عايزة اتجوز.. ولا مش عايزة.. مش عارفة..

قبل الكورونا كنت في تجمع شهري لمجموعة من السيدات اللي حضروا معايا دورة بعنوان The BULLET Women 

يومها اتفتح موضوع الزواج..

واحدة حكت لنا عن قريبتها، اللي اتقدم لها عرسان كتير.. بطريقة الجواز التقليدية..

وان كل واحد فيهم قصة..

اللي يتقدم ويقول لها من اول مقابلة: "أنا عايز مرتبك علشان ادفع قسط حاجة عايز اشتريها.."

واللي يقول لها: "مش عايزك تشتغلي وعايزك تقعدي في البيت.."

واللي يقول لها: "هاتي انت الشقة وانا اسكن معاكي.."

وان البنت كل ما تدي فرصة وتقابل عريس يطلع ابشع من اللي قبله..

طبعًا لما بنسمع القصة دي بنفكر ان العرسان غلطانة وان البنت ضحية..

(خلينا فاكرين ان في مقدمة السلسلة دي اني وضحت اني مش بهاجم حد ولا الهدف اني اضايق حد، الهدف رفع الوعي)

هو ولا العريس غلطان ولا العروسة ضحية..

هو احنا مش فاهمين ازاي العالم بيشتغل..

How the world works 

طبعًا الكلام ده محتاج الناس تفتح عقلها علشان تستوعبه فعلًا..

العالم بيشتغل ازاي؟

فيه حكمة/قول مأثور بيقول "على نياتكم ترزقون"

(فخلينا لما نرزق حاجة نقف مع نيتنا.. )

احيانًا بتكون نيتنا مش واضحة حتى لنفسنا...

بيكون عقلنا اللاواعي هو اللي بيحركنا..

وبما ان الدنيا فيها حاجة مؤكدة اسمها قانون الجذب 

The law of attraction

بالتالي لما العروسة يتقدم لها عريس كده تقف وتسأل سؤالين مهمين قوي:

• نيتي ايه من مقابلة "عريس"؟

• ايه اللي عملته علشان اجذب "العريس" ده بالذات؟

ولما اقول عملته هنا اقصد افكار + مشاعر..

مثلًا فكرت اني مش عايزة اتجوز حد يستغلني وياخد فلوسي او يقعدني في البيت او يتحكم فيا؟

وحسيت اني رافضة الجواز ومخنوقة من ضغط اهلي، بس قررت اقابل العريس اللي متقدم فطلع كده…؟

كلام قانون الجذب مش كلام أساطير..

ده كلام علمي من قبل سنة ١٩٠٠ ناس كتبت عنه..

واتعلمته بجملة او بمعنى ادق بسؤال من الكوتش اللي درست معاه كوتشينج في مدرسة Mars Venus

كان بيقول: "?What did you do to manifest" يعني عملتي ايه علشان يطلع لك ده/توصلي لده.."

بالتالي، كل عروسة اتقدم لها عريس وطلع مستغل، ابن ستين في سبعين..

طلع مامته متحكمة او بخيل أو أو..

هي جذبت النوع ده بسبب أفكارها ومشاعرها..

طيب والمطلوب؟

يا ست الناس.. لو فعلًا عايزة تتجوزي اقفي واقفة مع "نيتك"..

واسألى "ايه نيتي من اني اتجوز؟

وراجعي ونقحي نيتك لأن على نياتكم ترزقون..

iوالعريس؟ ونيته؟

ما تقلقيش، كلامي معاه المرة الجاية..

المرة دي معاكي انت..

في نيتك..

ومش بتكلم معاكي من كلام نظري..

بتكلم من تجربتي الشخصية مع النية من الزواج..

في سنة ١٩٩٧ دعيت ربنا يرزقني ب "شريك حياة يقربني منه.."

ما فكرتش يكون شكله ايه ولا بيشتغل ايه ولا مرتبه كام ولا شقته مساحتها ايه وفين بالنسبة لبيت اهالي اللي هو فيلا على النيل ٣ ادوار..

فكرت بس زوج يقربني من ربنا سبحانه وتعالى

وربنا رزقني بزوج في فترة الخطوبة بقى يقف عند مسجد لو احنا خارجين علشان نصلي الصلاة علي وقتها..

وفي شهر العسل بقى يعلمني تلاوة القرآن الكريم بالتشكيل والتجويد..

وبقى ياخدني مجلس ذكر كل خميس علشان نتدبر القرآن الكريم..

وطلعنا نحج مع بعض واحنا في العشرينات عشان نتم الفريضة..

بفضل الله والحمد لله وما توفيقنا الا بالله..

النهارده لو انت أنسة ولسه ماتجوزتيش، اقفي مع نيتك من الزواج او من رفض الزواج

ولو انت مطلقة او ارملة، اقفي مع نيتك من تكرار الزواج او من رفض الزواج مرة تانية

ولو انت متجوزة اقفي مع نيتك من الزواج القائم اصلًا وجددي النية وخليكي زي الصحابة رضوان الله عليهم اللي كانوا تجار نيات..

النية..

النية تصبغ العمل..

النية تحدد النتيجة/الرزق.. 

النية تحدد الأجر..

#اتجوز؟_١

#الزواج

#الأسرة

#المجتمع

#السنة

#الأمة