الكافيهات والكذبة الكبيرة

من خاف سلم.. والباب اللي يجي لك منه الريح سده واستريح

كلام اتربينا عليه.. شربناه زي السفنجة ما بتشرب المياه

وللأسف اتحول لمعتقد راسخ ومش بس بنتصرف وفقًا له، لأ كمان بنربي ولادنا عليه

بنعلمهم يمشوا جنب الحيطة

بيكبروا وبيلاقوا الحيطة مايلة

بلاقوا راجل مش راجل.. وست مش ست

بيلاقوا في بيوت كتير للاسف راجل موجود وكابس على انفاس مراته وولاده، 

او راجل بيلعب دور البنك وبوسوا ايدكم وش وظهر ايه هنتنهبوا؟ عايزين ايه اكتر من كده؟

او راجل عيل مستني مراته تعمل له الببرونة

او

وبيلاقوا ست مبهدلة مرهرطة ومبقعة ومنكوشة وعصبية

مطحونة في شغل البيت وبتزعق في العيال وبتشتكي لطوب الأرض من زلط الأرض

بتتخانق مع دبان وشها.. وتندم - زي جوزها - على اليوم اللي اتنيلت واتجوزت فيه

ونغمتها الشهيرة هي "ياعيني عليكي يا فوزية، يا صغيرة على الهم يا فوزية.."

وكنتي فين يا لأ لما قلتي آه

طيب ومنى واحمد؟ والرومانسية

آه، ما هو برضه ولادنا اتربوا ان إذا دخل الزواج من الباب هرب الحب من الشباك،

وان ايه اخرة حبنا يا احمد؟ اخرته الزواج يا منى

طيب جيل شايف ده كله، طبعًا ده في حالة ان الزوج والزوجة من القلة اللي لسه مكملة في الرباط المقدس (ما تطرقتش هنا للنسبة المخيفة اللي بقت مطلقة او منفصلة ومبهدلين بعض وناسيين امر ربنا بالتسريح بالإحسان ونسيوا الفضل بينهم واطلقوا الشياطين بينهم وبين ولادهم وعائلاتهم)

نرجع لموضوعنا، الأزواج اللي كرهوا العيال في الجواز

بنت او ولد، شاب او شابة شايفين ست مطفية لأنها اتجوزت

شايفين راجل مهموم لأنه اتجوز

شايفين راجل وست مكملين مع بعض علشان العيال بس

يقبلوا على الجواز ازاي؟

عزيزي الراجل، خطابي لك النهارده

المرة اللي فاتت كلمت الست.. وسألتها فين انوثتك؟ 

فين فساتينك زي احمد حلمي ما كان بيقول في "اكس لارج"

ايه بدلة الكاراتيه دي؟

المرة دي بكلمك انت

فين رجولتك؟

الرجولة اللي هي حماية، احتواء، دعم نفسي، 

استماع وإنصات، اللي هي قوامة.. اللي هي سند ومواقف

اللي هي كمان كلمة حلوة وورد يا ابراهيم زي ما هند صبري قالت له في فيلم احلى الأوقات

اللي هي طبطبة.. وممكن اساعدك في ايه؟

اللي هي مودة ورحمة.. اللي هي مساعدتها على بر اهلها

اللي هي مشاركة في تربية الأولاد علشان يدعوا لك "وقل رب ارحمهما كما ربياني صغيرا.."

فين رجولتك اللي هي في لبس مهندم، مش بنطلون مدلل وملابس الداخلية باينة علشان هي موضة

ولا هي ضحكة متمرقعة علشان انت كوول

فين رجولتك اللي هي انا راجل يعني بدور على زوجة افتح معاها بيت

مش بتسلى ببنت اشرب معاها حاجة وانا عارف انها متعشمة اني اتجوزها وعامل عبيط

وعمال اخرج كل شوية مع واحدة واديها اهتمام خادع ونقسم الحساب اصل احنا متحضرين زي الأجانب 

وانا عارف ومتأكد اني داخليًا شرقي وعايش في صراع رهيب بين اني امثل اني عصري وعايز بنت مقضياها عادي وانا عارف اني لو هتجوز هتجوز كراجل شرقي عايز بنت مش بتاعت كافيهات.. لأ واصلًا مين قال اني هتجوز؟ ما ابويا اللي في البيت عقدني في الجواز (او ابويا اللي طلق امي وبهدلها عقدني في الجواز والعيال والرجولة لدرجة ني بقيت شايف ان خلفة عيال في الزمن ده انانية)

ايه الععععععععك ده يا بشر

عزيزي الراجل كفاية كافيهات ومياعة وصياعة ولعب ببنات الناس

عزيزتي بنت الناس كفاية كافيهات وعشم ان اللي قاعد معاكي في كافيه هيتجوزك

هو عامل عبيط.. وبيستعبط.. وبيقول احنا اصحاب

وانت عندك امل وعشم انه يتجوزك حتى لو بتكدبي عليه وعلى نفسك

عزيزي الراجل.. لو ابوك عقدك اتعالج

وروح هات عيال ربيهم مع زوجة تختارها تكون فعلًا عايزة تكون فاهمة انها زوجة اولًا وام ثانيًا

عزيزي الزوج اللي عنده شاب في سن زواج

او مراهق قريب هيبقى زوج

او طفل بيتعلم من المشاهدة

من فضلك بص على بيتك من جوا

هل البيت ده والمناخ اللي فيه وعلاقتك بمراتك يشجعوا ابنك انه يتجوز؟

هل هو شايف ان امه سعيدة بالزواج؟

هل شايف انه ابوه سعيد بالزواج؟

هل هو سعيد في بيت اهله؟

ما هو لو الإجابات لأ.. ليه متوقع منه يدور على تعاسته واتعاس غيره بالزواج؟

عزيزي الزوج

الست مفتاحها الحنية.. بس كده

صحيح فيه ستات قليلة عايزة حاجات غالية.. عايزة سفريات مبهرجة

انما الغالبية العظمى من الستات عايزة حنية واحتواء واهتمام

عايزة كلمة حلوة.. عايزة تسلم ايديك وايه الحلاوة دي اونت في عيني احلى من الدنيا وما فيها

عايزة ورد ودبدوب ولفتات صغيرة

لفة هدية بلونها المفضل او جاتوه بالطعم اللي بتحبه من محلها المفضل

وده يخليها تدوب حبًا فيك.. وتقيد صوابعها العشرين علشانك

ويخليها تقلع المبقع وتلبس حلو وتحاول تخس

لأنها "متشافة".. لانها واصلها الغذاء اللي روحها محتاجة له من جوزها

ما هو مين تاني يرويها حب واهتمام غير حضرتك؟

يعني اي حاجة ممكن اصحابها او اخواتها او زميلانها يقدموها لها

الا الرومانسية، منك انت.. الا الحب الرومانسي، منك انت

الا اتها تحس انها "انثى" منك انت

فيه صوامة قوامة دخلت النار علشان قطة حبستها

اوعى تحبس بنت في كافيه وتلعب بمشاعرها وانت عارف انها متأملة فيك

ده ابعد ما يكون عن الرجولة

اوعى تحبس مراتك على ذمتك وتبقى عارف انها بتحب البسبوسة وتفضل ترمي لها عيش حاف وتقول اهو ده انا

اتقي الله

استرجل

ولما تبقى راجل مسترجل، ربنا هيرزقك بست الستات

وافتكر ان الطيبون للطيبات.. والخبيثون للخبيثات

يعني لو بتشتكي، بص في المرايا

ولو عايز حياتك تستقيم استرجل، خليك راجل

وخليك فاكر حديث الرسول عليه الصلاة والسلام: "الدُّنْيَا مَتَاعٌ، وَخَيْرُ مَتَاعِ الدُّنْيَا الْمَرْأَةُ الصَّالِحَةُ."

فك عقدك.. خليك راجل.. كفاية كافيهات

اوعى الحرام.. افتكر الآخرة

واتجوز تصون نفسك وتعف واحدة بتدورعلى زوج "راجل" تكون له ست الستات

#اتجوز؟_٦

#الزواج

#الأسرة

#المجتمع

#السنة