٤ اسئلة هيعملوا طفرة في صحتك

يا حلاوة… 

يا خبر..

يا نهار..

افتكر كده مين قال الكلمات دي.. 

وقالها باسلوب عامل ازاي؟

ده كان تعليقي اول ما دكتور مايكل هول، اللي درست معاه كوتشينج في مدرسة آل
Neuro-semantics
قالنا ان لو قررنا نشتغل شغل حر محتاجين ناخد بالنا اننا هنكون مديرين نفسنا.. وبالتالي محتاجين نتفق مع نفسنا هنكون مدير صفاته ايه؟ عامل ازاي؟ بيدير ازاي؟

وطبعًا اول ما قال كده لطمت بالبلدي بنت سلطح باشا اللي هو أنا.. أنا هبقى مديرة نفسي.. ياخرابي.. يالهوي.. باخوفي من اللي أنا هعمله فيا أنا!

اللي عرفني عارف اني ملتزمة ومنظبطة.. 

مش بختياري الصراحة.. 

انما امي وابويا ربوني على كده.. وكانوا كده..

فطلعت فاكرة انه هو كده ولازم كده وما يصحش غير كده وكده وبس..

فطبعًا لما اخد قرار الأستقالة، بعد ما شعري شاب، كان واحد من مخاوفي اني هبقى مديرة نفسي…

يعني حياتي هتبقى عاملة ازاي يا ترى؟

بعد ما استقلت اخدت اجازة الصيف ورجعت اول يوم شغل زي زمايلي في المدرسة اللي استقلت منها..

وقلت همشي بنفس النظام.. هابدأ الشغل واخلصه كأني لسه فس المدرسة..

وكمان هاخد نفس اجازتهم..

أنا متعودة على النظام ده بقى لي ١٩ سنة.. فياللا نكمل عليه..

وبعد اول يوم شغل لاقت شعري اللي شاب بتخانق معايا..

بعد الغدا ومع كوباية شاي بلبن  وسقسقة بسكوتين، سألتني مالك؟

نفسي قالت للمديرة - اللي هي أنا - مش مبسوطة..

ليه هنعيش في نفس النظام..

ردي كان انه ناجح.. عشنا ١٩ سنة بيه وكنا منتجين في الشغل.. وبنحقق وبنتقدم..

نفسي ردت وقالت "شايفة شعري؟ شعري شاب..أنا مش أنا من ١٩ سنة..

أنا محتاجة نظام جديد، مناسب لسني دلوقتي.. ولطبيعة الشغل الحر..

ليه نشتغل من ٨ ل ٣ وليه نفضل على المكتب طول اليوم في اوضة مقفولة.. 

ليه عايزاني امضي حضور وانصراف؟ 

ليه.. 

يومها كان حوار طويل معايا.. طلعت منه مستوعبة اني متبرمجة على طريق شغل معينة..

واني اخترت ادير نفسي زي ما مديريني في الشغل قبل كده كانوا بيديروني..

واني محتاجة اتعلم فن الإدارة..

يومها استوعبت اني خايفة.. خايفة اغير لاحسن التزامي يقل.. او اقصر في شغلي.. او اتدلع قدام شوية..

خايفة ارخي الخيط شوية لا البكرة تكر مني.. والاقي الزمن عدى وفشلت في ادرة نفسي وفي شغلي الحر اللي لسه ببدأه..

ويومها قعدت مع نفسي واولوياتي.. 

وكتبت اني اهم اولوية ليا في الحقبة الأربعينية هتكون "صحتي"

واني هرتب شغلي وفقًا للأولوية دي..

واني هتبنى المرونة شوية صغيرة كبداية في ادارة نفسي في الشغل..

واني هتعلم فن إدارة نفسي.. 

وان علشان صحتي هابدأ اعمل حاجة ما عملتهاش قبل كده طول ال١٩ سنة اللي اشتغلتهم كموظفة..

وبدأت.. وسألتني ازاي عشت كل السنين دي كده من غير ماعمل الحاجة دي؟

وليه ما بدأتش الحاجة دي طول ال١٩ سنة اللي كنت فيهم موظفة؟

وازاي فيه ناس عايشة كده بتمارسها وانا مش دارية بيهم؟

وليه ظلمت نفسي طول السنين دي من غير ما امارس الحاجة دي؟

ايه هي الحاجة؟ اللي بدأتها في السنة العشرين من شغلي.. وبعد ما شعري شاب؟

احكي لهم عليها المرة الجاية..

تابعوني 

#بعد_ما_شاب_١٠

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة