ازاي الأنوثة سبب العنوسة؟

طيب نتكلم حبة جد ولا هتزعلوا؟

من وقت ما بدأت أكتب عن موضوع "اتجوز..؟" ولاحظت ان ردود فعل الناس مختلفة..

ناس متفقة معايا.. ناس مختلفة معايا في العلن.. ناس مختلفة معايا في السر.. ناس مش عارفة تختلف ولا تتفق..

ايه هدفي؟ 

إننا "ندرك" الخلل اللي حاصل في المجتمع.. 

وتبعات النسبة المرعبة من الطلاق وعدم الزواج لما بعد سن الأربعين والنسبة المخيفة للناس اللي بقت مستسهلة الحرام و بقت شايفاه عادي.. وكمان In public 

وبالتالي اتمنى عدم اخذ الموضوع بشكل شخصي.. يعني هو مش هجوم على حد معين.. او على القارئ اللي بيقرأ الكلام ده..

هو دعوة للتفكير وتأمل الوضع الحالي اللي مجتمعنا بقى فيه..

وبالتالي محتاج منا نقرأ بعقلية النمو مش عقلية الجمود والتحجر الفكري..

المرات اللي فاتت اتكلمت عن النية من الزواج والهدف منه ومواصفات شريك الحياة من الجهتين..

المرة دي هتكلم عن العروسة.. عن الست..عن البنت.. عن "الأنثى"

زمان، من سنين، لما كنت بتفرج على افلام ابيض واسود كان واضح جدًا يعني ايه بنت أو انثى..

فستان، رقة في الصوت والحركة.. الفاظ مهذبة.. نعومة..

ست، انثى..

لما الراجل بيقبل على الزواج، بالفطرة اللي ربنا خلقه عليها، بيكون بيدور على انثى..

رقة، لطف، نعومة، ريحة حلوة، لبس يدل على انها انثى 

(مش بتكلم على لبس عاري او فاضح أو خارج)..

بيدور على واحدة مش على راجل..

نعمل وقفة كبيرة هنا..

مع كل واحدة عايزة تتجوز.. 

هل مستوعبة انه لما بيدور بيدور بعقله الباطن؟ بيدور من غير وعي كامل منه؟

عارفة ان مش بس مظهرك.. لا اسلوب حياتك، لهثك المستمر، الرياضة اللي بتلعبيها لو فيها عنف، الشغل اللي بتشتغليه لو محتاج منك قرارات وتفكير عالي وتقديم حلول وادارة فريق.. النوم اللي مش مضبوط..

الحاجات دي كلها بتفرز عندك هرمونات بتخليكي شبه الراجل.. الطاقة بتاعتك طاقة ذكورية..

(ده علم مش كلام فارغ واقرأي في الموضوع)

بالتالي بيحصل ايه؟

الراجل بجد، اللي توازن الهرمونات عنده تمام وبالتالي على صعيد الرجولة، مش هيبص لك كانثى،

مش هيفكر فيكي كشريكة للحياة.. 

مش هيفكر اصلًا في احتمالية الإرتباط بيكي..

لأن طاقتك طاقة ذكورية.. بتبان في حركتك، في مشيتك، في صوتك، في مفرداتك، في ريحتك الطبيعية حتى من غير عطور.. 

بتبان في بشرتك وفي لمعة عينك.. بالتالي هو شايف راجل قدامه، شايف واحد صحبه..، عقله الباطن شايف راجل..

ولأنه راجل طبيعي مش بيفكر فيكي، لانه مش بيفكر في اصحابه ان حد منهم يبقى شريك حياة..

طيب معلش اصبري معايا كمان..

البنت اللي طاقتها ذكورية اعلى من طاقتها الأنثوية ممكن تجذب راجل..

انما مش اي راجل، راجل اسفة في اللفظ "متنسون" 

يعني ايه؟ 

يعني راجل حمادة عزو، ابن امه..

راجل عايزك انت تشيلي الليلة. انت تخططي وتدبري..

انت تشتغلي وتصرفي..

انت تبقي مسؤولة عنه..

وهو؟ 

وهو انجذب ليكي لأنك انثى مسترجلة وهو راجل متنسون..

يعني لو لقيتي ان فيه علاقة قبل كده الراجل كان متواكل عليكي، وانت اللي بتفكري وتخططي..

فكري كده لو انت مسترجلة.. وفكري كمان هو فعلًا راجل ولا ايه؟

ايه هدف الكلام ده؟

انك تدركي انك انثى.. إدراك، استيعاب يتحول الى سلوك..

انك انثى دي الهوية بتاعتك وبتاعتي..

ربنا، الخالق، ذكرها في كتابه..

من ذكر أو انثى..

يعني فيه فرق، الذكر ذكر والأنثى أنثى..

يعني ايه انثى؟

وهنا لب القصيد..

لو انت زيي، اتربيتي في مجتمع شرقي اقعدي بورقة وقلم واكتبي "يعني ايه انثى..؟"

أو اتغرس عندك وعندي تعريف ايه للأنوثة؟

انثى يعني كائن ضعيف، يعني نافص العقل والدين، يعني يكفرن العشير، يعني جسمها عورة، يعني مالهاش حقوق زي الراجل، يعني اخرتها بيتها وعيالها، يعني تعليمها اضافة مش اساسي، يعني هي في خدمة الذكور اللي في البيت وده دورها الأساسي..

يعني فرص العمل لها اقل، يعني مطلوب منها ترجع في ميعاد محدد لاحسن الناس تقول ايه، يعني اخوها يبرطع لأنه راجل وهي لا..

يعني جوزها ممكن يضربها علشان يقومها..

وطبعًا الموضوع ده محتاج مجلد.. مش بوست.. فهوقف الكتابة في التعريف لحد هنا وانت كملي مع نفسك بورقة وقلم

ركزي معايا..

الهدف انك تستوعبي:

١- الراجل عايز يتجوز انثى

٢- انت وانا ربنا خلق كل حد فينا انثى

٣- المجتمع شوه تعريف الأنثى

٤- انت وانا داخليًا رافضين التعريف المشوه ده وبالتالي بنتصرف زي الراجل علشان نتمرد على التعريف ده (كتير بدون وعي)

٥- التصرفات دي بتعمل خلل في هرموناتنا، وبتخلي طاقتنا ذكورية

٦- الراجل الذكر فعلًا بيلفظ الأنثى اللي طاقتها ذكورية

٧- الراجل اللي بيجذب الأنثى اللي طاقتها ذكورية راجل متنسون 

وبالتالي بتلاقي عريس وبيرفضك لأنك راجل مش انثى..

او بتلاقي عريس وانت بترفضيه لانك عايزة راجل راجل مش راجل متنسون..

والحل؟

ارجعي تاني لهويتك.. انثى، باخلاق، بقيم، باحترام، بادب.. 

انثى… بتاكل زي الأنثي، بتمشي بسرعة الأنثي، بتتكلم بصوت انثى، 

بتلبس لبس من ألوان وخامات وموديلات الأنثى (وتاني بدون دعوة للعري او الإبتذال)

بتفكر بتفكير الأنثي، بتحط حدود مع الذكور لأنها انثى..

بتشيل شيلة الأنثى..

هل انت انثى..

بصي في المرايا..

لو من بره انت تمام، انثى

طيب من جوا.. راضية انك انثى، فخورة بهويتك..؟

ولا رفضاها بسبب تعريفها اللي اتغرس عندي وعندك؟

طول ما احنا رافضين هويتنا، هتفضل عائق، حاجز اننا اصلا نبقى فعلًا عايزين نتجوز..

خليكي فاكرة

"ذكر" و"أنثى"..

ذكر له القوامة بمعايير ربانية من خالق الذكر والأنثى..

وأنثى رسولنا الكريم عليه الصلاة والسلام وصى عليها الذكر.. وصاه بالرفق.. ووصفنا بالقوارير..

كانَ النبيُّ ﷺ في مَسِيرٍ له، فَحَدَا الحَادِي، فَقالَ النبيُّ صَلَّى اللهُ عليه وسلَّمَ: ارْفُقْ يا أنْجَشَةُ، -ويْحَكَ- بالقَوَارِيرِ“.

وفي حديثه الشريف قال:"أكمل المؤمنين إيمانا أحسنهم خلقا، وخياركم خياركم لنسائهم" رواه أبو داود

وعند وفاته عليه افضل الصلاة والسلام قال: "أوصيكم بالنساء خيرا"

واتوفى وراسه على حجر السيدة عائشة رضي الله عنها وارضاها..

مش في غزوة ولا صلاة جماعة..

ذكر وانثى..

مجتمع متوازن..

فيه الذكر ذكر والأنثى أنثى…

حديثي كان المرة دي عن الأنثى والهوية..

والمرة الجاية بإذن الله مع الذكر.. والرجولة..

#اتجوز؟_٥

#الزواج

#الأسرة

#المجتمع

#السنة