تخيل ٣٧ كيلو ممكن يعملوا فيك ايه؟

هو احنا فين؟ 

هو ده طريق ايه؟

هي دي دريم لاند؟

هو فاضل قد ايه؟

اسئلة كلها سألتها تباعًا واحد ورا التاني..

سألتها لشاهي، صديقة عزيزة علي قلبي..

قبلها باسبوعين كنا بنتكلم عن أهدافنا المستقبلية وعن احلامنا..

وتطرقنا الى موضوع العجل..

ركوب العجل..

وازاي نفسنا نرجع نركب عجل مع بعض تاني..

وازاي زمان قبل الكورونا كنا بنركب عجل بس في منطقة الزمالك..

وازاي حاليًا كل واحدة فينا نفسها تركب عجل في مناطق جديدة ولمسافات بعيدة..

طبعًا بسبب الهام اماني خليل البطلة المصرية الحاصلة على لقب اول Ironman مصرية فوق سن الخمسين..

المهم بعد الكلام ده بكام يوم لاقيت رسالة من شاهي..

بتدعوني فيها اني اروح اركب عجل معاها من القاهرة لنص الطريق الصحراوي..

العرض كان جديد، مغري.. فيه اثارة وتشويق وحماس..

هنكون مع اماني خليل ومجموعة من أصحابنا..

ونفطر بعدها في مزارع دينا..

قعدت مع الجورنال بتاعي وكتبت اولوياتي في الأسبوع ده، الأولويات الشخصية والعائلية والعملية..

ولاقيت ان التوقيت مش هيكون مناسب ليا..

بعت سرالة لشاهي اعتذرت لها.. إنما جوايا كان نفسي جدًا اروح..

فوعدت نفسي اني اعمل صيانة للعجلة علشان أكون مستعدة لما يكون فيه ركوبة عجل تاني..

وقد كان.. 

الجمعة اللي بعدها لاقيت نفس المجموعة هيروحوا يركبوا عجل.. 

ولاقيت مكان التجمع قريب جدًا من بيتي..

والمكان اللي هنروح له بالعجل مش بعيد قوي..

قلت ما بدهاش.. عملنا صيانة للعجلة، ياللا بينا يا إيمان..

ولاقتني يومها الساعة خمسة ونص صباحًا نازلة من البيت..

وبقابل المجموعة عند نقطة التجمع..

وبدأت اسوق العجلة..

وشاهي وأنا سايقين جنب بعض..

والدنيا ربيع والجو بديع وطبعًا اغنية "حاجة غريبة" لعبد الحليم وشادية من فيلم "معبودة الجماهير" فضلت تتردد في عقلي..

ومر الوقت.. 

قد ايه؟ ما كنتش متأكدة..

انما بعد شوية وقت حلوين، لاقينا واحد من المنظمين معانا بيوصف لنا الطريق اللي هنكمل فيه، ندخل يمين منين وبعدها شمال فين.. وبيشاور على مطلع New Giza

طبعًا بصيت على المطلع وعقلي هَنج وبدأت اضحك.. 

هطلع المطلع ده بالعجلة؟! 

طبعًا ما كانش فيه مفر.. فبدأت أطلع المطلع.. واحدة واحدة.. وبعد شوية ومع الشمس والحر لاقتني تعبانة..

نزلت من على العجلة وبدأت امشي وانا ماسكة العجلة جنبي…

ويادوب خلص المطلع.. 

هوب لاقيت مطلع تاني..

ونفس الكلام.. شوية ركوب والباقي مشي..

وخلص المطلع التاني..

وكملنا ركوب لحد نقطة التجمع بتاعت المجموعة قدام علامة New Giza 

وبعد شوية تصوير واكل موز وشرب مياه بدأنا نستعد للعودة..

عسكري كان واقف شرح لنا إن فيه طريقين.. طريق مختصر وطريق طويل..

بصينا على الطريق المختصر لاقينا فيه مطالع..

طبعًا قلنا مطالع تاني لأ..!!

وأخذنا الطريق الطويل..

وفضلنا نسوق.. ونسوق.. ونسوق..

لحد ما وصلنا لمكان كنت لما بروحه بالعربية بشوف انه بعيد جدًا عن بيتي..!

ولاقتني بسأل شاهي هو احنا فين؟

هو ده طريق ايه؟

هي دي دريم لاند؟ دي بعيد جدًا عن بيتي..!!

يعني احنا لسه بعيد قوي عن نقطة التجمع!

هو فاضل قد ايه؟!

وجنبا كانت معانا عربية دعم.. 

وفيها صديقتي العزيزة حميدة..

طبعًا شافتني وانا خلاص بجيب اخري..

قالت لي خلاص فاضل شوية قليلة.. كملي..

وفضلت بالعربية جنبي تشغل اغاني وتقول لي أنا فخورة بيكي..

كملي.. ياللا فاضل ٦ كيلو..

ياللا هانت..

ياللا اخر كيلو..

ياللا..تخيلي انك وصلتي..

ولاقتني بعد ما شعري شاب

كملت سواقة عجلتي لمسافة ٣٧ كيلو ونص..

لمدة اكتر من ٣ ساعات..

وطلعت على طريق الواحات..

وعلى طريق المحور..

وطلعت مطالع ونزلت منازل..

ولاقتني حاسة بسعادة غامرة..

اني بالرغم من اني بركب عجلتي من وأنا طفلة..

الا ان اول مرة اسوق المدة دي والمسافة دي كانت بعد ما شعري شاب..

وأنا قرب سن الخمسين..

وعلى يميني صديقتي اللي شجعتني اجرب..

وعلى شمالي صديقتي اللي شجعتني اكمل…

ولاقتني بوصل لنقطة التجمع ومليانة مشاعر امتنان للمجموعة..

وعلى رأسهم أماني خليل، مصدر الإلهام العظيم لنا..

واللي بالنسبة لي قدوة ملهمة لكل ست عدت الخمسين..

في ازاي ممكن تخلي السنين الجاية من حياتها احلى وامتع وانشط سنين..

بعد ما شعرها شاب..

ولاقتني بعد ما اليوم عدى..

بقعد مع نفسي وبسألها ايه؟ بتحلمي بإيه؟!

انت مستوعبة الحلم ده محتاج مجهود ايه ووقت وفلوس قد ايه؟

ولاقتني بطلب من نفسي تاخذ نفس عميق 

وتدي لنفسها مساحة تحلم..

وبقول لها مفيش حد بيجري ورانا..

خلينا نحلم اننا نحقق الحلم ده ما بين سن الخمسين والستين..

خلينا نحلم.. ونسعى ونستمتع..

زي ما عملنا وزي ما بنعمل من وقت ما شعرنا شاب..

تابعوني مرة كمان واخيرة مع ب

عد ما شاب

#بعد_ما_شاب_٢٥

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة