السر وراء وجع الجسم اللي كتير من الناس مش مدركاه

يحصل لك ايه لو كانت فاكر نفسك في مكان ولاقيت نفسك في مكان تاني..

فاكر نفسك ياما هنا ياما هناك وتلاقي نفسك لا هنا ولا هناك..

في منطقة غريبة عنك؟ وكأنك انت مش انت..

عمرك حصل لك كده..؟

خليني احكي لك علشان تبقى معايا على الخط..

المرة اللي فاتت حكيت لك ازاي بعد زراعة الأسنان لاقتني بتمنى..

لاقتني نفسي قوي..

نفسي قوي قوي ازور بيته.. نفسي اروح اكتر مكان حسيت فيه بسلام نفسي..

اكتر سجدة روحي استكانت فيها..

لاقتني مشتاقة قوي اروح اعمل عمرة..

شعري شاب وعمري ما عملت عمرة..

زورت بيت الله الحرام مرة واحدة.. سنة ٢٠٠٤ 

في الحج.. يومها روحت مع امي وزوجي..

وفي زيارة المدينة دوقت حلاوة سجدة ما دوقتش في لذتها تاني..

ولاقتني بعد ما شعري شاب بتمنى اروح عمرة..

وازور المسجد النبوي.. واسجد هناك..

أمي هي كمان كان نفسها تطلع عمرة..

وفكرنا، اخواتي وأنا اننا نطلع عمرة مع بعض..

قلت بس.. تبقى عمرة من طعم خاص مع امي واخواتي..

وربنا الكريم يسر لنا، وسافرنا..

ووصلت المسجد النبوي وصليت وسجدت وشكرت وحمدت..

وبدأنا رحلتنا للكعبة..

وروحت مع اتنين من اخواتي نعمل مناسك العمرة..

خلصنا الطواف ولمست الكعبة وبكيت ودعيت وروحي هفهفت..

وانطلقنا على السعي..

شوط، التاني..

وأنا طبعًا شايفة اني بقى لي ست سنين متواصل بمارس رياضة..

وبالتالي مقتنعة اني هعمل العمرة وارجع وانا لسه كلي نشاط وطاقة.. 

بعد ٤ اشواط لاقتني تعبانة.. 

وبعد الشوط الخامس لاقتني بقول لأخواتي اني محتاجة كرسي..

بصيت لاقيت اخواتي عادي، مكملين ومش تعبانين زيي..

استعجبت، ازاي؟! ده أنا اكتر واحدة مهتمة بصحتي فيهم؟

ده أنا اكتر واحدة رياضية..

ده أنا منظمة الرياضة والنوم والتغذية..

ازاي؟ 

المهم بعد كام دقيقة قمت كملت السعي..

خلصنا الأشواط وجرجرتني لحد الفندق..

ودخلت انام وانا حاسة اني انا مش انا..

جسمي مش جسمي..

كأني داخلة بيت مش بتاعي.. بيت غريب عليا..

روحي وعقلي وقلبي مستغربين.. ايه المكان ده؟

بتاع مين الجسم ده؟

ايه الوجع ده؟ ايه الألم اللي في العضم ده؟

القدم ازاي بتوجع كده؟

طيب وليه جيهان اللي اكبر مني ب ٨ سنين ومش بتمارس الرياضة 

ووزنها اتقل مني، ليه مش تعبانة كده؟

مش اعتراض؟ فهم.. كنت عايزة افهم!

ولاقتني بعد العمرة بروح زيارة لدكتورة لبني العشماوي..

المتخصصة في العلاج الطبيعي التقويمي..

وبحكي لها عن وجع ضهري وقدمي..

والعمرة اللي اتمنيتها بعد ما شعري شاب..

وازاي تعبت فيها..

وازاي جسمي كأنه كان غريب عليا..

ودكتورة لبنى بعد الكشف والإستماع وطرح الأسئلة..

قالت لي جسمك تعبان من الهرمونات..

فيه تغييرات في الهرمونات عندك..وعلشان كده جسمك تعبان..

وعلى فكرة.. جسمك لولا انك اهتمتي بيه خلال السنين اللي فاتت 

كان انهار قبل كده بسنين..

يعني اهتمامك بالصحة ساعد جسمك يصمد سنين..

طبعًا موضوع الهرمونات كان غامض بالنسبة لي.. يعني اعمل ايه؟

ولاقتني بعد ما شعري شاب.. 

ووأنا اقرب للخمسين من الأربعين..

بروح لدكتور امراض نساء..

واسأله اعمل ايه علشان اتعامل مع صحتي في المرحلة دي؟

وبيطلب مني اعيش بنظام صحي..

طبعًا ضحكت وقلت له اكتر من كده ايه؟ ده انا بمارس رياضة بانتظام ونوم واكل صحي..

اعمل ايه اكتر من كده..

الدكتور سألني عن الرياضة اللي بمارسها..

ومسك ورقة وقلم وبدأ يشرح لي ازاي عضمي وجسمي في المرحلة دي محتاج نوع رياضة مختلفة..

رياضة تعمل stretching للعضلات مش تقوية للعضلات..

وطلب مني انتظم في ممارسة اليوجا والPilates السباحة قدر الإماكن..

واقلل من انواع تانية بقت مش مناسبة ليا في المرحلة العمرية دي..

ولاقتني بعد ما شعري شاب..

بقعد مع نفسي واراجع نظام حياتي..

وبفكر هتمرن ايه واوقف ايه واستبدل ايه..

علشان ابقى مرتاحة في جسمي..

ولاقتني بتصل بصديقتي العزيزة هبة انور 

صاحبة براند سمارت فوود..

وبسألها عن الهرمونات.. وبترشح لي كورس لها

فيه شرح عن الهرمونات وازاي نفهم جسمنا ونساعده..

ولاقتني بسأل اصحابي اللي مروا بالمرحلة دي عملوا ايه..

وبسمع تجاربهم ونصايحهم..

وبقعد مع نفسي افكر ايه مناسب ليا وايه مش مناسب..

وبتعلم من كورس الهرمونات..

وبطبطب عليا وبفكرني..

انها مرحلة جديدة..

هنتعلم نتعامل معاها.. واحدة واحدة..

وبفتكر مقولة لواحدة ملهمة ليا اسمها هيلين كيلير 

كانت كفيفة وبتعاني من الصمم..والفت كتب واتخرجت من الجامعة بالرغم من ظروفها..

لاقتني بفتكرها وهي بتقول 

"If I am not there for myself, who will be there for me?”

يعني لو أنا مش هبقى موجودة لدعم نفسي، مين هيدعمها؟

ولاقتني بطمني اننا هنتعلم نتعامل مع المرحلة الجديدة..

لأن شعرنا شاب.. 

وبقى عندنا خبرة اكبر في التعامل مع نفسنا ومسايسة نفسنا وادارة نفسنا ومساعدة نفسنا..

ولاقتني بكتب في الجورنال بتاعي..

قصتي مع العمرة والشوط الخامس، والهرمونات والدكتورة وتغيير نظام الرياضة..

ووأنا بكتب لمبة نورت.. وفكرت اني..

خليني اكمل المرة الجاية فكرت اني ايه..

تابعوني مع بعد ما شاب..

#بعد_ما_شاب_٢٣

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة