ايه اللي الدكتور فعمله في مناخيري وجيوبي الأنفية

اني اكمل ماراثون خمسة كيلو كان احد الحاجات اللي كتبتها في ال Bucket list بتاعتي السنة اللي فاتت..

صفحة في كراستي بكتب فيها التجارب والاحلام اللي نفسي اعشها..واحد منهم كان اني اكمل ماراثون خمسة كيلو..

في شهر يونيو ٢١ تواصلت مع مدربتي العزيزة نهى ايهاب وطلبت منها تمرني لدخول ماراثون.. وبدأت تبعت لي تدريبات وابعت لها ارقام عن نفسي وسرعتي ومدة الجري.. 

ومرت شهور وانا بتقدم من كيلو لاتنين لاكتر لحد ما وصلت لخمسة كيلو..طلبت مني اكمل اكتر..ولما سألتها ليه قالت لي علشان الخمسة كيلو في المارثون يكونوا سهلين عليكي..

زودت ووصلت لستة كيلو جري متواصل وتنفسي تمام والحياة حلوة ووصلنا لشهر نوفمبر ولاقتني مش تمام.. 

زكام ولا برد ولا كورونا مش عارفة، انما مش تمام..كل شوية اعزل نفسي عن عيلتي لاحسن اكون عيانة وبعد يومين او تلاتة ابدأ اخالطهم تاني..🤔😅

لحد ما وصلنا لليلة الماراثون وانا تعبانة.. فيا ايه مش عارفة بس عارفة اني مش تمام..🙈

وجيه يوم الماراثون وروحت جريت..كملت الخمسة كيلو ونفسي مش تمام..وفي النص مشيت كام دقيقة علشان ارتاح واكمل جري..🙈

خلصت الماراثون ورجعت البيت ارقد.. تعبانة جدا ومش فاهمة مالي..

تاني يوم روحت للدكتور وكانت لحظة.. فرقت في علاقة..👌

دكتور الانف واذن وحنجرة.. سنه كبير..اكيد فوق الستين..دخلت اتكلم بسرعة واسأل بسرعة..سألني مستعجلة ليه؟ 🤔

قلت له علشان وقت حضرتك.. قال لي بشويش خدي وقتك..بدأ يشرح لي اللي عندي..اخد ورقة وقلم وبدأ يرسم لي الانف والأذن والجيوب الانفية ويشرح لي الجو في الوقت ده من السنة بيعمل فيا ايه..طمني بمنتهى الهدوء ان اللي عندي مش حاجة معدية وان الموضوع بسيط وكتب لي بخاخة ورجعت البيت في حالة سلام وامتنان..

الدكتور..اللي في سن والدي عشت معاه لحظة..لحظة هدوء، حضور، صبر، رفق بالمريض، لحظة احترام للمريض، لحظة احترام لقدسية مهنة الطب.. لحظة تراحم مع مريض تعبان وقلقان.. لحظة احتواء..

يومها مشيت من عنده وانا بدعي لوالدي 🙏❤️بالرحمة..كطبيب كان بيحترم المريض..

ويومها دعيت ربنا يكتر من امثال الطبيب الانسان اللي بيرفق بالمرضى..🙏

ويومها دعيت ربنا يهدي عدد كبير قوي من الدكاترة معاهم وبسببهم اتبرمجت اني محتاجة اتكلم بسرعة واسأل قليل وامشي مش فاهمة قوي لان وقتهم ثمين، اثمن بكتير من المبلغ الباهظ اللي دفعته في الكشف قصاد ٥ دقايق او ٧ بالكتير مع الطبيب..اللي وقته ثمين..

ياللا بينا نتعلم من الطبيب الانسان ده درس الرفق..درس الهدوء.. درس الرقي..بغض النظر عن مهنتنا.. سواء كنا اطباء او معلمين او امهات او مذيعين..ايا كان العمل اللي بنقوم بيه ياللا نزينه بالرفق 👌🙏❤️