الحاجتين اللي لو حصلوا تدخل قلب الناس من اوسع باب

"من فضلك يا مامي ما تحاوليش.."

جملة ملك بنتي قالتها لي ن كام سنة ردًا على موقف كنت بحكيه.. كان موقف يضحك.. حكيتهولها… وهي ماضحكتش.. ونصحتني ابطل احاول في موضوع الضحك ده لأنها مش منطقتي..

طيب إيه العمل؟ أنا عايزة اتعلم اضحك الناس.. محتاجة انهم يضحكوا.. اعمل ايه وبنتي بتقول لي انسى الموضوع ده، يعني مفيش مني أمل..!

نرجع لورا شوية.. ليه محتاجة اضحك الناس؟

كتاب كنت قريته، وكانت فيه المؤلفة بتشرح فن التحدث، كتاب اسمه "The Message of You"، وقالت حاجات كتير عن الرسالة والجمهور والُمتَحَدث والأدوات .. انما وقفت وشدت كذا خط تحت موضوع الضحك.. ووضحت إن لو الناس ضحكت معاك خلال الدقيقة الأولى من حديثك، يبقى انت دخلت قلبهم وهيرتاحوا لك ويسمعوا منك وهما في حالة ايجابية.. وبالتالي الرسالة هتوصل وإنك هتنجح..

طيب بما إن طبيعة شغلي بتعتمد على الكلام.. ونفسي ادخل قلب الناس، شفت اني محتاجة اضحكهم.. وجات بنتي نسفت لي الفكرة..وطلبت مني ابطل حتى احاول.. 

مرت أيام وأنا بقرأ الكتاب وبحل التمارين بتاعته.. وبدأ الكتاب يتكلم علي حاجات مختلفة، أنواع المتحدثين، ونوع الحديث، والقواعد البسيطة للتحدث والأدوات اللي ممكن نستخدمها.. وبعدين دخل في حياتنا احنا كمتحدثين والصعوبات او المحن اللي مرنا بيها، والخط الزمني بتاع حياتنا.. ولاقتني تمرين ورا تمرين بدل ماضحك ببكي.. ايه الكتاب ده؟!

ومع القراءة والكتابة والتمارين لاقتني بتمنى اكون من نوع من المتحدثين اسمه ال Survivors، النوع ده بيكون في سعي إنه يساعد غيره، يلهمهم، يخفف آلامهم. والجميل ان النوع ده لما بيتكلم ويساعد الناس، هو نفسه بيطيب. 

الكتاب مع تمارينه ضحكت وبكيت..وفضلت احل وازور الخط الزمني بتاع حياتي..

ولاقتني بعد ما كنت شايفة خبرات أو مواقف في حياتي صعبة، لاقتني شايفة إنها كانت ترقية وصناعة.. فهمت إن المحنة منحة، وإن كل تحدي كان إعداد لمرحلة جاية.. 

الكتاب ساعدني أفهم نفسي اكتر.. واستوعب قوة الكلمة.. اللي زي السهم ممكن تمَوت.. ممكن تجرح جرح غائر.. اللي لما بينطلق مش بينفع نوقفه..  والكتاب برضه ساعدني افهم قوة الكلمة في إنها تحرك شعوب وتوقف حروب وتفرق في مصير أمم. 

خلصت الكتاب وبدأت افكر إني عايزة اتمرن، عايز أمارس التحدث.. عايز تدريب علمي مش بس على الورق..

اشتركت في كورس بعنوان Super speakers وفيه عملت التدريب العملي.. واتعملت تكتيكات واستراتيجيات مختلفة في التحدث.. وبعدين قلت نتكلم بقى.. نطلع على المسرح.. عملت ايه.. عملت تصميم لصورة اسمها Vision board وحطيت فيها صورتي وأنا بقدم Tedx talk وطبعت الصورة وعلقتها قصادي على المكتب.. كام يوم ولاقيت بنت بتتواصل معايا، بتقول انهم من فريق Tedx جامعة القاهرة بتطلب مني لقاء علشان اكون معاهم في Tedx Event!

طبعًا مصدقتش نفسي.. كنت لسه عاملة الصورة من كام يوم!

روحت قابلتها واتفقنا وبعد كام يوم بدأنا تدريبات ولقاءات ولاقتني على خشبة مسرح بقدم  Tedx talk.

يومها كان زي الإمتحان.. بس امتحان ممتع.. جربت اللي اتعلمته من الكتاب ومن كورس التحدث.. حسيت ضربات قلبي بتتسارع واني مليانة حماس.. وبعد ما خلصت لاقيت طلبة من الحضور جايين يشكروني.. وبعدها وصلني الFeedback ان الكلمة بتاعتي كانت افضل الكلمات في الحدث ده..!

ليه بشارك معاكم ده؟

لأسباب كتير..

ملك بنتي قالت لي ماتحوليش، ده مش ملعبك.. والكاتبة قالت ضحك الناس تكسبهم..

وأنا فعلًا الضحك مش منطقتي.. بس ده ماوقفنيش.. 

ماوقفنيش إني اقرأ الكتاب واحل التمارين الكتير اللي فيه.. وإني أختار نوع المتحدث المناسب ليا، ال Survivor مش ال Entertainer.. واني افكر كويس ليه عايزة انمي مهارة التحدث واشارك الخط الزمني بتاعي مع الناس ونيتي ايه.. ليه نفسي اخفف الآلم اللي حاسين بيه..

وبعد القراءة والحل، فكرت اتمرن تاني في كورس، وبعدها اجرب عملي.. واحلم بفرصة واحول الحلم لصورة عقلي الباطن يشوفها كل يوم.. ولما الحلم يتحول لفرصة اقبل الفرصة بدل ما اخاف او اقول مش مستعدة، اشمر وانط في البحر وانا مجددة نيتي.. وضربات القلب لما تعلى اقول لنفسي دي مش ضربات خوف، دي ضربات حماس، إننا نساعد غيرنا..ونخفف آلمهم..

والنتيجة ايه؟ توفيق من ربنا سبحانه وتعالى، وتطلع احلى كلمة..

وتمر الأيام وبنتي تحضر معايا معسكر.. 

وبعد محاضرة فيه، تيجي تقول لي "لأ على فكرة اتحسنتي.. فيه أمل.. سمعتهم بيضحكوا كذا مرة.."

واضحك وتضحك.. 

وافتكر ازاي الناس ضحكت وبكت وفتحت قلبها وشاركت آلامها واللي فضفضت واللي طبطبت..

وقلبي يسجد امتنان لربنا… انه يسر لي اقرأ الكتاب، وافهم اني مش Entertainer وان الدور اللي نفسي اكونه هو شخص بيخفف الآم الناس النفسية… وروحي تسجد امتنان ان ربنا استخدمني..

كتاب وتمارين وخط زمني..

وكورس وتدريب و كلمة في Tedx Event

فتحوا عنايا على دواء أرواح الناس محتاجة له في الزمن اللي احنا فيه..

وفتحوا قلبي اني اكون معالج بيستخدم الدواء ده..

ويكون تأثيره مزيج من البكاء والضحك علشان الروح تطيب والقلب يتطمن..

يا ترى بتتكلم مع مين وبتقول ايه…

يا ترى كلمتك سهم ولا دواء..

ويا ترى بتقرأ ولا…

ولو بتقرأ بتحسن اختيار الكتب ولا..

ولو بتحسن اختيار الكتب، بتطبق ولا..

ولو بتطبق، بتحلم ولا..

ولا بتحلم، حلمك لنفسك ولا لعيلتك ولا…

لو عايز تتفرج على كلمتي في Tedx Event دوس اللينك ده

https://youtu.be/-Wrk4Gw5VbY

لو عايز تفهم اكتر عن ال Vision board دوس اللينك ده

https://bit.ly/3LnZ0RE

#كتب_غيرت_حياتي_١٦

#اكتر_ناس_الهمتني

#كتابة

#قراءة

#تعليم

#تطبيق

#مجتمع

#كن_إنسانًا

#سيب_اثر