اتجوز؟ ابقى راعي رسمي..؟!

ايه..؟ اتجوز..؟ اجيب واحدة اصرف عليها؟

وتقعد تسألني رايح فين وجاي منين؟

لا وكمان تدوشني بمشاكلها؟

وتتخن وتبعجر بعد الجواز؟ 

وتمسك موبايلي تفتش فيه؟ 

لا وكمان نخلف.. فالاقي نفسي في دوامة عيال وزن..

ومصاريف تطعميات ومدارس وعيد ميلادات ودروس..

واشيل هم المصاريف..

انتم اتجننتوا..؟!

الحالة الإقتصادية والأجيال البايظة..

دي كلها حاجات بتأكد لي اني ابقى اتجننت لو اتجوزت..

في سلسلة مقالاتي بعنوان "اتجوز.." 

اتكلمت الأسبوع اللي فات عن العروسة، وخوفها من فقد حريتها مع الجواز..

حواري دلوقتي مع العريس..

اللي رافض يكون عريس لأنه خايف من "المسؤولية"..

مقضيها زي النحلة على كل وردة شوية..

الوردة اللي هتقبل الحرام هيمص رحيقها..

والوردة العفيفة هيقعد معاها في كافيهات..

و..؟

وسرقاه السكينة..

فاكر انه هيفضل نحلة يطير في وسط بساتين البنات..

ناسي انه

• بيتقدم في العمر..

• على الأرض لمهمة اسمها الخلافة..

• المدة بتاعته على الأرض لها تاريخ انتهاء..

• (او متناسي) ان فيه آخرة.. وانه هيتسئل..

 قال رسول الله ﷺ: لا تزول قدما عبد يوم القيامة حتى يسأل عن عمره فيم أفناه؟ وعن علمه فيم فعل فيه؟ وعن ماله من أين اكتسبه؟ وفيم أنفقه؟ وعن جسمه فيم أبلاه؟[

شباب كتير خايف من مسؤولية الجواز..

ومش خايف طيب من مسؤولية السؤال؟

 افنيت عمرك في ايه؟ انفقت مالك في ايه؟

جسمك ابليته في ايه؟

هل في كبت احتياجاته العاطفية والجنسية..

او في تصريفها في الحرام..؟

استطعت الباء ولم اتزوج..

ليه؟ لأني كنت "خايف"..

اقولك.. معاك حق تخاف..

بس مش معاك حق ما تتجوزش..

معاك حق تخاف فتصحح عقيدتك علشان الخوف يتحول ليقين وطمأنينة..

سيدنا موسى عليه السلام كان خايف.. 

ودعا ربنا سبحانه وتعالى وقال "رب إني لما أنزلت إلي من خير فقير" 

ماكانش خايف من المسؤولية صحيح.. انما لما خاف دعا..

وربنا استجاب.. وحاله اتبدل.. من خوف لإستقرار..

خايف من المسؤولية…

زوجة وعيال ومدارس.. 

طيب لما رسولك عليه الصلاة والسلام يقول لك :" الدنيا متاع، وخير متاع الدنيا المرأة الصالحة".

ولما ربنا جل وعلا يقول في كتابه: "الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِنْدَ رَبِّكَ ثَوَابًا وَخَيْرٌ أَمَلً" 

يعني الزوجة الصالحة خير متاع الدنيا 

والبنون زينة الحياة الدنيا..

وانت خايف؟

ليه شايف الزواج وتأسيس الأسرة كهم وشر؟

ليه لما ربك عز وجل ورسولك صلى الله عليه وسلم بيقولوا غير كده؟

طيب خايف من المسؤولية دلوقتي..

صح، هي الشيلة كبيرة..

وبعد ٢٧ زواج - بفضل الله - وتربية طفلين لحد ما اتخرجوا من الجامعة..

المسؤولية على زوجي كانت كبيرة..

و..؟

والعيال كبرت.. وبقى فيه شريكة حياة.. وبقى فيه ونس..

وبقى في عيال ياخدوا بحسنا.. ونتلم ونتشارك ونحكي ونتكلم..

كتير بيخاف يتجوز وبيقضيها خروج وفسح ومش مدرك ان العمر بيتقدم بيه..

وهوب يدخل التلاتينات.. وبعدين الأربعينات.. والخوف عمال يزيد..

واهله يكبروا.. ومنهم اللي يتوفى.. ويلاقي نفسه وحيد..

ولا لاقي زوجة يتشارك معاها.. ولا اطفال يملوا حياته..

ويلاقي الحياة بقت ماسخة، باهتة، مالهاش طعم..

ويعاني من امراض نفسية تظهر في هيئة الآم عضوية..

من فترة كنت مسافرة في بلد اوروبية..

ومرشد سياحي كان بيتكلم في جولة.. وقال حاليًا عدد الكلاب في بلدنا اكتر من عدد الأطفال..

الناس بقت تربي كلاب بدل ما تخلف.. خوفًا من مسؤولية الأطفال..

طيب، خبر حلو يا أمة محمد (عليه الصلاة والسلام)..

نتجوز، ونخلف.. ونجيب خلفاء.. ونتفوق عليهم في العدد..

هتقولي اصرف منين..؟

هقول لك: "وَفِي السَّمَاءِ رِزْقُكُمْ وَمَا تُوعَدُونَ"

انت عليك السعي بإخلاص والرزاق عليه الرزق والبركة..

وخلف بالمعقول..

هتقول لي اربي ازاي..؟

هقول لك  ربنا اللي بيربي.. 

انت عليك السعي + الدعاء + تكون قدوة صالحة + تختار زوجة صالحة علشان تبقى ام صالحة

هتقول لي الاقي الزوجة الصالحة فين في الزمن ده؟

هقول لك "وَالطَّيِّبُونَ لِلطَّيِّبَاتِ" 

اعمل انت على صلاح نفسك وربنا هيرزقك بواحدة صالحة لما تدعيه وانت "موقن" بالإجابة..

خلاصة القول:

• انت خايف من المسؤولية

• الخوف احساس طبيعي شعر بيه الأنبياء نفسهم

• صحح عقيدتك علشان الخوف يتحول ليقين

• انت مسؤول على الأرض ودورك الخلافة 

• سنة رسولك عليه الصلاة والسلام الزواج والإنجاب 

• الزوجة والأبناء مسؤولية وانت اتخلقت راجل علشان تشيل مسؤولية وده دور هتتسئل عليه

• عمرك بيتقدم ولو عايش نحلة بين بنات دلوقتي، قدام هتعاني من الوحدة الموحشة واتأمل الناس اللي في الخمسين والستين دلوقتي من غير ما يتجوزوا وشوف حالهم

• الرزق من عند ربنا، انت عليك السعي

• اصلح نفسك تلاقي الزوجة الصالحة

الحياة نفسها مسؤولية..

ممكن تشيل الشيلة لوحدك.. 

وممكن تجيب شريكة حياة تشيل معاك..

وتجيب اطفال يبقوا زينة حياتك..

وتعيش "حياة"..

فيها ايام حلوة وايام متعبة وايام صعبة..

في مجملها اسمها حياة طيبة..

مش جنة، ولا نار، حياة طيبة

مستني ايه؟

روح صحح عقيدتك واصلح نفسك..

واتجوز..

#اتجوز؟_٨

#الزواج

#الأسرة

#المجتمع

#السنة