التعلق الصح... والدرس المؤلم

ابني فاروق هو البكري.. الكبير.. وهو ابني الوحيد.. 

من وهو طفل رضيع وهو انسان مريح.. وكبر وبقى شاب حنين مريح..

ولما اتخرج من الجامعة اتخرج راجل طيب، مجتهد، محب للعلم، حنين ومريح..

وبعدين؟ 

وبعدين ربنا وفقه وحصل علي منحة يعمل الماجستير والدكتوراة بره مصر..

منحة مدتها خمس سنين..

فرحت له جدًا ان ربنا وفقه في المنحة وان زي ما امي علمتني هو شاف ان "لكل مجتهد نصيب"..

وجيه يوم السفر.. ولحظة الفراق..

ورجعت من المطار وانا حاسة ان حتة مني سافرت..

واني رجعت البيت مش زي ما سبته..

اول كام يوم قعدت افكر بالمنطق..

واقول لنفسي احمدي ربنا يا إيمان.. ابنك عايش.. ومسافر منحة يعني متفوق.. مش مسافر علاج مثلًا..

ومرت اسابيع وانا شغالة بالمنطق.. وقلبي تعبان..

تعبان من الفراق.. 

حرفنا المرة دي حرف الفاء.. فاء فراق..

قلبي كان تبعان منه جدًا..

بقيت من بره عندي ثبات انفعالي.. 

انما من جوه مشاعري عاملة زي التور اللي رايح جاي في حلبة المصارعة..

بقيت اصلي.. وابكي.. واسجد وادعي..

رجعت لسورة القصص وقصة أم موسى عليه السلام..

ولكلام ربنا سبحانه وتعالى.. وقوله" لولا أن ربطنا على قلبها.."

وبقت دعوتي ان ربنا يربط على قلبي..

وبدأت اسمع تفاسير.. واتدبر معنى الآيات الكريمة..

وكل دعوتي ان ربنا يربط على قلبي..

وبعد شهور حضرت معسكر مع طبيب نفسي.. وشاركته ازاي أنا فخورة وسعيدة وحزينة..

فخورة بابني وسعيدة له انه بيدرس اللي بيحبه ،ناجح فيه وحزينة بسبب الفراق..

والدكتور قال لي اسمحي لنفسك تحسي بالحزن وشوفي الحزن انه رسول جاي يعلمك حاجة..

بعد المعسكر قعدت افكر في الكلام.. وقعدت مع حزني..

ومع حزني استوعبت معنى "احبب ما شئت فإنك مفارقه.."

اتعملت معاه ومنه اني محتاجة اكون حاضرة اكتر واستمتع باللي بحبهم وهما موجودين.. لأن الفراق جاي جاي مفيش مفر..

ومع الحزن اتعملت اني اقلل التعلق.. سواء بالناس او الأشياء أو حتى الأنشطة اللي بتسعدني..

واني اتعلق بواحد بس.. الله.. الودود.. اللطيف..

هل سهل؟ 

لأ، خالص، صعب جدًا..

ولأنه صعب بقيت افكرني ان واحد بس مش هفارقه.. هو الواجد الموجود.. اللطيف الرؤوف..

اللي في عز الحزن هيصبرني، ويربط علي قلبي..

وان هو اللي اضحك وابكى 

وانه هو اللي أمات وأحيا..

وانه قبل ما بياخد بيدي..

ومع كل عسر بيدينا يسرين مش يسر واحد..

وبقيت كل ما افكر في الفراق.. افكر في الودود.. 

اللي معايا من بدء الخليقة..

واللي بتمنى من كل قلبي اكون عنده في الظل.. في الآخرة..مع كل الناس اللي الفراق فرق بينا..

وعلمنا بشكل عملي اننا نتعلق بالواحد الأحد وبيه بس..

ف.. فراق علشان نتعلق صح.. بالواحد الصح.. الله جل علاه..

#من_الألف_للياء_٢٠_فاء

#مقالة_أسبوعية

#حروف

#كلمات

#قراءة

#استماع

#تواصل_فكري

#تفاعل_عاطفي

#رقي_انساني

#سعادة_مصر

#كن_إنسانًا

#إيمان_رفعت