العشرة اللي في الخامسة اللي يعدلوا ميزان حياتك!

"مامي احصي… مامي.. مامي.. احصي.."

جملة ملك بنتي كانت بتكررها كل يوم اجازة وهي لسه طفلة.. مع تكرار الجملة بصوتها الطفولي كانت بتمسك جفوني وتحاول تفتح لي عينايا.. وأنا امتعض واعترض وابص في الساعة الاقيها ٨ الصبح.. يوم الأجازة ٨ الصبح ليه يا ملك؟ هو عليا ذنب؟! وطبعًا كانت بتقول احصي مش اصحي.. :)

مكنتش اتخيل وقتها، إني أنا إيمان وأنا في كامل قوايا العقلية، بعد الفترة دي بعشر سنين هكون بصحى الساعة خامسة صباحًا يوم الجمعة، والأجازات الرسمية، والعطلات الصيفية.. علشان ايه.. علشان اتمرن واتأمل واتعلم!!

يا ترى قادر تتوقع ايه الكتاب اللي عمل فيا كده.. واللي هو موضوعي النهاردة؟!

كتاب طبقت عنوانه قبل ما يكون جاهز للنشر ب٣ سنين.. عشت دروس منه قبل ما المؤلف يكمل كتابته… وتسألت ايه هيكون جديد في الكتاب يعني بعد كل الكورسات اللي اخدتها مع المؤلف وكل الفيديوهات والإيميلات والمقالات اللي قرأتها له..

ولما جبت الكتاب الصراحة انبهرت!

"نادي الخامسة صباحًا" كتاب من الأكثر مبيعًا في العالم، لخبير قيادة الذات روبين شارما. أول كتاب قرأته له كان في ٢٠١٠، وبدأت احطه في التطبيق ولمست التغيير في جودة حياتي وأفكاري وبقيت من المتابعين الدائمين له.. اتفرجت له على فيديو على اليوتيوب في ٢٠١٦ وكان بيشرح فيه موضوع الساعة ٥ صباحًا.. وازاي ان الواحد يحط نفسه اولوية، ويهتم بنفسه والناس لسه نايمة وقبل ما يبدأ مهام اليوم سواء من شغل أو التزامات عائلية. يحط نفسه أولًا ويدي لها ساعة أول اليوم من ٥ ل ٦ صباحًا.. والساعة دي يقسمها ل٣ اجزاء، عشرين دقيقة رياضة يعرق فيها علشان يحفز مخه يفرز هرمونات تساعده على التركيز والحماس والإبداع والفاعلية.. وعشرين دقيقة يعمل فيهم جلسة تأمل، يصلي، يفرغ في مذكرة أفكاره ومشاعره، والعشرين دقيقة التالتة يتعلم فيهم.. وبكده كل يوم يكون اهتم بجسمه وروحه ومشاعره وعقله.. ويبدأ اليوم وهو مليان.. وهو On fire..

اتفرجت على الفيديو وبعد شهور من المقاومة واختلاق الأعذار، فكرت اطبق الموضوع ده يوم..يوم واحد بس.. ولاقيت اليوم لطيف ومثمر جدًا.. كررت الموضوع تاني يوم وفضلت كده لحد يومنا هذا!

طيب والكتاب؟

الكتاب قرأته في ٢٠١٩، بعد انضمامي لنادي الخامسة صباحًا ب٣ سنين… ولما نزل تسألت هيكون فيه ايه يا ترى؟

ولاقيت روبين شارما مجمع في الكتاب ملخص ثري لتقريبًا كل حاجة قدمها في الكورسات الأونلاين اللي اشتركت فيها معاه واللي دفعت فيها الآف الدولارات على مدار السنين.. وسألتني:" إيمان.. ازاي حط كل العلم ده في كتاب بسعر يعتبر زهيد جدًا بالنسبة للمحتوى اللي فيه؟!" وكانت اللمبة اللي نورت انه عايز الناس تستفيد، تتعلم.. اللي يقدر يدفع تمن الكورسات يشترك، واللي ظروفه المادية مش مناسبة، يقدر يلاقي درر في الكتاب.. كتاب كل فقرة فيه مفيدة جدًا.. ومحتاج نقراه بحضور ونفكر ازاي نطبقه حتة حتة، واحدة واحدة، تاتا تاتا.. لأنه مليان كنوز..

لما قرأت الكتاب لاقيت اني الحمد لله كنت قطعت شوط كبير في التطبيق بسبب انضمامي للكورسات خلال السنين اللي قبلها وسعيي لتطبيقها.. انما كان ناقصني حاجة بسميها Fine tuning… اللمسات الأخيرة… زي كده ما ترزي يكون عامل بدلة وفاضل انه يقفلها.. كانت حياتي لاقت الإيقاع بتاعها مع الخامسة صباحًا.. إنما كان فاضل التقفيل والتجانس بين الإستراتيجيات المختلفة اللي مطروحة في الكتاب.

نيجي بقى لأهم ما في الموضوع وهو.. ايه أهم دروس طلعت بيها من الكتاب..

١- فقه الأولويات.. اني مخليش الإهتمام بنفسي وصحتي العقلية والقلبية والروحية والبدنية في مهب الريح.. مش اخر حاجة في قايمة اليوم بتاعي.. لأ، تكون أول حاجة.. لأن صحة الإنسان هي أكبر ثروة يمتلكها، وللأسف اغلبنا مش بيستوعب ده غير بعد فوات الآوان…

٢- إن نجاح يومي بيبدأ من الليلة اللي قبلها… علشان اصحى واعيش يوم منتج وناجح، محتاج اراعي عادات النوم واحضر من بالليل اللي هحتاج له الصبح… 

٣- إن الأكل اللي باكله محوري.. نوعية الأكل ممكن تسحب مني طاقة وتأثر على سلامي النفسي وعلاقاتي وانتاجيتي وممكن بالعكس تديني طاقة.. وبالتالي محتاجة اختار بوعي بستخدم جاز ولا سولار ولا بنزين ٨٠ ولا ٩٢ ولا ٩٥ كمصدر طاقة ليا..

٤- تقسيم اليوم وتحديد أولوية لكل فترة.. دي فترة الاهتمام بصحتي.. دي فترة شغلي، دي فترة عيلتي.. دي فترة الهوايات.. مش كله سايح على بعضه.. 

٥- النوم والنوم وكمان النوم.. والمعجزات اللي بتحصل في مخنا خلال النوم واحنا مش داريين من صيانة للخلايا وفرز هرمونات للذاكرة ومقاومة العجز وخلافه.. جودة النوم وتوقيته مش بس عدد ساعات النوم..

٦- ازاي اشتغل Smart not hard.. اشتغل عدد ساعات أقل بتركيز عالي وبدون مشتتات… اقفل الموبايل وامتنع عن التواصل مع الناس طول ما أنا مركزة علشان اشتغل بعمق وفاعلية وانجز أسرع وبالتالي يبقى عندي وقت اكتر لحياتي الشخصية..

 ٧- إن أغلب الناس عايشة ومش عايشة.. بتتصرف بدون وعي، بدون، بدون تفكير في تبعات تصرفاتهم.. فيكون عندي الشجاعة إني اكون من القليل.. اللي بيختار يعيش حياة صحية، حياة بوعي… حياة بتحضره لمستقبل مشرق بإذن الله…

٨- إن تكوين العادة بيحتاج ٦٦ يوم.. وإن الفترة بتاعت تكوين العادة بتستهلك من الإنسان وقت وطاقة ذهنية عالية جدًا في الأول لحد ما تتحول لعادة.. وهوب أول ما بقت عادة تبطل تستهلك طاقة.. وبالتالي محتاجين نصبر على تكوين العادات في الأول وبعد كده هتبقى سهلة وبنعملها بعفوية..

٩- إن الوقت اللي بكون فيه عايزة استسلم.. اقول طز في كل حاجة، بلا صحيان بدري بلا رياضة بلا تأمل.. هو ده أهم وقت التزم فيه وأكمل، أني لو كملت هكون عديت حاجز جديد/أعلى في قوة الإرادة والمثابرة وبالتالي هبقى اقوى وعندي جلد ومثابرة اكبر..

١٠- الحياة بروحين.. روح المقاتل وروح الشاعر.. بمعنى إن تكون حياتي مواسم.. موسم اكون بشتغل فيه واجتهد وازرع واعرق.. وموسم تاني استرخي فيه وارتاح واتأمل والعب واسافر واقضي وقت مع احب الناس ليا.. وبالتالي ما تبقاش الحياة كلها جد في جد ولا كلها لعب في لعب..

طبعًا الكتاب مليان مليان مليان..

لو ما قرأتهوش، اقراه.. انما لأنه مليان بقترح إنك

١- تقرأ حاجة لروبين شارما الأول علشان تفهم طريقته وتستوعب منهجه ومدخله.. وبعدين تقرأ الكتاب ده..

أو

٢- تقرأ الكتاب ده، انما حدد لنفسك هتطبق ايه منه خلال أول ٣ شهور.. وحط كده أهداف لكل ٣ شهور.. ولو ٣ شهور قصيرين.. خليهم ٦ شهور.. أو سنة.. المهم انك تطلع منه بخطة للتطبيق.. لأنه كتاب ثري جدًا جدًا وعامل زي الحمام المحشي فمحتاج يتمضغ كويس قوي علشان يتهضم.. 

يا ترى انت نايم ولا صاحي..؟

عايش فعلًا ولا كل يوم بتحاول تزق اليوم؟

يا ترى اخبار صحتك ايه؟

ويا ترى لو نفسك من المستقبل جات زارتك دلوقتي هتشكرك ولا هتعاتبك؟

الفيديو اللي اتفرجت عليه لروبين شارما في ٢٠١٦ وحياتي اتبدلت بعده اللينك بتاعه هنا 

https://bit.ly/3xwcGEI

فيديو كارتوني بيلخص الكتاب بالإنجليزي موجود في اللينك ده

https://bit.ly/39sBBAY

ملخص الكتاب باللغة العربية موجود في اللينك ده..

https://bit.ly/3aZTffE

جلسة تأمل بصوتي بعنوان "Your future self" باللغة العربية على ساوند كلاوود موجودة هنا..

https://bit.ly/3NYqRt6

 #كتب_غيرت_حياتي_٢١

#اكتر_ناس_الهمتني

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر