هتكمل ولا هتتراجع

الجبال كان شكلها مبهر.. 

كلها شجر ولون اخضر..

فضل السواق يتكلم معانا خلال الطريق.. 

عن بلدهم والأحوال الإقتصادية..

والعربية ماشية بسلاسة…

لحد ما وصلنا.. وشيري اختي وأنا بنتسأل هل هنكمل ولا هنتراجع؟

قلنا هنشوف الأول اذا فعلا هنعملها ولا لأ.. 

نتفرج على ناس قبلنا ونشوف الموضوع تمام ولا ايه؟

ولاقينا لما وصلنا اننا مش هينفع نشوف اللي قبلنا.. محتاجين نحجز التذاكر الأول..

وكمان ندفع مبلغ اضافي لو عايزين الصور والفيديوهات..

قلنا خلاص..ما بدهاش.. طالما وصلنا نجرب..

ركبنا Zipline لحد نقطة التجمع..

وبدأ نشوف المنظمين بيلبسوا الناس حبال وبيجهزوهم..

ووقفت اتفرج وأنا حاسة برهبة..

عقلي قال لي هتعملي ده يا ايمان؟

  ايه؟ Bungee Jump؟ يا ايمان.. فاهمة هتنطي من ارتفاع كام متر؟

طيب وليه الرعب والشحططة دي؟

طيب وايه المتعة في كده؟

طيب مستوعبة ان شعرك شاب؟

طيب يا بنتي إنت خلاص على شفا الأربعين..

مابلاش..

وقلبي؟

قلبي قال لي هنعمل النطة دي..

مش لأنها ممتعة؟ لأ..

لأنها مخيفة.. لأنها مرعبة..

هنط عشان نكسر حاجز الخوف اللي جونا..

عشان نبطل نخاف..

عشان لما الخوف يزورنا نقول له خلاص..

اكتسبنا مناعة ضدك من بعد ال Bungee Jump..

بصيت من فوق ولقيت المشهد مرعب..

وبعد دقايق كان الدور عليا…

ولبست الأحبال وهوب.. ١ ٢ ٣ نطيت..

ولاقتني مدلدلة في وسط جبال جنوب افريقيا..

راسي تحت ورجلي فوق..

لوحدي..

وحواليا صمت رهيب..رهيب..رهيب..

اول مرة اسمع صوت صمت كده..

وبدأ قلبي يدق جامد.. 

وبدأت اضحك.. اضحك..

ولاقتني سعيدة انه اتكسر..اني كسرته وانا بنط..

وبدأ الحبل يترفع.. ورجعت تاني على الأرض وسط الجبال..

ورجعت باحساس مختلفة..

رجعت وانا حاسة اني تحررت.. من الخوف..

ولاقتي بعد ما شعري شاب..

قادرة اعمل ال Bungee Jump.. وسط ناس أغلبها في عمر ولادي..

حسيت يومها بامتنان..

ان ربنا رزقني صحة..

ورزقني الوعي والطاقة اني ابدأ اهتم بصحتي..

بعد ما شعري شاب..

وفكرت ان It's never too late

سواء كنت صغير او كبير..

شعرك شاب او لا..

كنتي أم ولا جدة ولا انسة..

كلنا نقدر نعمل حاجات كتير قوي..

المهم بنعملها ليه..

ال Bungee Jump بالنسبة لي ما كانتش نشاط ترفيهي..

كان تدريب عملي نفسي..

كانت دقايق اتحفرت في ذاكرتي علشان تفكرني اني اقدر..

اقدر اعمل حاجات كتير.. اقدر استمتع.. اقدر اجرب..

أنا أقدر..

انت وانتي وكمان تقدروا..

حتى بعد ما شعركم شاب..

تابعوني والمرة الجاية اكمل لكم عملت ايه كمان بعد ما شعري شاب..

#بعد_ما_شاب_١٥

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة