الجواز في زمن العشوائية وبدون منهج

زوجي العزيز كان بطل رياضي.. قضى سنين من حياته في النادي..

بيتمرن.. بيعمل نظام غذائي علشان البطولة تحت وزن معين..

بيسافر معسكرات مع المنتخب.. 

حياته بين الدراسة والنادي..

وأنا؟

وأنا كنت ما بين المدرسة والبيت.. 

مامتي كانت مقتنعة ان بناتها مايروحوش النادي.. لأنه فيه اولاد..

واحنا في مدرسة بنات بس..

وبالتالي فضلت بين المدرسة والبيت والسفر بره مع اهلي واخواتي في الأجازات الصيفية وتحت عين امي..

في موضوع الزواج، اللي كان شغال امي وبدأت تخليني اشوف عرسان، كانت نيتي ودعوتي ان ربنا يرزقني حد يقربني منه..

وكان هدفي اني ابقى سعيدة.. واني اعيش في بيت هادي.. وان زوجي يشاركني في تربية الأولاد.. وان تكون اخلاقه طيبة علشان هو هيبقى قدوة لأولادنا..

كانت أهدافك واضحة وبسيطة..

هحقق الأهداف دي ازاي؟ 

وهنا حديثي عن المواصفات..

المواصفات اللي تخليني احقق الأهداف..

يعني مثلًا لو هدفي اني اكسب سباق عربيات، مش هدخل السباق بعجلة.. ومش هدخل بعربية مستعملة ومحتاجة عمرة..

لو عايزة اسافر اتفسح باقل ميزانية ممكنة، مش هاخد طيارة واركب بيزنس كلاس واقعد في فندق ٧ نجوم..

فمهم اني اقف واحدد ايه "المواصفات الملائمة" لتحديد الهدف 

لما فكرت في مواصفات العريس اللي يساعدني احقق اهدافي لاقيت

√ يكون من اسرة محترمة

√ اهله سمعتهم طيبة

√ هو سمعته طيبة

√ علاقته باخواته كويسة

√ بيصلي وبيصوم وبيقرأ قرآن بانتظام وبيتعلم عن دينا بره اطار البيت والمدرسة 

√ صادق وامين و ومهذب في طريقة كلامه

√ بيحترم اهلي واخواتي 

√ فيه قبول من جانبي من ناحية شكله وطوله وحجمه 

√ فيه توافق فكري بينا

√ يكون متعلم 

√ يكون طموح 

√ يكون مهذب 

√ يكون راجل يعتمد عليه 

√ يكون بيشتغل وبيصرف على نفسه قبل الجواز (مش دلوعة امه)

√ يكون بيحب الأطفال وعايز يكَوُّن اسرة

√ يكون بيحب السفر والترفيه (لان دي حاجات بتسعدني)

√ يكون نضيف وريحته حلوة 

√ يكون بيحب المشاركة وفاهم ومستوعب ومؤمن ان دوره كزوج واب مش منحصر في الدفع، لا يكون فاهم دوره و"عايز" يشارك في تأسيس اسرة

بالتالي لما اتقدم لي عريس وحواره كان انه مش بيحب الأطفال كان ردي انه مرفوض.. 

ولما عريس اتكلم عن ان دوري هو التربية ودوره هو الشغل بره البيت برضه كان مرفوض..

ليه؟

لأن كان عندي وضوح للنية وللأهداف وللمواصفات الأساسية

يا ترى ايه مواصفات العريس اللي هيساعدك تحققي اهدافك من الزواج؟

يا ترى ايه مواصفات العروسة اللي هتساعدك تحقق اهدافك انت من الزواج؟

الدراما للأسف بتصدر لنا افكار مغلوطة وفاسدة..

منى واحمد اللي بيحبوا بعض ومن اول نظرة..

مصطفى قمر ومنى ذكي.. اللي بيحبها ووقع في غرامها…

ايه ده؟

ده اسمه دراما سعادتك..

الحياة محتاجة منا تفكير.. 

افلا تعقلون؟ افلا تتفكرون؟

ربنا سبحانه وتعالى ذكرنا بأهمية استخدام العقل والتفكر..

تفكر في كلام نبينا عليه الصلاة والسلام، قال النبي صلى الله عليه وسلم: "تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك". 

ذات الدين يعني ايه؟ قال رسول الله صلى الله عليه وسلم: "إنما بعثت لأتمم مكارم الأخلاق."

يعني دعوة الرسول الكريم هي دعوة للأخلاق..

بالتالي تعقل وفكر..

مش اللي لابسة أوسع عباية ولا اطول طرحة..

فكر في ذات الدين، اللي عندها دين.. وافتكر ان "الدين المعاملة"

لما زوجي اتقدم لي امي قالت لي "شوفي بيعامل امه ازاي، اللي ملوش خير في امه ملوش خير في حد."

نيتك ايه؟ اهدافك ايه؟ المواصفات ايه؟

ليه بتكلم في ده، علشان فعلًا نحدد احنا عايزين ايه من الزواج - او من عدمه - خصوصا لو احنا في سن نستطيع فيه الباء..

لما نعرف نيتنا واهدافنا ومواصفات شريك الحياة.. الدنيا بتبقى اوضح، بنبطل نهدر وقت مع ناس مش مناسبة لنا. بنبدأ نقول لا بثقة ونرتاح من تردد او شوشرة اني اتجوز والسلام واي عريس وخلاص.. 

بنبدأ نفَعَّل قانون الجذب بشكل صحيح.. ونجذب المواصفات اللي فعلًا عايزينها علشان نوصل لأهدافنا وكمان نرزق على نيتنا..

طيب والطرف الأخر؟ 

خليني اكلم معاكم عنه المرة الجاية..

#اتجوز؟_٣

#الزواج

#الأسرة

#المجتمع

#السنة

#الأمة