ازاي تبقى صحتك في الخمسين افضل من الأربعين 1

وئام زميلة عزيزة.. اتعرفت عليها وأنا بدرس كوتشينج وكنا في تدريب عملي مع بعض..

فطلبت مني اختار موضوع تعملي لي كوتشنيج فيه..

قلت لها الصحة.. أنا في الأربعين وشعري شاب.. ومش بحبها خالص..

قالت لي هي ايه؟

قلت له الرياضة..

قالت لي عايزة تمارسيها ليه؟

قلت لها علشان صحتي..

شفت ناس كتير في دوايري صحتهم تعبانة وراقدين..وعايشين ومش عايشين..

وشفت ناس تانية، اقل بكتير في السبعين والتمانين عايشين حياتهم.. وعايزة اكون زي القليلين دول.. عايزة اكون بصحة..

قالت لي ايه خطتك؟

هتلعبي رياضة ايه، وامتى وفين؟ هتبدأي امتى؟

ضحكت.. وبعد شوية تفكير قلت لها هابدأ في سبتمبر..بعد ٧ شهور..

ومرت الشهور..

وفي اخر اسبوع في أغسطس ٢٠١٧ كانت اول مرة ابدأ شغل حر..

وقعدت في اخر اليوم الأول وفكرتني ان اول اولوية ليا في الأربعينات هي صحتي..

واني علشان صحتي هابدأ العب رياضة للصحة.. مش للتخلص من الوزن الزائد..

وسألتني هنلعب امتى وايه وفين؟ فكرتني بأسئلة وئام زميلتي..

ولاقتني مش عارفة.. عمري ما لعبت رياضة للصحة..

كنت عايزة ازود عضلاتي.. علشان احمي عضمي..

مش عايزة اتخلص من دهون..

فكرت اروح النادي الرياضي اللي أنا مشتركة فيه.. واتفرج الناس بتمارس رياضة ايه..

واخدتني في يوم الصبح وروحت.. 

وشفت اللي ما كنتش متخيلة اني اشوفه..

شفت النادي زحمة.. لاقيت ركنة بصعوبة.. شفت ناس في الستين والسبعين بتمارس رياضة جماعية..

وشفت ناس في العشرينات والتلاتينات اللي منهم في الجيم واللي بيلعب تنس واللي بيعوم واللي بيجري..

ايه العالم ده..

ايه الدنيا دي؟

سألتني.. انت كنتي فين؟ ازاي عمرك ما شفتي العالم ده واني طول عمرك مشتركة في النادي؟

الرد كان اني كنت بشتغل لمدة ١٩ سنة كموظفة له مواعيد حضور وانصراف..

بدأت اتأمل الناس اللي بتعلب رياضة.. وسألتني طيب هل كل الناس دي مش بتشتغل؟

والرد المؤلم كان لأ.. الناس دي كتير منهم بيروح ياخد دش في النادي ويلبس لبس مناسب للشغل ويطلع على الشغل..

الناس دي صحتها اولوية في حياتها..

الناس دي بتبدأ شغلها بعد الرياضة..

الناس دي عاشية وبتشتغل، مش عايشة علشان تشتغل..

طيب وأنا؟ 

أنا ما كنتش عايشة صح..

وبدأت بعد ما شعري شاب..

اسأل شيري اختي اجيب ادوات رياضة منين..

يا شيري، البس ايه وانا بلعب رياضة..

يا شيري، ايه الفرق بين الجزم واجيب جزمة نوعها ايه..

وبدأت اروح النادي قبل الشغل اتمرن..

واتفقت مع مديرتي، اللي هي أنا، إن الرياضة الأول وبعدين الشغل..

وكانت اول مرة ليا العب رياضة للصحة في سبتمبر ٢٠١٧ 

وأنا عندي ٤١ سنة و ١١ شهر..

وبدأت اتعلم عن الرياضة.. وبدأت اسايس نفسي علشان امارسها..

لأنها مش محببة بالنسبة لي.. ولأني ماتربتش عليها..

ومرة ورا مرة واسبوع ورا اسبوع وقفت في النادي اسجل سلسلة جديدة لليوتيوب بعنوان "تحقيق الأهداف"

ولاقتني بشارك فيها تجربتي.. وبحتفل فيها مع متابعيني بمرور سنة على التزامي بالرياضة بشكل اسبوعي..

حاجة من الحاجات اللي بدأتها بعد ما شعري شاب..

ومن اكتر الحاجات اللي نفسي بتشكرني عليها.. اني بدأتها وبفضل الله مستمرة عليها.. بالذات بعد ما بقيت مديرة نفسي..

لأني بقيت مديرة مرنة وحريصة على صحة اللي بتديرهم ومحترمة اولوياتهم..

بس أنا والمديرة كان بينا صراع على مستوى تاني..

الحياة ما كانتش وردي..

كنا في مفاوضات..

كانت عايزاني اعمل حاجة ماعملتهاش قبل كده..

وأنا بقول لها مش هقدر.. مش هيينفع.. ده أنا شعري شاب..

وهي مصرة..

ايه الحاجة وايه نتيجة المفاوضات؟

تابعوني المرة الجاية مع بعد ما شاب..

#بعد_ما_شاب_١١

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة