي..

يومين مسائي وباقي الأسبوع اشتغل صباحي..

قعدت مع نفسي بعد النصيحة افكر بالورقة والقلم.. واشخبط واخطط واعدل وانظم..

لحد ما عملت جدول.. فيه صحتي أولوية، والرياضة اول حاجة في جدولي..

وبعدها حطيت عيلتي.. وبعدها مواعيد الشغل بين ايام شغل مسائي وايام شغل صباحي..

ولاقتني بعد اول اسبوع مهنجة..

عقلي بيقول لي مش عايز ده.. 

أنا عايز النظام القديم بتاع ٨ ل ٣..

انا فرهدت.. انا تعبان.. انا مشتت..

فكرت استسلم.. وبعدين افتكرت مقولة لروبين شارما..

أحد الناس الملهمة ليا جدًا..

كان بيقول فيها ان التغيير صعب في الأول، فوضوي في النص وعظيم في الأخر..

كان بيقول "All change is hard at first, messy in the middle and gorgeous at the end."

افتكرت المقولة واخذت نفس وقلت لي يا ايمان صعب في الاول بس.. وبعد كده هتتعردي..

مش معنى ان شعرك شاب انك مش هتقدري تتعودي على النظام الجديد..

بصي لكل التجارب اللي حصلت لك بعد ما شعرك شاب..

بقيتي عارفة تنظمي صفحتك على الفيس بوك ومحتوى قناتك على اليوتيوب.. 

وجربتي بنفسك ازاى كان صعب في الأول وفوضوي في النص وبعدين بقى سهل..

اصمدي معايا..

وقررت يومها اني اكمل.. واعمل وقفات دورية.. ما بين المديرة وأنا..

ونتناقش في نظام العمل وتأثيره على صحتي اللي هي اول أولوية..

وفضلت كده لأكتر من سنة.. 

لحد ما قعدت مع مديرتي وطلبت منها ان الشغل مساءًا يكون استثناء مش قاعدة…

مش كل اسبوع ولا كل شهر.. يكون شئ عارض..

لأني بحب اكون موجودة مع عليتي من وقت الغدا.. 

ولأن ده مرتبط بصحتي النفسية..

ولأن عيلتي تاني اولوية ليا..

وبعد صوالات وجوالات وصلنا لنظام ريحنا..

ولاقتني بعد ما شعري شاب بقيت قادرة افكر واتفاوض.. 

واجرب واختبر واقف اقيم واعدل واحسن..

لاقتني مستوعبة اولوياتي وعايشة وهي واضحة قدامي..

واخدت نفس وحسيت اني راضية عن علاقتي بمديرتي اللي هي أنا..

وهوب لاقيت المديرة بتطلب مني طلب.. 

ايه؟ عايزاني اعمل ايه؟ 

ازاي؟ ليه؟ ما كنا حلوين وكويسين مع بعض..

بتقولي ايه؟

ايه الطلب وكانت المديرة بتقول ايه؟

احكي لكم المرة الجاية مع بعد ما شاب..

#بعد_ما_شاب_١٢

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة