العادة اللي تخليها عبادة لو شفتها بمنظور مختلف

وأنا طفلة كنت بحب اتفرج على التلفزيون جدًا.. 

كنت بستنى يوم الخميس يجي علشان اتفرج على الفيلم العربي بعد رجوعي من المدرسة.. 

ده كان اليوم الوحيد اللي أمي بتسمح لي فيه اتفرج على فيلم في التلفزيون..

اسبوع ورا اسبوع وسنة ورا سنة بدأ العالم بتاعي ينحصر في اسماعيل ياسين ورشدي اباظة..

وتحية كاريوكا وسامية جمال..

ومع وصولي لسنة خامسة ابتدائي كتبت في موضوع التعبير اني عايزة اكون زي سامية جمال..!

أمي طبعًا اتفاجئت باختياري وهي بتمضي على ورقة التعبير..

والمفاجأة نبهتها ان فيه حاجة محتاجة تتغير.. وان العالم بتاعي محتاج يوسع..

بدأت بعدها تشترك لي في مجلة كابتن ماجد.. وتساعدني الاقي فضولي المستخبي بين الصور..

وبقت تاخدني كشك الأهرام اختار الغاز..

وبعدها لما كبرت شوية بدأت تجيب لي روايات..

وواحدة واحدة من غير ما احس لاقتني العالم بتاعي بدل ما يكون بين الشاشات.. بقى بين الكتب والروايات..

لما كبرت لاقتني قلبي متعلق بالكتب..

ولاقتني ممتنة لأمي جدًا انها حببتني فيهم ووسعت افقي بالعالم ده..

حرف المرة دي حرف القاف..

قاف "قراءة"..

قراءة ربنا امرنا بيها مع اول كلمة نزل بيها الوحي على رسولنا الكريم عليه الصلاة والسلام..

نقرأ القرآن ونقرأ في علوم الحياة ونقرأ في أمور تانية..

نقرأ ونتعلم ونرتقي..

لما بفكر ان العلماء ورثة الأنبياء.. بفكر في العلم والعلماء..

وبفكر في القراءة كعبادة.. مش بس كعادة..

بفضل ربنا ثم امي القراءة تحولت الى شىء ممتع بالنسبة لي..

ومع سن الأربعين بقيت القراءة عادة يومية.. بجدد نيتي فيها واشوفها عبادة..

واطلب من ربنا سبحانه وتعالى يعلمني اللي ينفعني ويلهمني استخدمه في نفع غيري..

لأني مستوعبة إني انسان.. دوره في الأرض السعي.. وان السعى ده سوف يرى..

قد ايه في حياتنا بنقرأ؟ كل يوم؟ كل أسبوع؟ كل شهر؟ 

والأهم بنقرأ ايه وليه..

خلينا نفتكر ان على نياتكم ترزقون..

وواحنا بنختار كتاب نفكر ليه الكتاب ده؟ 

علاقته ايه بسعينا في الأرض؟

ولو مش بنقرأ خلينا نفتكر إن الإنسان المتعلم اللي قادر يقرأ ومش بيقرأ ما يفرقش حاجة عن الأمي اللي مش بيعرف يقرأ..

فخسارة ربنا يتفضل علينا بالقدرة على القراءة وبالبصر وما نشكرك النعم دي باننا نقرأ ونفيد نفسنا ونفيد غيرنا..

الناس اللي في عيلتنا الكبيرة.. عيلة اسمها الإنسانية..

قاف اقرأ.. خلي القراءة عادة.. وارتقي بيها تبقى عبادة..

#من_الألف_للياء_٢١_قاف

#مقالة_أسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت