عاشت ستات مصر بعد الثورة

"عاشت ستات مصر بعد الثورة.."

"أنا عايزة احيكي واقول لك اني نفسي اعمل زيك.."

"ايه ده؟ ايه ده؟.. ست وراكبة موتوسيكل.."

دي بعض التعليقات اللي سمعتها بعد ما شعري شاب..

كنت في النص التاني من التلاتينات..

وزوجي العزيز قرر يتعلم سواقة موتوسيكلات..

وبقيت اركب وراه..

وبعدها بفترة طلب مني اتعلم سواقة موتوسيكلات..

"أنا.. انسى.. انت فاكرني مجنونة؟"

ده كان ردي.. وهو كان رده 

"يعني مثلًا أنا هعرضك للخطر؟ انت مش واثقة فيا؟"

كنت واثقة فيه الصراحة.. بس مين؟ أنا؟! 

اسوق موتوسيكل في الشارع كده…

جوزي بفضل يكرر نفس الطلب.. 

قال لي إنه نفسه ده يبقى نشاط مشترك بينا..

وإنه ده اهتمامه الحالي وعايزني اشاركه ده.. 

علشان نفضل قريبين.. ومانلاقيش نفسنا بعدنا عن بعض بسبب الاهتمامات المختلفة..

فضلت افكر كام اسبوع..

وبعدين قلت خلاص.. اروح اتعلم بس.. 

ولا هجيب موتوسيكل ولا حاجة.. إنما ريح الزبون..

بلغت جوزي اني مستعدة وإني واثقة فيه وهروح بس علشان اشاركه اهتماماته.. 

وروحت دورة تعليم موتوسيكلات (اللي بيقدمها توقف عن تقديمها خلاص)..

روحت الدورة.. وأول خمس دقايق خبطت في الرصيف ووقعت.. 

ولاقيت المدرب وجوزي بيجروا يطمنوا عليا..

قمت نفضت هدومي وركبت الموتوسيكل وكملت الحصة..

واسبوع ورا اسبوع خلصت الدورة..

في ١٢ مرة.. مش في ٨ زي باقي المتدربين..

وبعدها جوزي صمم يجيب لي Vespa وفضل يمشي ورايا وأنا سايقة في أيام الجمعة الصبح بدري لحد ما اتمرن واتطمن..

وبعدها بقيت اسوق.. بقيت اسوق في الشارع وعلى الكوبري..

اسوق واسمع تعليقات من رجالة زي :"ايه ده؟ ايه ده؟.. ست وراكبة موتوسيكل.."

او زي تعليق من راجل تاني: "عاشت ستات مصر بعد الثورة.."

او زي تعليق من ست شافتني بركن في النادي وقالت لي: "أنا عايزة احيكي واقول لك اني نفسي اعمل زيك.."

ولاقتني في النص التاني من التلاتينات..

بعد ما شعري شاب..

عرفت اتعلم اسوق موتوسيكل..

وعرفت اسوق في الشارع المصري.. 

وأنا لابسة الخوذة وجاكت الوقاية والركب..

لاقتني بتعلم حاجة جديدة..

وعارفة امارسها..

لاقتني كائن قابل للتعلم بعد ما شاب..

ولاقتني شايفة ان ال Vespa وسيلة مواصلات مش بس نشاط مشترك بيني وبين زوجي..

بقيت اروح بيها النادي ولأخواتي.. وكورسات اشتركت فيها..

ولاقتني.. 

بعد ما شاب.. بعد ما شعري شاب

بعمل حاجات اول مرة اعملها..

ومعاها قلبي بيدق.. ومخي بيفرز ادرينالين..

وبحس بحماس وتفاؤل..

وبسأل ايه كمان؟

ايه ممكن اعمله بعد ما شعري شاب؟

ايه ممكن اجربه؟ ايه ممكن اتعلمه؟

جربت ايه كمان؟

استنوني الخميس الجاي.. 

ومقالة جديدة من 

#بعد_ما_شاب_٢

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة