الفوايد التلاتة اللي اهم من الجهاز الهضمي ونظرية داروين وذبابة الفاكهة
أنا والرياضة مش اصحاب خالص..
ده صحيح.. إنما بعد ٤٢ ليا على كوكب الأرض اتصالحنا..
وبقينا رفقاء.. صحيح التمرين مش هاني صاحبي الأنتيخ..
إنما بقى رفيق ليا في الطريق..
وأنا في المدرسة حصة الألعاب كانت دايمًا بعد الفسحة الكبيرة..
وغالبًا في حوش المدرسة.. في الشمس.. والحر..
وحصة الباليه كانت بعد اليوم الدراسي..
وأنا تبدأ الحصة والاقيني عيني على الدكة..
جري ايه يا كوتش؟ حركات ايه يا كابتن.. ؟
أنا مفرهدة وكل تفكيري دلوقتي في الغدا…
يا ترى ست الحبايب عاملة ملوخية بالفراخ ولا مكرونة وبانيه؟
ويا سلام لو بطاطس بالكاتشاب وكوكا مشبرة..!
مرت السنين كده في المدرسة.. وطبعًا كليتي ماكانش فيها نشاط رياضي للبنات..
ولو كان فيها، كنت برضه هختار الدكة..
ومرت السنين وعلاقتي بالرياضة إني اخس..
كل ما اخَلِف حد من ولادي، ابدأ العب رياضة، واعمل دايت..
ودايت ورياضة ورياضة ودايت لحد ما اوصل لوزني قبل الحمل..
عملت كده مع ابني وبنتي، وتُشكَري يا ايمان على التزامك بالرياضة لمدة ست شهور كاملة بعد كل ولادة علشان ترجعي لوزنك وقت ما اتجوزتي..
حد عايز حاجة تاني؟ العب رياضة ليه؟ هو عليا ذنب؟!
فضلت كده لحد ما بدأت اتابع روبين شارما - خبير قيادة الذات العالمي - وسمعته بيتكلم عن العادات والصحيان بدري وممارسة الرياضة للصحة العقلية مش الصحة البدنية..
صحة عقلية؟ ايه الكلام ده؟
واتكلم عن الصيدلية اللي في جمجمة كل حد فينا، اللي ربنا استودعها بشكل مجاني وفوري..
وإن الصيدلية دي بتفتح رشاشات هرمونات وأحماض تفرزها في الجسم بمجرد ما الإنسان يتحرك عشرين دقيقة متواصلة ويعرق فيهم.. يعني حركة فيها مجهود..
وهوب الهرمونات دي تخلي الإنسان ذاكرته اقوى، متفائل ومتحمس، عارف يركز وعارف يبدع وعارف ياخد قرارات ومهارات حل المشكلات عنده تتحسن..
ايه الكلام ده يا عم شارما؟ أول مرة نسمع عن الصيدلية دي؟
دخلانش احنا مدارس ولا ايه؟ ودرسنا الزرع بيتجوز ازاي وداروين والقرد.. ليه ما اتعلمناش عن الجمجمة اللي ماشيين بيها ليل ونهار فوق كتافنا والصيدلية المجانية دي؟
ليه.. يمكن، إذ ربما، العلم دي جديد ووقت ما كنت أنا في المدرسة كانوا لسه معرفوش يدرسوا المخ بالدقة دي..
طبعًا كلام شارما وفيديوهاته والخ…خلوني اسأل هو الراجل ده، بكل العلم اللي بينشره بشكل مجاني على قنواته على السوشيال ميديا وقناة اليوتيوب، ايه عنده فاضل يقدمه في كورسات باشتراك؟
الفضول تملك مني، واشتركت في كورس ورا كورس وزي اليس في بلاد العجائب لاقيت الراجل بيشرح ويشارك ويستضيف متخصصين.. وبيعمل ترشيحات لكُتب..
كتب..؟ تعالى، ده حب كبير قوي عندي.. المهم بدأت اكتب عناوين الكتب اللي اقترحها علشان اشتريها واقرأها.. ومنهم كتاب اللي عنه السطور دي.. كتاب بعنوان "Spark".
الكتاب عنوانه الفرعي How exercise will improve the performance of your brain.
المهم اني اشتريت الكتاب من امازون انجلترا.. ووصل وبدأت اقرأ فيه..
ايه؟ بتقول ايه؟ الدراسات لاقت ايه؟ التجارب أثبتت ايه؟ الرياضة وتقدم السن ايه؟ الرياضة والزهايمر ايه؟
الرياضة والتغلب على ايه؟ الإكتئاب؟! الوحدة؟! القلق؟!
ايه الكلام ده!
الكتاب كان Eye opener!
بجد.. حسيت اني اتضحك عليا، مش أنا، إحنا..
حصة الألعاب اللي كانت مرة ولا مرتين في الجدول..
وفي آخر اليوم الدراسي والواحد مفرهد..
ولما استاذ فلان يبقى عايز حصة زيادة ياخد حصة الألعاب..
ما هو الألعاب مادة مش مهمة زي الرياضيات ولا الفرنساوي..
العاب ايه؟ تيجي ايه الألعاب جنب حلاوة الجهاز الهمضي ولا كان وأخوتها..
وأنا اعيش سنين طويلة فاكرة إني بطيئة التعلم، واتاري الصيدلية مقفولة بالشمع الأحمر!
واتعاقب واتوبخ اني مش مركزة.. واتاري مخي محتاج هرمونات واحماض علشان يركز والحنفية مقفولة بسبب انعدام الحركة!
والكتاب… ابهرني..
الكتاب يا سيدي أثبت إن الطلاب أداء مخهم بيتحسن جدًا بعد لعب الرياضة..
وان قدرتهم على تحصيل المواد العلمية زي الرياضيات والعلوم بتزيد جدًا بعد ممارسة رياضة متواصلة بلا انقطاع لمدة أكثر من عشرين دقيقة.. يعني مش كرة قدم ولا سلة، لأن دي رياضات فيها جري ووقوف.. رياضات فيها استمرارية، زي الجري مثلًا..
وبالتالي مدارس في أمريكا والدول المتقدمة بقيت تحط حصة الالعاب أول اليوم الدراسي وراها على طول رياضيات أو/و علوم علشان الطلاب يحَصَلوا العلم بشكل أفضل، لأن عقلهم بيكون في حالة تعلم هايلة قوي بعد الرياضة..
ده كان محور فصل من فصول الكتاب..
ومع كل فصل لاقتني بفكر فيا وأنا طفلة.. والدكة والألعاب اللي آخر اليوم الدراسي..
ومع كل فصل لاقتني بفكر في كل انسان بيبعت يطلب مني مساعدة أويقول أنا زهقان أو حاسس بإحباط.. أو قلق.. وهو مش بيمارس رياضة.. ومش بيفَعَّل الصيدلية اللي جوا دماغه..
من الكتاب استوعبت فوائد الرياضة.. اللي كانت محصورة عندي في انها وسيلة اني اسَرَع عملية فقدي للوزن.. وهي في حقيقتها أقيَّم من كده بكتير.. الكاتب عرض ٣ عنواين لفايدة الرياضة…مش بس على المخ.. وهما..
١- الفوايد الصحية
مرة قريت ان واحدة مشهورة وفي الستين من عمرها وقعت وما اتكسرتش… بالرغم من كبر سنها.. وده لأنها بتمارس رياضة.. وبالتالي العضلات المحيطة بعضمها حمتها من الكسر..(الرياضة بتحافظ علينا من التعرض لأمراض واصابات..فهيا وقاية بدل ما نتكسر ونتعالج..)
كمان الناس المدخنة.. لما بتمارس رياضة بتلاقي نفسها لمدة بعد التمرين مش مقبلة على التدخين لمدة بعدها..لأن الرياضة بتفرز هرمونات في المخ بتقلل احتياج الإنسان للمتعة اللي بيحصل عليها من السجاير..
والنوم… الرياضة بتسحن جودة النوم، لأنها بتقلل هرمون الكرتيزول…
والتجاعيد (بدل ما نروح نعمل شد وشفط ونفخ وبوتكس وخلافه) التمرين بيعلي افراز الهرمونات وبالتالي بيقاوم تأثير التقدم في السن على الإنسان وظهور التجاعيد..
والأمراض الخبيثة… تخيل إن أكتر عامل ثابت للإصابة بالسرطان هو قلة النشاط البدني..!!
بقيت بتنسى؟ الرياضة بتحسن الذاكرة، و احساس رضا الإنسان عن نفسه وجودة حياته..
2- الفوايد الاجتماعية
- الإنسان اللي بيمارس رياضة وحالته المزاجية بتكون افضل واحساسه بنفسه بيكون ايجابي اكتر وبالتالي بيقبل اكتر على الأنشطة الإجتماعية
3- الفوايد العملية
الموظفين اللي بمارسوا رياضة عندهم احساس بالضغط اقل وبالتالي منتجين اكتر وقادرين على تحمل شغل اكتر
كل ما الضغوطات زادت كل ما زاد احتياج المخ للرياضة علشان يفضل شغال بشكل فعال وانسيابي..
فبالتالي بدل ما نقول انا مضغوط وما عنديش وقت العب رياضة.. محتاجين نخليها انا من كتر ما انا مظغوط انا محتاج العب رياضة واخلق لها وقت
وهيحصل ايه؟ هتلاقي نفسك رجعت شباب تاني.. مش رفيع بس.. لا حاضر وموجود.. وحاسس إنك قوي..
والناس تشوفك وتسألك ايه اللي حصل…؟
تقول لهم اتعلمت من كتاب Spark وروبين شارما.. إنه اتضحك علينا يا معلم في المدارس (بعض أو الكتير من المدارس مش كلها) وطلعت الرياضة مفتاح اساسي علشان اعيش والمع زي النجوم اللي في السما…They spark
والنجمة دورها ايه؟ تهدينا الطريق في الظلام.. زي الصحابة كده لما كانوا نجوم وبأيهم اقتدينا اهتدينا..
إنت كمان بإيدك تكون نجمة، تدل الناس وتنور لهم،
لما تمارس رياضة، الصبح وتشغل الصيدلية اللي في دماغك.. مش يوم ولا اتنين..
لأ، لما ده يتحول الى طقس يومي…
والحمد لله بفضل الله وما توفيقي الا بالله تحولت الرياضة الى طقس يومي.. من بعد ما قريت الكتاب وبدأت اطبق الدرر اللي فيه..
لو عايز تفهم الفرق بين الطقس والروتين والعادة اتفرج على الفيديو ده بشرح فيه الموضوع بالتفصيل..
لينك الجزء الأول
لينك الجزء الثاني
#كتب_غيرت_حياتي_١٩
#اكتر_ناس_الهمتني
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
