أنا مش منهم

الزهريات والأقلام الرصاص والرسم مش ملعبي..

شئ ممتع لناس كتير.. أنا مش واحدة منهم..

اول درس رسم خاص اخدته اخدته بعد ما شعري شاب..

ولاقتني مش مستمتعة ولا عايزة اكمل..

إنما برضه لاقتني عايزة اجرب حاجة جديدة..

فيه مقولة بتقول
when the student is ready the teacher appears 

يعني لما التلميذ يكون مستعد المدرس بيظهر..

ده غالبًا اللي حصل معايا..

في يوم في شهر مارس ٢٠١٥ 

لاقيت ايميل من مكتبة الديوان.. عن ورشة كتابة ابداعية

مع مدربة انجليزية.. في مقر المكتبة بالزمالك..

بصيت على التفاصيل لاقتها مرة في الأسبوع.. مدتها ساعتين..

والمكان قريب جدًا من بيتي وقتها..

اذاعة بعد ما شاب قال يجرب اشتغلت في عقلي..

ولاقتني بقول اما اجرب، يعني هخسر ايه..

روحت اشتركت في الورشة وجبت كراسة مِسَطَرة وغلافها جميل..

وحضرت مقلمة بشوية اقلام الوانها مختلفة علشان بحب اكتب ملاحظات بالألوان..

روحت الورشة ولاقيت المدربة قاعدة وحواليها متدربات غيري..

منهم اللي كان يعرفها من قبل كده..

بدأت الحصة وطلبت مننا نكتب.. ونشارك اللي كتبناه..

ونسمع بعض.. ونتذوق.. ونعلق لو عايزين.. 

وفجأة لاقتها بتقول واجب المرة الجاية..

ونبعته امتى وفين.. بصيت في الساعة لاقيت الساعتين عدوا..

بالسرعة دي؟

هنرَوَح؟

لاقتني بفكر في سعاد حسني وفيلم صغيرة على الحب..

وهي بتتحايل على حزمبل يخليها شوية كمان..

لاقتني عايزة افضل.. اكمل..

رجعت البيت وانا في حالة انسجام وسعادة..

لاقتني واخدة الكراسة بالحضن..

حطتها على مكتبي.. وفكرت في الواجب.. 

ولاقتني عايزة بكرة يجي بسرعة علشان اقعد اعمله..

اليوم الجديد بدأ.. واول ما رجعت من الشغل اتغديت مع جوزي وولادي وروحت فتحت الكمبيوتر وبدأت اعمل الواجب..

وبعته.. وأنا في حالة استمتاع رهيبة..

وبدأت اعد الأيام لحد الحصة اللي بعدها..

ومع كل حصة اتمنى الزمن يقف..

ومع كل واجب المتعة تزيد..

ولاقتني بعد مع الكورس خلص بسأل المدربة بتدي كورسات ايه تاني..

وبسجل في الكورس الجديد عن كتابة القصة القصيرة..

وبعد الأيام وانا في انتظار الكورس الجديد..

والمجموعة الجديدة..اللي هتعملها معاها ومنها.. وهنشارك بعض كتاباتنا..

وفهمت بعد ما شعري شاب..

اني بحب اتعلم في مجموعة..

وبحب الكتابة..جدًا

وبدأت اكتب من مارس ٢٠١٥

كتابة ابداعية..

وكتابة قصص قصيرة..

وكتابة انواع تانية..

من يومها وانا بكتب بانتظام..

فهمتي عني اني بَقَدَر الكُتَاب..

واني عايزة اكون كاتبة..

عايزة اكون فنانة بالكتابة.. مش بالرسم..

وفي اخر الكورس التاني عن القصص القصيرة سألت المُدَربة الإنجليزية سؤال..

والسؤال ده خلاني اسعى لتحقيق حلم بعد ما شعري شاب..

ايه السؤال؟ وايه الحلم؟ 

تابعوني المرة الجاية مع 

#بعد_ما_شاب_٤

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة