الفوضى وعلاقتها بحرف الجيم

الف به ته ثه جيم..

وصلنا لحرف الجيم..في سلسلة من الألف للياء..

حرف الجيم وأنا صغيرة له قصة معايا كل ما افتكرها اضحك..

كنت في ابتدائي في بيت خالة مامتي.. وكان ابنها اكبر مني بسنة.. 

احنا الاتنين كنا بنحب الأفلام والتمثيل..

في يوم شَغَل اغنية "جبار" لعبد الحليم حافظ وقال لي: "ايمان" تخيلي ان فيه حريقة وانك خايفة واصرخي.."

يومها مجرد تشغيل الأغنية بصوت عالي وتخيلي للنار خلاني فعلًا خفت بالرغم من انه تمثيل..

ومن يومها كلمة جبار أول ما بسمعها بقيت احس بالخوف..

مرت سنين لحد ما وصلت لأواخر التلاتينات.. وكنت بقرأ عن اسماء الله الحسنى..

ووقفت عن اسم الله الجبار.. وانه له معاني مختلفة منها انه بيجبر الكسر.. بيجبر الضعيف..

ولاقتني بحس براحة.. بلطف.. بأنس..

ده الجبار مش حاجة مخيفة.. دي حاجة تطمن..

بدأت بعدها اسمع عن جبر الخواطر.. 

بعد ما كنت لسنين طويلة بفكر بس اني اتجنب كسر خاطر حد..

وبقيت افكر ازاي ممكن اجبر بخاطر حد..

في زمن السرعة اللي احنا عايشين فيه 

بقى كتير مننا مستعجل.. بيجري..

بيدوس على ده ويزعل ده ويجي على حق ده..

في حالة جري ولهث..

ليه؟ وعلشان يوصل لايه..؟

ممكن يبقى هو نفسه مش عارف..

طيب بيجري ليه..؟

لأن كل الناس بتجري..

وبقيت جملة كتير قوي مننا بيكررها وكأنه سبب منطقي..

بجري وبكسر بخاطر فلان لأن كل الناس بتجري وبتكسر خاطر بعض..

بعرف ان فلان زعلان ومش بطَّيب خاطره.. ما هو بكرة يروق..

مدرس بيكسر بخاطر طالب..

وأم بتكسر بخاطر طفل..

وعضو نادي بيكسر بخاطر عاملة النضافة..

والدكتور بيكسر بخاطر ابوه..

ايه ده؟ دي فوضى.. 

فعلًا زي فيلم خالد صالح "هي فوضى.."

بقينا في حالة فوضى إنسانية..

ما هو احنا بنكسر بخاطر نفسنا.. فعادي نكسر بخاطر غيرنا..

جيم جبر خواطر…

حاجة كده ثوابها عظيم..

يعني نعمل ايه..؟

يعني نجبر خاطر اللي طابخ اكلة ونقول له تسلم ايدك..

ونجبر خاطر اللي واقف على رجليه بيبيع لساعات طويلة ونقول له شكرًا على الخدمة الممتازة..

يعني لو شفنا حد عنده يوم افتتاح او مناسبة سعيدة نجبر بخاطره ونروح لو وجودنا هيفرق معاه..

يعني الحزين نساعده يفرفش.. والقلقان نساعده يتطمن..

يعني ببساطة نرجع لحرف الألف.. الف انسان.. بيتعامل مع بشر بإنسانية..

مش وَحش مسروع في غابة مستعجل يحقق ارقام ويجيب فلوس ويشتري ويستثمر وهو مش داري باللي حواليه مين زعلان ومين مهموم ومين تعبان..

يعني إنسان في حالة حضور.. بيلاحظ مين محتاج جبر خاطر وبيبادر انه يجبر بخاطره..

مرة الست اللي بتساعدني في البيت قالت لي "ربنا يجبر بخاطرك يا مدام ايمان"..

قالتها وعينيها مليانة دموع.. 

لحظتها جسمي قشعر.. وفكرت قد ايه ممكن حاجة بسيطة تلمس حياة حد وتجبر بخاطره..

ويومها فكرت قد ايه ممكن حاجة صغيرة تكسر خاطر انسان..

يا ترى نفسك الناس تكسر خاطرك ولا تجبر بخاطرك..

ما هي يا ابن ادم الأيام دوَل وكما تدين تدان…

وافتكر انه لا يؤمن أحدكم حتى يحب لأخيه ما يحبه لنفسه..

خليك جّبار للخواطر..

انسان بيسعى وبيتعلم وبيثني على غيره وبيجبر الخواطر…

الف - به - ته -  ثه - جيم…

جيم.. جبر الخواطر…

#من_الألف_للياء_٥_جيم

#مقالة_اسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت