انت عايزة ايه؟ وانت عايز ايه؟ فرق كبير بين ايه وليه

العريس.. والعروسة.. البدلة والفستان

التطور الطبيعي.. 

البنت من اول ما تبلغ تبدأ الناس تقول لها "ما شاء الله كبرتي وبقيتي عروسة"..

ومع كل حنة او فرح تحضرهم، الناس تقول لها "عقبالك"..

ولما توصل لسن العشرينات تبدأ الناس تسألها لو فيه حاجة قربت..

ولما تعدي نص العشرينات تبدأ عيلتها تتوتر.. وامها تبدأ تقلق..

وهوب لو وصلت للتلاتين تبدأ هي تحس الإحراج..

ومع الوقت ينتابها كومبو خوف على قلق على زهق على ضغط..

توصل ان نفسها تتسد.. وتبقى خلاص مش عايزة العريس المنتظر اللي اتأخر..

وعايزة في نفس الوقت.. ومحتارة، مش عارفة هي عايزة ولا مش عايزة..

عايزة تتجوز؟ ولا عايز تعمل علامة √ جنب قايمة الأمور المتوقعة منها زي التخرج و الشغل (اللي في اسر كتير مش لازم) او الدراسات العليا (طالما فاضية ومش وراها زوج ولا عيال لسه)..

طيب والعريس؟ 

اللي امه نفسها تشوف ولاده وابوه نفسه يفرح باحفاده..وعايز يتطمن ان ابنه راجل وقادر يفتح بيت..

عليه ضغط اقل.. انما بسلاح الدموع والصعبانيات من الأم..

وسنه مش عيب، الرك على الجيب.. وياخد ليه واحدة في سنه لما فيه طوابير اصغر منه وفي انتظار العريس المنتظر..

واصحابه بيهزروا وينكتوا ويستلموا اللي يفكر يتجوز تريقة..

ويفتح الفيس بوك يلاقي ناس بتحتفل بالطلاق..

والمسلسلات الحياة فيها عيشة في الحرام من غير جواز بس البنت محترمة والجيران وحشين لانهم بيحكموا عليها علشان متفتحة وعايشة زي الأجانب..

بيعاني من صراع ما بين تربيته ودينه ومرجعيته وبين زنا متنكر في شكل تفتح وحرية مزيفة غير مسؤولة مستوردة..

ده اسمه ايه؟ اللي الطرفين بيشوفوه اسمه ايه؟

من وجهة نظري (والسلسلة دي كلها من وجهة نظري وتجاربي الشخصية والخبرات اللي اكتسبتها في الحياة على مدار ٤٩ سنة) 

ده اسمه عك العك..

انت يا ست الكل وانت يا سيد الناس..

اتكلمت معاكم عن "النية من الزواج" قبل كده..

المرة دي هتكلم عن الهدف..

انتي ايه هدفك من الزواج؟ وانت ايه هدفك من الزواج؟

الهدف والنية.. ناس كتير بتتلخبط بينهم

الهدف هو ال"ايه" والنية هي ال "ليه"

عايزة افقد وزن "هدف"، عايزة افقد وزن علشان أقوم بدوري في الحياة كخليفة بشكل افضل "نية"

طيب لما نتكلم عن الزواج.. نرجع خطوة لورا كده ونسأل، هو الزواج ده ايه؟

√ ده سنة، سنة الرسول عليه الصلاة والسلام..

عن أنس بن مالك رضي الله عنه أن النبي صلى الله عليه وسلم حمد الله وأثنى عليه، وقال: "لكني أنا أصلي وأنام، وأصوم وأفطر، وأتزوج النساء، فمن رغب عن سنتي فليس مني "متفق عليه

يعني حضرتك وحضرتك، العروسة والعريس، ممكن تتجوزوا علشان تخلصوا من زن الأهل، علشان الشكل الإجتماعي، علشان تطفشي من بيت اهلك اللي عاملين عليكي حصار وبيعاملوكي كطفلة حتى وانت في التلاتينات وما بعدها..

وانت، ممكن يكون هدفك من الجواز واحدة تخدمك.. وتبقى حلال ليك مش زنا.. وفي البيت تخلص من ابوك وامك اللي كل يوم مشغلين اسطوانة انت مش عايش في لوكاندة.. فبتقرر تتجوز علشان تعيش في لوكاندة.. وخدمة ٤ نجوم.. وانت تشخط بدل ما حد يشخط فيك..

الهدف ايه؟

خلينا نرجع لأول هدف، قبل هدف احياء سنة الرسول عليه الصلاة والسلام. الهدف الأول هو "إعمار الأرض". انت حضرتك لما تتجوز بتبني اسرة، وهي نواة المجتمع. يعني كل ما يأتي بعد الجواز وبسبب الجواز - لو مستحضر النية فيه - انت فيه في عبادة وأجر.. يعني صاحي قايم نايم في أجر بإذن الله.

√  فالأهداف: اعمار الارض، خدمة المجتمع بتقديم أسرة له، إحياء سنة النبي عليه الصلاة والسلام ويا سلام لو كان هدفك انك تبقى من خير الناس.. بفكرك بقول الرسول ﷺ: "خيركم خيركم لأهله"

بالتالي خيركم مش الناس اللي بتجري تعمل إطعام في رمضان ولا بتصوم الإثنين والخميس ولا اللي بتصلي قيام وبتعتكف.. خيرنا خيرنا لأهله.

الهدف ايه كمان؟ خلينا:نرجع لكتاب ربنا جل وعلا. ربنا في سورة الروم بيقول"

"وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ" 

√ يعني كمان نزود انك تسكن، سكن من السكينة.. تسكن روحك وعقلك يسكن وقلبك يتملي مودة ويبقى عندك فرصة توصل لك رحمة ربنا من خلال زوجة وتبقى مصدر رحمة لزوجتك واولادك..

ايه يا ناس؟

ايه ابغض الحلال؟ الطلاق..

والشيطان اسعد اوقاته؟ لما يهدم بيت.. 

وايه كمان؟ لما الإنسان يعيش في الحرام.. ويتغافل عن حديث الرسول عليه الصلاة والسلام:" يا معشر الشباب من استطاع منكم الباءة فليتزوج، فإنه أغض للبصر وأحصن للفرج، ومن لم يستطع فعليه بالصوم فإنه له وجاء." متفق عليه.

يعني راجل يقدر يتجوز ومقضيها حرام أو كبت لنفسه.. من خوفه من.. (ايًا كانت المخاوف)

ده ايه؟ 

ده عمل الشيطان يا معلم.. خلينا نفتكر قول ربنا سبحانه وتعالى في سورة البقرة:"الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ "

يعني الشيطان بيلعب لعبته ويقول لك الجواز نظام اجتماعي فاشل، هتصرف منين، بقى تجيب واحدة تنكد عليك، بص كل اللي قابلك لبسوا ازاي لما اتجوزوا.. 

وربنا بيقول لك ايه؟

بيقول لك سكن، مودة ورحمة..

والرسول عليه الصلاة والسلام بيقول ايه؟

بيقول خيركم خيركم لأهله..

يبقى نقف النهاردة مع "هدفنا من الزواج ايه"

بتجوز علشان

• اعَمَّر الأرض كخليفة اتخلق للسبب ده فده دوري الأساسي

• اخدم المجتمع 

• احيي سنة الرسول عليه الصلاة والسلام

• اطيع امر الرسول عليه الصلاة والسلام (فليتزوج)

• الاقي سكن/ روحي وعقلي وقلبي يستكينوا

• اعيش في مودة ورحمة

• اخزي الشيطان 

دي الأهداف من الكتاب والسنة..

انت ايه هدفك بقى؟

لو هنزود عليهم اهداف شخصية فردية ذاتية بتاعتك انت..

لما اتجوزت سنة ٩٧ كان هدفي اني اعيش حياة سعيدة.. فيها حب وتفاهم بيني وبين زوجي، وفيها هدوء في البيت وفيها زوج يشاركني تربية الأولاد. زوج اخلاقه تكون عالية عشان مع بعض نربي ولاد أخلاقهم تكون عالية.

هنحقق الأهداف دي ازاي؟ ده حديثي الجاي..

دلوقتي خلينا نقف مع أهدافنا.

√ لو كان عندك اهداف واضحة من الزواج واتجوزتي/اتجوزت راجعي/راجع  قد ايه الأهداف دي اتحققت

√ لو ما كانش عندك اهداف، اقفي وفكري/اقف وفكر ايه ممكن تكون اهدافك من زواجك الحالي

√ ولو انت مش متجوزة/مش متجوز اقفي/اقف واسألي/اسأل نفسك ايه اهدافك من الزواج/عدم الزواج خلال السنين دي وفي المستقبل. (يعني اهداف قريبة وأهداف بعيدة، اهداف دنيوية واهداف اخروية)

√ وآخر وقفة.. اسأل نفسك هل ممكن أهدافك من عدم الزواج تتحقق بالزواج؟

سواء كان الزواج الأول، او التاني او التالت..

#اتجوز؟_٢

#الزواج

#الأسرة

#المجتمع

#السنة

#الأمة