اتجوز؟ ابقى عبدة...؟!

بعد ما اتخرجت من الجامعة بكام شهر

كنت في فرح وزوجي العزيز شافني فيه..

سأل عليا وعرف اني مشتركة في نادي الجزيرة الرياضي..

قعد شهرين يروح النادي يدور عليا.. مفيش.. ماليش اثر..

المهم طلب من واحدة قريبتنا تدبر لنا مقابلة تعارف..

وانا طبعًا لما امي قالت لي قلت لها مش هتجوز جواز صالونات…

والحت عليا اروح اشوف العريس.. وروحت وحصل النصيب واتجوزنا بفضل الله..

طبعًا لما روحت المقابلة الأولى سألني بروح النادي امتى؟

وردي كان اني مش بروح النادي..

مشتركة ايوه، بس مش بروح..

مفيش نادي، مفيش سينما، مفيش سفر ولا رحلات مع صحباتي....

فيه ٢ اصحاب من المدرسة مامتي تعرفهم مسموح لي اتبادل زيارات في البيت واحضر عيد ميلادهم، وبس..

كنت متخرجة من الجامعة، وبشتغل..

وكان المسموح هو من الشغل للبيت ومن البيت للشغل.. بس

امي كان ده النظام عندها..

وقد كان لحد اكتوبر ١٩٩٧.. لحد ما اتجوزت..

وبعد الجواز؟

بعد الجواز، ولأن مهم نفكر كويس في مواصفات الزوج..

ولأن امي كانت نصحتني اشوف والدة زوجي عايشة ازاي (زي ما كتبت في اسبوع من اللي فاتوا)..

لاقيت زوجي بيحررني..

يعني ايه؟

يعني بروح النادي وبروح السينما وبخرج مع صاحباتي..

وبسافر اصيف مع صحباتي في الصيف وولادنا يلعبوا مع بعض ويصيفوا مع بعض..

لاقيت زوجي بيشجعني اشتغل واتعلم..

ولاقتني لما اتنقلت من بيت اهلي لبيت زوجي بقيت "حرة"..

حرة بمعنى مسؤولة.. مسؤولة عن نفسي وعن اختياراتي..

مسؤولة عن قراراتي.. بشارك بيها زوجي، بستشيره.. بسمع رأيه..

وبيترك لي حرية الإختيار..

حديثي النهارده عن "الحرية"

اللي موقفة بنات كتير من انها تتجوز..

في سنة ٩٧ والقرن العشرين كان قليل البنات اللي بتبات بره وبتسافر لوحدها، و..و..و..

حاليًا، وبالذات مع الانفتاح الإعلامي سواء العربي او الأجنبي..

ومع السوشيال ميديا..بقت البنات شايفة غيرها بتسافر وبتروح وبتيجي..

وبقيت هي كمان، ممكن بعد الحاح على اهلها، بتروح وبتيجي وبتسافر..

وبالتالي؟

وبالتالي تتجوز ازاي؟

تتجوز علشان حد يتحكم فيها؟ يقول لها مفيش شغل بعد الجواز؟

او يقول لها بتصرفي فلوسك في ايه؟

او يقولها ازاي تسافري ما اصحابك لوحدك؟

او ارجعي بعد الشغل على طول علشان تحضري لي الغذا..او ازاي تتفسحي من غيري؟

او…او…او..

المهم، "الخوف من فقد الحرية" سبب موقف بنات كتير من الجواز..

منهم اللي بتيجي بعد ورشة معايا وتشاركني الخوف ده..

وبحكي لها ازاي فيه ازواج كويسة وداعمة لزوجاتها..

وان عليها تدعي ربنا يرزقها بالحد المناسب..

طيب والخوف ده عامل ايه؟

عامل حاجز نفسي بينك وبين الجواز..

مخلي مخك بيفرز هرمون كورتيزول عمال على بطال..

مخليني On guard طول الوقت.. يعني في حالة تحفز..في استعداد لصد اي اشارة..

والعريس المرتقب.. قاري الكلام ده بوعي او بدون وعي منه..

واصل له اشارات منك اني رافضة الجواز..

حتى لو بتقولي بلسانك انك مش رافضة..

عقلك الباطن مخزن خوف وافكار عن الجواز مخلياكي بتصدري طاقة رفض للعرسان المحتملة..

عزيزتي البنت.. الجواز مش تقييد للحرية..

دي مش حقيقة واقعة.. دي فكرة.. او معتقد..بسبب تركيزك بس على النماذج اللي اتقيدت حريتها بعد الزواج..

او اللي تحولت الى عبدة باختيارها من غير ما حد يطلب منها ده..

فيه بنات فعلًا بتسئ الإختيار.. وبتتجوز راجل عايز ام في البيت او عايز مديرة منزل..

بيدور على الرعاية.. فعايزها متفرغة علشانه هو وولاده..

وفيه بنات بتسيء الإختيار.. وبتتجوز راجل ثقته في نفسه ضعيفة… فعايزاها تقعد في البيت.. تخرج معاه هو بس.. تلبس على كيفه.. تقاطع فلانة وتبطل تشتغل مع قلان.. لأنه مش واثق من نفسه..

وفيه رجالة تانية..

رجالة سوية..

فاهمة ان الزوجة حرة.. ربنا خلقها حرة مش عبدة..

وان الزواج مش استعباد..

وان مراته لها حقوق.. واحتياجات..

وان الراجل الصح يحرص ان مراته تعيش حرة (مش متحررة بشكل يخالف الأخلاق والقيم)..

حرة تشتغل او لأ.. حرة لو عايزة تدرس..

حرة انها تتفسح مع اصحابها البنات....

حرة تنفق فلوسها ازاي..

حرة تبر اهلها ازاي..

نعرف منين الراجل ده؟

بيبان.. الجواب بيبان من عنوانه على طول..

"لما نتجوز عايزك تسيبي الشغل/تديني مرتبك/تلبسي كذا.."

الطلبات دي على طول جرس انذار للبنت..

اوعي تتجاهلي الجرس..

وكمان اوعي تعممي..

يعني مش كل الرجالة بتقيد حرية زوجاتها..

انما بنات كتير بتتجوز وبتهدر حقها بنفسها…

بتفني نفسها في مهمة إسعاد الزوج.. والاهتمام بالأولاد..

وتيجي في منتصف العمر تلاقي نفسها في ازمة..

وتصحى تشتكي…. وتسأل "أين عمري؟"

وتدخل في دوامة غريبة..

طيب ايه دخلك في الدوامة دي؟

ليه سبتي حريتك عند المأذون.. مين غسل مخك وفهمك ان الجواز استعباد؟

الإمام علي قال: "ما ضاع حق وراءه مُطالب"..

وفي بيت شعر لأحمد شوقي بحبه جدًا..بيقول:

"وَما نَيلُ المَطالِبِ بِالتَمَنّي وَلَكِن تُؤخَذُ الدُنيا غِلابا"

يعني خلاصة القول:
لكل بنت خايفة تتجوز لأحسن تتقيد حرياتها:

١- بلاش تعميم.. فيه ستات كتير متجوزة وحرة.. وفيه الجواز حررها زيي كده.. وفيه بنات مش متجوزة ومستعبدة من اهلها..

٢- انتبهي لجرس الإنذار لما تقابلي عريس.. لو سمعتي الجرس ارفضي العريس..

٣- شوفي والدة العريس عايشة ازاي ومدى إعجابه واحترامه لها ولطريقة عيشتها (واخته برضه لو عنده اخوات بنات/مرات اخوه)

٤- طالبي بحقوقك واتناقشي فيها ولحي على اللي انت عايزاه طالما مش حرام..

٥- ركزي على النماذج الإيجابية للستات اللي عايشة بحرية بعد الجواز مش العكس...

كتير من البنات خايفة من تقييد الحرية..

طيب والشباب؟ خايفين؟

يا ترى خايفين من ايه؟ من تقييد الحرية ولا من حاجة تانية؟

اكمل معاكم المرة الجاية..

#اتجوز؟_٧
#الزواج
#الأسرة
#المجتمع
#السنة