الخمس عناصر اللي كلنا محتاجين لها كبشر
خشبة مسرح وجمهور وهدف .. وإنت ممثل.. شئت أم ابيت، كل حد فينا ممثل.. واقف على خشبة وبيعمل تسويق لحاجة..
ممكن يكون مُنتَج وممكن تكون فكرة، أو ممكن يكون خُلُق، أو عادة سلبية..أو موضة جديدة..
المشترك بيني وبينك، بين كل حد من سكان الكوكب هي العناصر دي، خشبة المسرح، وجود هدف، الجمهور اللي بيتفرج عليه وطبعًا الممثل اللي هو كل حد فينا..
مفهوم اتعرفت عليه من أول كتاب اقرأه في موضوع كان بعيد عني جدًا، وموضوع مش ممتع بالنسبة لي..
وتخيل بالرغم من كده، الا لأن الكتاب كان تحفة، حبيته وطبقته، لأ وكمان قدمته في ورشة عمل!
ايوه، زي ما بقولك لك كده..!
ازاي بقى يا عم الفنان الناس تاخد بالها منك و تسمع رسالتك وتتجاوب معاك؟
وازاي يحصل ده بطريقة توفر بيها وقتك وجهدك وتحافظ على تركيزك وانتاجيتك؟
في ٢٠١٦ كانت أول مرة ليا اقرأ كتاب لمايكل هايت. الكتاب بعنوان "Platform"
وكان اول كتاب تسويق أقراه..
بعد ما حضرت كورس عن الشغف، اتطلب مننا كلنا نقرأ الكتاب ده.. والكتاب كان مش متوفر في مصر، بعت جبته من بره، وبدأت اقرأه واعجبت جدًا بطريقة الكاتب المبسطة والمحتوى اللي مكتوب بتسلسل منطقي، والخطوات العملية اللي عرضها. خلصت الكتاب وبدأت احوله لخطوات اطبقها…و في رحلتي لتطبيقه اتعرض عليا اول عرض شغل بالشغف..!
احكي لك..
اتعرض عليا اروح اقدم تلخيص الكتاب لناس اخدت كورس الشغف زيي. منهم اللي مش عارف يجيب الكتاب من بره، ومنهم اللي القراءة بالإنجليزي صعبة بالنسبة له ومنهم اللي القراءة مش خفيفة على قلبه. وبما إني الحمد لله بحب القراءة وبقرأ بالإنجليزي وعرفت اجيب الكتاب وكمان كنت بدأت اطبقه، اتعرض عليا اروح اقدمه. قبلت العرض وروحت من باب الحب. من باب مساعدة غيري من باب شكر النعمة. حَضَرت ورشة عمل عن الكتاب وازاي نلخصه في خريطة ذهنية وازاي نطبقه ونجدول الخطة بتاعت التطبيق. وروحت قدمت الورشة والناس استفادت جدًا. وفي اخر الورشة لاقت ظرف بيتقدم لي فيه أول فلوس وصلتني من الباشون.
الفرحة ماكانتش من الفلوس كفلوس. الفرحة كانت من السعادة إني قدرت افيد غيري وانهم استفادوا. وإن يوصلني رزق حلال بسبب حب القراءة اللي امي غرسته فيا واللغة الإنجليزية اللي ابويا صمم اروح احسنها في المعهد الثقافي البريطاني. وبسببهم بقيت احب القراءة وتلخيص الكتب. ولاقت ان مهارة عندي وهواية بحبها فتحت لي مجال شغل. ومنها بدأت اقدم كورس بعنوان Books to practice عن ازاي نختار ونقرأ ونلخص ونطبق الكتب!
يعني بالبلدي وبلغة فؤاد المهندس في فيلم عائلة زيزي :"الماكنة طلعت قماش"!
هل كل كتاب ينفع نعمل معاه كده..
آه ولأ.
آه، ممكن كل كتاب تلخصه وتقدمه في ورشة، انما لأ مش شرط كل كتاب تلاقي جمهور عريض عايز يتعلمه او يفهمه او يطبقه.
في حالة كتاب مايكل هايت ده، كان اللي واخد كورس Passion to profit مهتم يقرأ الكتاب. ليه لأن ببساطة منهج ممتع في التسويق للمبتدئين.
طيب ايه المنهج؟ وازاي هو مناسب لنا كلنا، كبشر مش بس كأصحاب بيزنس..؟
الكتاب شرح اننا، كل حد عنده بيزنس صغير، عامل زي الممثل، والسوشيال ميديا هي خشبة المسرح، وفيه جمهور مستهدف من صاحب البيزنس وفيه هدف لصاحب البيزنس..
وقتها كنت بقرأ الكتاب علشان اعمل تسويق لروايتي، وقتها مكنتش اعرف اني هستقيل وابدأ شركتي الخاصة ويبقى عندي موقع واكاديمية تعليمية اونلاين وكل الكلام ده. وقتها كنت بقرأ الكتاب علشان اعمل تسويق لروايتي Fabulous Veils.
وقتها كنت انا صاحب العرض، خشبة المسرح هي صفحة الفيس بوك، الجمهور هو السيدات والرجال اللي نفسهم يربوا بناتهم وولادهم احسن بالإضافة اللي البنات اللي عايشة في تعاسة وقهر… وهدفي كان حركة مجتمعية.. صرخة تصحينا من الطريقة المشوهة اللي بنربي بيها ولادنا.
وبدأت اقرأ الكتاب والكاتب قدم ٥ عنواين اساسية، وعرض تحتهم ٦٠ استراتيجية نعملهم علشان الجمهور يتفاعل معانا ويشوفنا.. عنوان الكتاب الفرعي بيقول Get noticed in a noisy world.
العناوين الأساسية كانت:
- ابدأ بطريقة مبهرة
- استعد للإنطلاق
- ابني قاعدتك
- وسع مجال انتشارك
- خلي جمهورك يتفاعل معاك
لما قرأت الستين استراتيجية، عملت جدول للشهور وبدأت اوزع كل واحدة على الشهور، ما بين شهر اغسطس وشهر فبراير اللي بعده.. واتفقت من نفسي اننا نستمتع بتطبيق الكتاب، مش نضغط نفسنا.. ما فيش حد بيجري ورانا.. وعلقت الخطة قدامي وبدأت شهر ورا شهر اعلم على اللي خلص، واطلب مساعدة في اللي محتاسة فيه والغي اللي لاقيته مش مناسب ليا..
ومن بعدها بقيت من اشد المعجبين بالمؤلف.. لأنه اسلوبه سلس ومنطقي وعملي..
بس كده؟ لأ لإنه منظم وبيشرح ازاي تعيش كتبه وتدمجها في حياتك..
بس كده؟ لأ.. لانه بيدعوا الى التوازن. بيعلم الناس مهارات تساعدهم يقللوا وقت الشغل، علشان يبقى عنهم وقت مع أسرهم واصحابهم، علشان ما يتحولش البيزنس هو حياتهم، علشان يبقى البيزنس جزء من حياتهم.
بس كده؟ لأ.. لأن الكاتب بيشرح اهمية إن يكون عندك غاية ورسالة فعلًا قيمتها عالية علشان الناس تلاحظك.
بس كده؟ لأ.. لأن الكاتب بيؤكد إن المنتج أو الفكرة أو الخدمة اللي انت بتقدمها ضروري تكون حلوة جدًا ومفيدة وفعلًا الناس محتاجة لها وانت شخصيًا بتستعملها، لأن ده هيخلي لها مصداقية عالية..
بس كده؟ لأ..كمان مايكل شرح اهمية إن يتكون المنتج أو الفكرة لها تأثير ايجابي على المجتمع..
يا ترى إنت صاحب بيزنس؟
لو ايوه، الكلام ده هيكون سهل او مفهوم بالنسبة لك..
طيب ايه علاقة الكلام ده بينا كبشر عاديين مش اصحاب بيزنس..
هنا الفكرة..لب الموضوع!
الفكرة إن كل حد فينا صاحب بيزنس وعنده منتج وفيه جمهور وعنده قنوات عرض..
أم مش بتشتغل = البيزنس صناعة جيل جديد، المُنتَج ولادها، المسرح كل مكان هي بتظهر فيه، قنوات العرض كل مكان ولادها بيظهروا فيه، الرسالة هي الهدف من تربيتها، والجمهور المستهدف هو كل شخص بيتعامل مع ولادها..
كل حد فينا صاحب بيزنس.. الطالب، الأم، الدكتور، السواق..
مطلوب مننا ايه.. اننا نراجع بنعمل ايه وليه..؟
مطلوب مننا ايه، نشوف منزعجين بسبب ايه في الدنيا ونقدم منتجات تقلل او تعالج الإزعاج ده..
بدل ما تلعن الظلام، نور شمعة..
بدل ما تتنمر على جيل الشباب قوم قدم لهم خدمات تملا عقولهم وتستفز قدراتهم..
انت ممثل (مش بوشين او كذاب) انت ممثل لدينك علي الأرض.. ممثل لأفكارك ومعتقداتك..
ودي اهم واعظم حاجة تعمل لها تسويق في الزمن اللي احنا فيه حاليًا..
من النهاردة ابقى ركز في دورك كممثل، في جمهورك ورسالتك واستخدم خشبة مسرحك (قنوات السوشيال ميديا بتاعتك) بفقه وحكمة وذكاء يعكس قيمك كممثل لأفكارك ومعتقداتك ومنتجاتك.
لو عايز تتعرف على رحلتي مع الباشون وازاي بدأت واتحركت بفضل ربنا والإستراتيجيات اللي اتبعتها لحد ما روايتي طلعت للنور دوس اللينك ده
#كتب_غيرت_حياتي_١٥
#اكتر_ناس_الهمتني
#كتابة
#قراءة
#تعليم
#تطبيق
#مجتمع
#كن_إنسانًا
#سيب_اثر
بعاداتي باصمم حياتي
سلسلة بعاداتي باصمم حياتي - ١٧ حلقة هدية للتعرف على كيفية تبني العادات والإلتزام بها
