اتجوز؟واتخلع او اتطلق..؟!

اتجوز… عارفة ماذا يحدث بعد الجواز؟

يحدث طلاق او خلع…

لا مش بس كده،

يحدث محكمة أسرة وقوانين في صالح الست..

وحرمان الأب من رؤية العيال…

أو خطف العيال اللي في سن الحضانة وحرمان الأم منهم..

القوانين خلت الراجل يخاف يتجوز..

والرجالة خلت الستات تخاف تتجوز.. 

والجواز بقت سمعته وحشة..

وبقى شر مش لابد منه في عقول ناس كتير..

اكثر مما حد يتخيل..

الأسبوع اللي فات كتبت عن خوف الراجل من المسؤولية وازاي ده مخليه مش عايز يتجوز..

وتفاعل الرجالة على البوست فاق توقعاتي..

كأن فجأة حد اداهم ميكروفون وفرصة يتكلموا ويعبروا..

التعليقات كانت اغلبها انه مش خوف من المسؤولية..

ان الستات بقت مفترية وانهم مش لاقيين ستات صالحة، وان متطلبات الأهل المادية كبيرة جدًا..

وان الرجالة خايفة من القوانين الجائرة بتاعت محكمة الأسرة..

واللي بتخلي الست تفتري.. وتحرم الأب من العيال..

وبالتالي الباب اللي يجيلك منه الريح سده واستريح..

تابعت التعليقات يوم بيوم.. 

في محاولة مني لفهم المشكلة وجذورها.. 

طالما بكتب سلسلة بشجع فيها الناس تتجوز، لأن - من وجهة نظري - الأسرة نواة المجتمع، 

ولو انهدمت الأسرة تخلخل المجتمع..

ولو انتشر الزنا والفجور في المجتمع هلك المجتمع..

التعليقات جذورها واضح..

في الكوتشينج درسنا ان الأفكار بتتحول لمشاعر والمشاعر بتتحول لسلوك..

يعني لو عايزين نفهم سلوك شخص، نشوف مشاعره وقبلها افكاره..

السلوك رفض الزواج، 

المشاعر خوف، 

الأفكار لو أقبلت على الزواج مش هلاقي زوجة كويسة، اهلها هيرهقوني بالمتطلبات المادية، 

مع الخلافات هتخلعني وهتاخد العيال وتحرمني منهم، واعيش محروم من عيالي، 

اتجوز ليه؟ خليني كده احسن…

طبعًا بيكون الحل اننا نشتغل على الأفكار والمعتقدات والتشوهات الفكرية زي "التعميم".. 

واسأل الراجل او الست:

• هل كل (فعلًا كل اللي اتجوزوا) انتهوا بالطلاق او الخلع واتحرموا من ولادهم؟

• هل فيه نموذج واحد (حتى واحد بس) في جوازة طبيعية.. ؟ يعني اب وام وعيال مع بعض، فيه مشاكل انما بيحلوها.. فيه تحديات بتواجههم، فيه ايام صعبة وايام حلوة.. هل فيه نموذج واحد؟

• ايه اللي بيخلي زوج وزوجة، ربنا جعل بينهم سكن ومودة ورحمة، يوصلوا لمحكمة اسرة؟ وحرمان من العيال وغل وحقد بالشكل ده؟

• ايه المعايير اللي على اساسها اتجوزوا؟ اختاروا بعض ازاي؟

في يوم في ٢٠٠٥ زوجي وانا اختلفنا.. 

وقفت يومها وسألت نفسي :"عايزة ايه يا ايمان؟ عايزة تفكي الأسرة؟" 

وكان ردي لنفسي اني :"عايزة اكون زوجة سعيدة وفي أسرة مترابطة..". 

يومها روحت جبت كتاب المريخ والزهرة لدكتور جون جراي من مكتبة 

وبدأت أقرأ علشان افهم طبيعة زوجي كراجل وهو محتاج ايه وازاى اتواصل معاه بشكل فعال 

واعبر عن نفسي بشكل هو يفهمه..

في ٢٠١٣ زوجي في يوم بلغني انه اشترك لنا في معسكر للأزواج.. 

قلت له :"بس احنا كويسين، نروح ليه؟" 

قال لي :"There is always room for improvement" 

يعني دايمًا فيه مجال للتحسين والتطوير..

طبعًا ما تتجوزش..

اوعى تتجوز لو مش ناوي تحط وقت وجهد ومشاعر وفلوس في الزواج..

الزواج زي الشركة.. ضروري في رأسمالها يكون فيه حب وود وثقة واحترام واحتواء وتواجد..

وحجر أساسها ٢ متوافقين فكريًا ومن مستوى متقارب فكريًا واجتماعيًا وماديًا وثقافيًا ودينيًا..

مش كفاية نأسس الشركة.. بنحتاج نشتغل فيها، ونتابعها، ونحدثها، ونطورها..

بنحتاج نديها اهتمام مستمر.. من الطرفين..

فلكل راجل علق وقال ان اخرة الزواج خلع او طلاق وحرمان من الولاد..

ايه الخلل اللي ادى لده؟

سوء اختيار الشريك من الأول؟ 

ولا اهمال الشركة لحد ما الشريك اتملا غضب وكره وقرر ينتقم؟

ولا الجهل اصلًا؟ الجهل بدور الزوج ودور الزوجة في الزواج؟

الجهل في التعامل مع الطرف الأخر؟ الجهل في احتواء الطرف الأخر؟

الجهل في التعبير عن النفس واحتياجاتها بطريقة محترمة؟

ولا الجمود وعدم التطور مع تطور الزمن..

لما بتتجوز واحدة في سن العشرين طبيعي وهي في التلاتين والأربعين تتغير..

افكارها، اهتماماتها، احتياجاتها..

وبالتالي محتاجين نتطور مع بعض..

لأن الراجل كمان بيتغير..مسؤولياته، مشاكله، واحتياجاته.. 

وبالتالي اتجوز؟

لو عايز تفشل.. وبتقول لنفسك كل يوم لو اتجوزت هفشل..

اوعى تتجوز..

انت صيدة حلوة جدًا للشيطان.. قاعد يغذي في افكارك ومشاعرك..

وعقلك كل يوم عمال يعرض لك كل النماذج اللي فشلت علشان يأكد لك فكرتك عن الزواج..

(وده اسمه الوعي الإنتقائي يعني فيه نماذج ناجحة عقلك بيتجاهلها علشان يأكد لك فكرتك انت)

لو مش مستعد تفتح شركة اسمها زواج وتشتغل عليها وتكبرها وتنميها وتجني ارباحها في الدنيا والأخرة اوعى تتجوز..

والعكس..

لو عايز تتجوز وتنجح

• ركز على النماذج الإيجابية اللي متجوزة 

• اتعلم يعني ايه زواج واسرة وايه مسؤولية كل حد تجاه بعض وتجاه المجتمع

• اختار شريكة متوافقة معاك فكريًا واجتماعيًا ودينيًا وماديًا 

• اشتغل على العلاقة وافضل اشتغل على العلاقة انت وهي وهي وانت

• اطلب من ربنا التوفيق والسداد.. وجدد نيتك..

• اول ما تحصل بذور مشكلة اشتغلوا مع بعض لحل المشكلة.. خليها مشكلة انتم بتواجهوها مع بعض، مش مشكلة بينكم..

• ابعد عن الناس اللي بتسمم افكارك عن الزواج..

• تأنى في اخيتار شريكة الحياة واتأكد انها من اسرة محترمة هتشجعها تتقي الله فيك 

• قرر انك تنجح الشركة.. واتبع القرار ده بشغل عليها بشكل مستمر واستثمار حقيقي من القلب..

لو بتسأل ليه كل الهم ده، روح قابل ناس في سن السبعين ما اتجوزوش ولا خلفوا، واسألهم ايه اكتر حاجة ندموا عليها في حياتهم..

#اتجوز؟_٩

#الزواج

#الأسرة

#المجتمع

#السنة