لما شعرنا يشيب نسيبه ولا نصبغه؟

يوم ٢٥ يناير سنة ٢٠٢٤ بدأت اكتب عن تجارب حياتية وحقيقية مريت بيها..

بعد ما شعري شاب..

تجارب في مجال الصحة وفي مجال العمل..

في مجال الصداقة وفي مجال البيزنس.. 

في مجال تأليف الكتب ومجال الروحانيات..

المشترك بين كل التجارب دي هي ان كلها مريت بيها بعد ما شعري شاب..

وعلى مدار ست شهور كتبت اسبوع ورا اسبوع

كل اسبوع كتبت عن تجربة..

ومع الكتابة عشت التجارب تاني بمشاعرها وذكرياتها..

استمتعت بالكتابة واتمليت حماس بمجرد ما استعدت ذكريات التجارب دي…

الكتابة فكرتني بسنين طويلة عشتها.. 

بمخاوف تغلبت عليها..

بتحديات ربنا سبحانه وتعالى يسر لي تخطيها..

بناس بَكِن لها كل الشكر والامتنان والاحترام..

بمواقف كوميدية مريت بيها..

بحاجات عملتها وبتسأل ازاي جات لي الشجاعة اعملها..؟!

ومع الكتابة كنت بجدد نيتي كل مرة..

ومع كل حرف..

ان المشاركة دي تلهمك.. 

تحمسك انك تجرب..

تغير فكرتك عن السن..

تخليك تتخلص من كلام عفا عليه الزمن زي "ما خلاص كبرنا" و"يعني هناخد زمنا وزمن غيرنا"..

مع الكتابة كنت بتمنى ان الكلمات تشجعك تتغلب على مخاوفك..

وتساعدك تستوعب ان شعرك اللي شاب بيقول لك 

"ياللا بينا نعيش..

ياللا نجرب..

دي حياة هنعشها مرة واحدة..

بلاش كل يوم يبقى صورة من اليوم اللي قبله..

ليه مصمم تخلي الكبر ضعف وعجز..؟

لما ممكن تخليه حكمة ونضج.."

مع الكتابة فتحت قلبي وحياتي..

وشاركتك أهم محطات حياتي على مدار عشر سنين..

ودلوقتي.. وأنا على مشارف الخمسين..

بدعوك انت تجرب..

بدعوك تقرأ التجارب كلها.. 

او تسمعها على قناتي على Soundcloud لو بتفضل الإستماع..

وتختار ولو تجربة واحدة منهم تعيشها..

وتشاركني التجربة.. والمشاعر والأفكار..

وتتحول انت لمصدر الهام لغيرك.. 

في ازاي يعيشوا بعد ما شعرهم شاب..

يا ترى ايه التجربة من التجارب اللي شاركتها اللي هتختار تعيشها؟ 

وليه التجربة دي بالذات؟

ياللا.. سواء شعر؛ شاب او لأ..

ابدأ، جرب، عيش،

كون ملهم.. لأقرب الناس لك اولًا 

وبعدها لكل دوايرك..

ولو ناس تانية كمان عملت زيك..

الدنيا هتبقى احسن..

وافضل…

بسبب الناس اللي بعد ما شعرها شاب..

اختارت تعيش فعلًا.. مش تفضل قاعدة منتظرة المرض والموت..

ياللا.. ابدأ.. عيش..

سواء شعرك شاب او لا

#بعد_ما_شاب_الخاتمة

#العمر

#التعلم

#النمو

#السعي

#التغيير

#الشجاعة

#الجرأة

#الحماس

#الصحة