اختيارك دلوقتي ايه لحياة شكلها ازاى؟

وأنا في التلاتينات شاركت في ماراثون تبع مستشفى ٥٧٣٥٧ لسرطان الأطفال..

وكان الماراثون لصالح المرضى..

يومها بعد اول كام دقيقة كنت فرهدت، وبنهج، وتعبانة..

عايزة مياه..عايزة كرسي.. تعبانة جدًا.. تعبانة يا ناس..

بدأت امشي بدل ما أجري..

وفضلت أبص في الساعة..

امتى هخلص؟ امتى هنوصل لنقطة النهاية..

يومها قلت لا أنا مش بتاعت ماراثون.. وقررت ان دي اول واخر مرة..

ومرت سنين ودخلت الأربعين وطبعًا شعري شاب..

وبدأت أمارس الرياضة، من أجل الصحة..

وبدأت أتعرف في دوايري على ناس بتمارس الرياضة..

وواحدة من اصحابي شجعتني انضم لمجموعة Zamalek Early Risers

بقيادة أماني خليل، البطلة المصرية الملهمة الحاصلة على لقب ال Ironman واللي تمت أكبر ٦ ماراثون عالمية..

اتعرفت عليها وجربت انضم للمجموعة بتاعتها.. اجري يا دوب كام متر، واكمل الباقي مشي..

وواحدة واحدة لاقتني بفكر في الماراثون..

مين؟ أنا…؟؟؟

لاقتني عايزة اجرب مرة تانية..

في الثلاثينات كان ماراثون حبي لصالح المرضى..

ويومها تعبت جدًا وكملت اغلبه مش..

بس المرة دي هيكون ماراثون حقيقي، بميداليات ومتسابقين..

وشركة منظمة وتفاصيل..

ترددت كده.. وفكرت شوية اجرب ولا لأ..

وقررت اكلم المدربة العزيزة بتاعتي..

وسألتها لو ينفع ادخل ماراثون و لو ممكن هي تدربني؟

وكان ردها إن ينفع جدًا.. لان لياقتي بقت عالية بسبب ممارستي للرياضة بشكل منتظم لأكتر من اربع سنين..

طلبت منها تدربني.. وبدأنا لمدة شهور برنامج رياضي خاص للتحضير للماراثون..

ومرت شهور الصيف والأجازة، وانا ملتزمة بالبرنامج.. وبسجل تقدمي في المسافة اللي بقدر اكملها.. وسرعتي.. وضربات قلبي..

واشاركها معاها..

وبعد شهور وصلت لليوم الموعود، وروحت الماراثون.. 

وجريت.. ولا احتاجت كرسي، ولا مياه في النص..

ومع نقطة النهاية لقتني بقول We did it.. We did it..

فعلناها.. فعلناها.. حققناها..

المدربة وانا.. لأنها هي اللي ساعدتني استعد للماراثون..

ووقفت يومها اتصور وانا بفكر في الماراثون الأول..

وازاي وقتها كانت لياقتي ضعيفة خالص..

وعضلاتي ضعيفة جدًا..

وقفت وفكرت في شعري اللي شاب..

وكام حد حواليا، بسبب شعره اللي شاب، رافض يجرب اي حاجة جديدة..

ومصدق ان كل ما بيكبر كل ما صحته بتتعب..

طبيعي.. لو أهملنا صحتنا هتتعب..

انما لو بعد ما شعرنا شاب قررنا نهتم بصحتنا صح..

هنلاقي نفسنا صحتنا احسن من صحتنا في العمر الأصغر..

ده مفهوم منتشر عالميًا دلوقتي اسمه Reverse Engineering 

يعني ممكن الإنسان يرجع صحته أفضل من الأول بطريقة حياته واختياراته من نوم وتغذية ورياضة وإدارة الضغط العصبي..

وأنا في التلاتينات تعبت في الماراثون وكنت مش قادرة اكمل.. 

وأنا في الأربعينات كملت.. واحتفلت..

لأني شعري شاب..

ومع شعري اللي شاب استوعبت وصدقت ان اختياراتي بتشكل حياتي..

واني ممكن اخلي السنين الجاية احلى وامتع سنين..

وممكن اخلي السنين اللي جاية اوحش سنين..

يا ترى بنتحجج بشرعنا اللي شاب؟

ولا بيفكرنا نعيش ونستمتع..؟

المرة الجاية اكمل لكم جربت ايه كمان لأول مرة بعد ما شعري شاب..

#بعد_ما_شاب_١٦

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة