استخدام خرق القوانين لتربية اولادنا

"الأم مدرسة اذا اعددتها اعددت شعبا طيب الاعراق.."

طبعا  كل ما اسمع الجملة دي افكر في أمي.. واتعجب ازاي ما طلعتش وزيرة تربية وتعليم او رئيس مجلس الطفولة والأمومة؟ ست كرست حياتها لتربية بناتها وغرس القيم والاخلاق فيهم..وعندها خزائن من الصبر لتربية أمة مش ٤ بنات بس..

من صغري وانا شايفاها بتلتزم بالقواعد والقوانين ..

وبتحط لنا قواعد وقوانين في البيت.. سواء في يوم المدرسة او يوم الاجازة او حتى الاجازة الصيفية..

ام كلمتها ما تنزلش الارض ابدا..من عيلة لقبها شرف ومثال للشرف والاخلاق..

عشت معاها كده لحد يوم حفلة الباليه بتاعتي وانا في خامسة ابتدائي.. يومها جات امي في الكواليس ومعاها مكياج.. حطت لي احمر خدود وروج وهي في العادي كان بتقول ده ممنوع لاني صغيرة.. حسيت لحظتها اني مبسوطة ان امي بتزوقني وبتحط لي وردةفي شعري وهوب لاقيت مدام ابتسام المشرفة بتاعتنا بتعترض.. وبتقول لامي ممنوع المكياج.. اتضايقت كده وقلت في سري يوووه.. يعني لماامي تقرر تزوقني يقولوا ممنوع.. لاقيت امي بتقول للمشرفة ليه ممنوع؟ مفيش قانون وصلني بيقول كده.. ايه المشكلة لما ازوق بنتي ويبقى شكلها حلو؟ اتكلمت باحترام وبشكل صارم.. ولاقيت مدام ابتسام سكتت.. ولاقتني بطلع على المسرح بالوردة والمكياج.. وعلى وشي ابتسامة عريضة.. وانا عارفة اني هاعك الدنيا على المسرح لاني ماكانش ليا في الباليه والمدرب كرهني فيه.. انما كنت طالعة سعيدة ان امي كانت مركزة معايا..مهتمة بيا.. جاية تحضر الحفلة وجاية في الكواليس تزوقني وكمان تختلف مع واضعي القوانين علشاني..

يومها وانا على المسرح كان كل اللي شاغلني ان امي تشوفني.. تشوفني حلوة.. حتى لو هي اللي مزوقاني..

وكانت لحظة فرقت معايا جدا في علاقتي بأمي.. لحظة وصلني فيها اهتمام منها، اهتمام بيا لوحدي من غير باقي اخواتي.. لحظة ادتني فيها her full attention في موضوع بعيد عن المذاكرة والدراسة والمرض والتهذيب.. كان دول اللي اتعودت اخد تركيزها فيهم.. وفي اليوم ده اخدت تركيزها في حاجة جديدة.. حاجة مختلفة.. بره اطار التربية والتعليم.. ولا مش براه؟

ما هي برضه من خلال الموقف ده ربتني اني اناقش القوانين لما تكون مش واضحة وعلمتني اتزوق وازوق بنتي..

عاشت اللي ربت واهتمت بانها تحط ولادها وبناتها اولوية.. مش بالدلع.. بالتربية والتعليم والقدوة الحسنة

لحظة مع مدام ابتسام واحمر خدود وروج.. ووردة في شعري بقيت ذكرى فرقت في علاقتي بأمي واحساسي بالحب منها..

صباحكم ورد